ബയോമെഡിക്കൽ എഞ്ചിനിയറിങ്ങിൽ ഇനി ഇരട്ട ബിരുദാനന്തര ബിരുദം; കോഴിക്കോട് എൻഐടിയും നോർത്ത് ടെക്‌സസ് യൂണിവേഴ്‌സിറ്റിയും കരാറിൽ ഒപ്പുവച്ചു - NIT AGREEMENT WITH UNT FOR DUAL PG

വിദ്യാർഥികൾക്ക് ആഗോള വിദ്യാഭ്യാസ അവസരങ്ങൾ വർധിപ്പിക്കുന്നതിനുള്ള ഇൻസ്റ്റിറ്റ്യൂട്ടിന്‍റെ ശ്രമങ്ങളിൽ ഒരു സുപ്രധാന നാഴികക്കല്ലാണ് ഈ പദ്ധതിയെന്ന് ഡയറക്‌ടർ പ്രൊഫ. പ്രസാദ് കൃഷ്‌ണ.

കോഴിക്കോട്:നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (എൻഐടി-സി) വിദ്യാർഥികൾക്ക് ബയോമെഡിക്കൽ എഞ്ചിനീയറിങ്ങിൽ ഇരട്ട ബിരുദാനന്തര ബിരുദം നൽകുന്നതിന് കോഴിക്കോട് എൻഐടിയും നോർത്ത് ടെക്‌സസ് യൂണിവേഴ്‌സിറ്റിയുമായി (യുഎൻടി) ആർട്ടിക്കുലേഷൻ കരാറിൽ ഒപ്പുവച്ചു.

ഈ പങ്കാളിത്തം കോഴിക്കോട് എൻഐടിയിലെ ബയോസയൻസ് ആൻഡ് എഞ്ചിനീയറിങ് ഡിപ്പാർട്ട്‌മെൻ്റിൽ നിന്നുള്ള ബിരുദാനന്തര ബിരുദ വിദ്യാർഥികൾക്ക് ബയോ എഞ്ചിനീയറിങ്ങിൽ എംടെക്കും യുഎൻടിയിൽ നിന്ന് ബയോമെഡിക്കൽ എഞ്ചിനീയറിങ്ങിൽ എംഎസും നേടാനുള്ള അവസരം നൽകുന്നു.

ഈ പ്രോഗ്രാമിന് കീഴിൽ, വിദ്യാർഥികൾ എൻഐടിയിൽ ഒരു വർഷത്തെ കോഴ്‌സ് വർക്ക് പൂർത്തിയാക്കുകയും തുടർന്ന് യുണൈറ്റഡ് സ്റ്റേറ്റ്സ് ആസ്ഥാനമായുള്ള യുഎൻടിയിൽ ഒരു വർഷത്തെ പഠനവും തീസിസ് വർക്കും പൂർത്തിയാക്കുകയും ചെയ്യും. ഈ കരാർ തടസങ്ങളില്ലാത്ത ക്രെഡിറ്റ് കൈമാറ്റങ്ങൾ സുഗമമാക്കുകയും അന്തർദ്ദേശീയ അവസരങ്ങൾ ഉറപ്പുവരുത്തുകയും ചെയ്യുന്നതോടൊപ്പം ബയോ എഞ്ചിനീയറിങ്ങിൽ വിപുലമായ വൈദഗ്ധ്യം നേടാൻ വിദ്യാർഥികളെ പ്രാപ്‌തരാക്കുമെന്ന് അധികൃതർ അറിയിച്ചു.

ഇടിവി ഭാരത് കേരളം ഇനി വാട്‌സ്‌ആപ്പിലും

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.

''എൻഐടിയുടെ ആദ്യ അന്താരാഷ്ട്ര ഡ്യുവൽ ഡിഗ്രി പ്രോഗ്രാമാണിത്. വിദ്യാർഥികൾക്ക് ആഗോള വിദ്യാഭ്യാസ അവസരങ്ങൾ വർധിപ്പിക്കുന്നതിനുള്ള ഇൻസ്റ്റിറ്റ്യൂട്ടിൻ്റെ ശ്രമങ്ങളിൽ ഒരു സുപ്രധാന നാഴികക്കല്ലാണ് ഈ പദ്ധതി. പ്രശസ്‌തമായ അന്താരാഷ്ട്ര സർവകലാശാലകളുമായി കൂടുതൽ ഇരട്ട, സംയുക്ത ഡിഗ്രി പ്രോഗ്രാമുകൾ ആരംഭിക്കുന്നതിന് സ്ഥാപനം തയ്യാറെടുക്കുകയാണ്'' ഡയറക്‌ടർ പ്രൊഫ. പ്രസാദ് കൃഷ്‌ണ പറഞ്ഞു.

ഉന്നതവിദ്യാഭ്യാസത്തെ അന്തർദേശീയവൽക്കരിക്കുന്നതിൽ ദേശീയ വിദ്യാഭ്യാസ നയത്തിൻ്റെ പങ്ക് അദ്ദേഹം എടുത്തുപറഞ്ഞു. ടെക്‌സാസ് ആസ്ഥാനമായുള്ള ഒരു സോഷ്യൽ എൻ്റർപ്രണർഷിപ്പ് സ്ഥാപനമായ BRIDG 360 മായും NITC ധാരണാപത്രം (എംഒയു) ഒപ്പുവച്ചു.