അനൂപ് മേനോൻ - ധ്യാൻ ശ്രീനിവാസൻ - ഷീലു എബ്രഹാം സിനിമയ്‌ക്ക് പാക്കപ്പ്

മനോജ് പാലോടൻ സംവിധാനം ചെയ്യുന്ന സിനിമയുടെ കൂടുതൽ വിവരങ്ങൾ ഉടൻ പ്രേക്ഷകരിലേക്ക്

അനൂപ് മേനോൻ, ധ്യാൻ ശ്രീനിവാസൻ, ഷീലു എബ്രഹാം എന്നിവരെ പ്രധാന കഥാപാത്രങ്ങളാക്കി മനോജ് പാലോടൻ സംവിധാനം ചെയ്യുന്ന സിനിമയുടെ ചിത്രീകരണം പൂർത്തിയായി (Anoop Menon with Dhyan Sreenivasan and Sheelu Abraham). അബാം മൂവീസിൻ്റെ ബാനറിൽ എബ്രഹാം മാത്യുവാണ് ഈ ചിത്രം നിർമ്മിക്കുന്നത്. അബാം മൂവിസിൻ്റെ പതിനാലാമത് ചിത്രം കൂടിയാണിത്.

അണിയറ പ്രവർത്തകർക്കൊപ്പം അനൂപ് മേനോൻ

ഷീലു എബ്രഹാമാണ് ഈ ചിത്രം പ്രേക്ഷകർക്ക് മുന്നിൽ അവതരിപ്പിക്കുന്നത് (Anoop Menon, Dhyan Sreenivasan and Sheelu Abraham's new movie packup). കോമഡിയ്‌ക്ക് പ്രാധാന്യം നൽകി ഒരുക്കുന്ന ഈ ചിത്രത്തിന്‍റെ പേര് ഇതുവരെയും അണിയറ പ്രവർത്തകർ പുറത്തുവിട്ടിട്ടില്ല. കാലാവസ്ഥ നിരീക്ഷണ കേന്ദ്രത്തിലെ ഉദ്യോഗസ്ഥരും അവരുടെ ജീവിതത്തിൽ സംഭവിക്കുന്ന ചില കാര്യങ്ങളുമാണ് നർമത്തിൽ ചാലിച്ച് ഈ ചിത്രം പറയുന്നത് എന്നാണ് വിവരം. എറണാകുളത്തും പരിസര പ്രദേശങ്ങളിലുമായാണ് ഈ ചിത്രത്തിന്‍റെ ഷൂട്ടിംഗ് പൂർത്തീകരിച്ചത്.

അസീസ് നെടുമങ്ങാട്, ജോണി ആൻ്റണി, സെന്തിൽ, സജിൻ ചെറുകയിൽ തുടങ്ങിയവരും ഈ ചിത്രത്തിൽ പ്രധാന വേഷങ്ങളിലുണ്ട്. അമീർ കൊച്ചിൻ ഈ ചിത്രത്തിന്‍റെ എക്‌സിക്യൂട്ടീവ് പ്രൊഡ്യൂസറാണ്. കൃഷ്‌ണ പൂജപ്പുരയാണ് ഈ ചിത്രത്തിനായി തിരക്കഥ ഒരുക്കിയത്. ഏറെ നാളുകൾക്ക് ശേഷമാണ് കൃഷ്‌ണ പൂജപ്പുരയുടെ തിരക്കഥയിൽ ഒരു സിനിമ പ്രേക്ഷകരിലേക്ക് എത്തുന്നത്.

കേരള സംഗീത നാടക അക്കാദമി അവാർഡ് ജേതാവ് കൂടിയായ പ്രകാശ് ഉള്ളേരിയാണ് ഈ ചിത്രത്തിന് സംഗീതം ഒരുക്കിയിരിക്കുന്നത്. ബി കെ ഹരി നാരായണന്‍റേതാണ് വരികൾ. മഹാദേവൻ തമ്പി ഛായാഗ്രഹണം നിർവഹിക്കുന്ന ചിത്രത്തിന്‍റെ എഡിറ്റിങ് കൈകാര്യം ചെയ്യുന്നത് സിയാൻ ശ്രീകാന്ത് ആണ്.

ലൈൻ പ്രൊഡ്യൂസർ - ടി എം റഫീഖ്, പ്രൊഡക്ഷൻ എക്‌സിക്യൂട്ടീവ് - പ്രജീഷ് പ്രഭാസൻ, കലാസംവിധാനം - അജയ് ജി അമ്പലത്തറ, മേക്കപ്പ് - ഷാജി പുൽപ്പള്ളി, കോസ്റ്റ്യൂം ഡിസൈനർ - അരുൺ മനോഹർ, ചീഫ് അസോസിയേറ്റ് ഡയറക്‌ടർ - ഗ്രാഷ് പി ജി, വി എഫ് എക്‌സ് - റോബിൻ അലക്‌സ്, സ്റ്റിൽസ് - ദേവരാജ്, പി ആർ ഒ - പി ശിവപ്രസാദ്, ഡിസൈൻസ് - മാജിക് മൊമൻസ് എന്നിവരാണ് ഈ ചിത്രത്തിന്‍റെ മറ്റ് അണിയറ പ്രവർത്തകർ.