രാജ്യാന്തര ശ്രദ്ധ പിടിച്ചു പറ്റിയ ഗിരീഷ് എഡി ചിത്രമാണ് 'പ്രേമലു'. നസ്ലെന്‍, മമിത ബൈജു എന്നിവര്‍ കേന്ദ്രകഥാപാത്രങ്ങളില്‍ എത്തിയ ചിത്രത്തിന് മികച്ച പ്രതികരണമാണ് പ്രേക്ഷകരില്‍ നിന്നും ലഭിച്ചത്.
ആദ്യ ഭാഗത്തിന് പിന്നാലെ രണ്ടാം ഭാഗവും ഉണ്ടാകുമെന്ന് കുറച്ച് നാളുകള്‍ക്ക് മുമ്പ് അണിയറപ്രവര്‍ത്തകര്‍ പ്രഖ്യാപിച്ചിരുന്നു. 'പ്രേമലു'വിന്‍റെ സക്‌സസ് സെലിബ്രേഷനിടെയായിരുന്നു രണ്ടാം ഭാഗത്തിന്‍റെ പ്രഖ്യാപനം. 'പ്രേമലു 2' വിന്‍റെ പോസ്‌റ്ററും പുറത്തുവിട്ടിരുന്നു.
ഇപ്പോഴിതാ സിനിമയുമായി ബന്ധപ്പെട്ട് പുതിയ അപ്‌ഡേറ്റാണ് പുറത്തുവരുന്നത്. 'പ്രേമലു 2' വിന്‍റെ നിര്‍മ്മാതാക്കളില്‍ ഒരാളായ ദിലീഷ് പോത്തന്‍ അദ്ദേഹത്തിന്‍റെ പുതിയ സിനിമയുടെ പ്രൊമോഷന്‍റെ ഭാഗമായുള്ള അഭിമുഖത്തിലാണ് 'പ്രേമലു 2' വിന്‍റെ പുതിയ അപ്‌ഡേറ്റ് പങ്കുവച്ചിരിക്കുന്നത്.
'പ്രേമലു 2' ആദ്യ ഭാഗത്തേക്കാള്‍ കുറച്ചുകൂടി വലിയ ക്യാന്‍വാസില്‍ ഉള്ളൊരു പടമാണെന്നാണ് ദിലീഷ് പോത്തന്‍ പറയുന്നത്. ജൂണില്‍ സിനിമയുടെ ചിത്രീകരണം ആരംഭിക്കുമെന്നും ഈ വര്‍ഷം അവസാനത്തോടെ ചിത്രം തിയേറ്ററുകളില്‍ എത്തുമെന്നും അദ്ദേഹം കൂട്ടിച്ചേര്‍ത്തു.
" 'പ്രേമലു 2' വിന്‍റെ എഴുത്ത് കാര്യങ്ങളൊക്കെ കഴിഞ്ഞു. ലൊക്കേഷന്‍ ഹണ്ടും മറ്റ് പ്രീ പ്രൊഡക്ഷന്‍ വര്‍ക്കുകളും നടക്കുകയാണ്. ജൂണ്‍ പകുതിയോടെ പ്രേമലു 2വിന്‍റെ ആദ്യ ഷെഡ്യൂള്‍ ഷൂട്ട് തുടരും. ഇത്തവണ മൂന്ന് നാല് ഷെഡ്യൂളുണ്ട്. 2025 അവസാനത്തോടെ റിലീസ് ചെയ്യാനാണ് പദ്ധതിയിട്ടിരിക്കുന്നത്. സംവിധായകന്‍ ഗിരീഷിന്‍റെ തീരുമാനമാണിത്. ഷൂട്ട് എന്തായാലും ജൂണ്‍ പകുതിയോടെ ആരംഭിക്കും. ആദ്യ ഭാഗത്തേക്കാള്‍ കുറച്ചുകൂടി വലിയ ക്യാന്‍വാസില്‍ ഉള്ളൊരു പടമാണ്," ദിലീഷ് പോത്തന്‍ പറഞ്ഞു.
ഗിരീഷ് എഡി തന്നെയാകും രണ്ടാം ഭാഗത്തിന്‍റെയും സംവിധായകന്‍. നേരത്തെ സംവിധായകന്‍ ഗിരീഷ് എഡിയും രണ്ടാം ഭാഗത്തെ കുറിച്ച് പ്രതികരിച്ചിരുന്നു. 'പ്രേമലു 2' കൂടുതല്‍ തമാശയുള്ളതും എനര്‍ജറ്റിക്കും ആയിരിക്കുമെന്ന് ഗിരിഷ് എഡി ഇടിവി ഭാരതിനോട് മുമ്പൊരിക്കല്‍ പറഞ്ഞിരുന്നു.
'പ്രേമലു' സിനിമയുടെ ക്ലൈമാക്‌സില്‍ നസ്ലിന്‍റെ കഥാപാത്രം യുകെയിലേക്ക് ജോലി അന്വേഷിച്ചു പോകുന്നുണ്ട്. സ്വാഭാവികമായും യുകെയിൽ വച്ചാവുമോ ചിത്രീകരണം എന്ന ചോദ്യത്തിന് ക്ഷമയോടെ കാത്തിരിക്കൂ എല്ലാ ചോദ്യങ്ങൾക്കും ഉത്തരം ലഭിക്കും എന്നായിരുന്നു സംവിധായകന്‍റെ മറുപടി. ആദ്യ ഭാഗത്തിലെ എല്ലാ കഥാപാത്രങ്ങളും രണ്ടാം ഭാഗത്തിലും ഉണ്ടാകുമെന്നും അദ്ദേഹം കൂട്ടിച്ചേർത്തു.
പ്രധാനമായും മലയാളത്തില്‍ ഒരുങ്ങുന്ന ചിത്രം തമിഴ്, തെലുങ്ക് എന്നീ ഭാഷകളിലും റിലീസിനെത്തും. നസ്ലെന്‍, മമിത ബൈജു എന്നിവരെ കൂടാതെ ശ്യാം മോഹന്‍, അഖില ഭാര്‍ഗവന്‍, സംഗീത് പ്രതാപ്, മീനാക്ഷി രവീന്ദ്രന്‍, അല്‍താഫ് സലിം തുടങ്ങിയവരും സിനിമയില്‍ പ്രധാന വേഷത്തില്‍ എത്തിയിരുന്നു. ഭാവന സ്‌റ്റുഡിയോസിന്‍റെ ബാനറില്‍ ദിലീഷ് പോത്തന്‍, ഫഹദ് ഫാസില്‍, ശ്യാം പുഷ്‌കരന്‍ എന്നിവര്‍ ചേര്‍ന്നാണ് സിനിമയുടെ നിര്‍മ്മാണം.
Also Read: പ്രേമലു 2 അടുത്തവർഷം; പ്രേമലുവിലെ എല്ലാ കഥാപാത്രങ്ങളും രണ്ടാം ഭാഗത്തിലും ഉണ്ടാകുമോ? മറുപടിയുമായി സംവിധായകന്‍ ഗിരിഷ് എഡി - PREMALU 2 CINEMA WILL RELEASE 2025
