ന്യൂഡൽഹി : ആന്ധ്രാപ്രദേശ് മുന്‍ മന്ത്രി വൈഎസ് വിവേകാനന്ദ റെഡ്ഡിയെ കൊലപ്പെടുത്തിയ കേസിൽ വൈഎസ് ഭാസ്‌കർ റെഡ്ഡിക്കും വൈഎസ് അവിനാഷ് റെഡ്ഡിക്കും പങ്കുണ്ടെന്ന് വിവേകാനന്ദ റെഡ്ഡിയുടെ മകള്‍ വൈഎസ് സുനിത. എന്നാൽ പ്രതികളെ ആന്ധ്രാപ്രദേശ് മുഖ്യമന്ത്രി ജഗൻ മോഹന്‍ റെഡ്ഡി സംരക്ഷിക്കുകയാണെന്നും സുനിത ആരോപിച്ചു. തന്‍റെ പിതാവിന്‍റെ കൊലപാതക കേസിൽ ജഗന്‍റെ പങ്ക് അന്വേഷിക്കണമെന്നും അവർ ആവശ്യപ്പെട്ടു. ആന്ധ്രാപ്രദേശിൽ വൈഎസ്ആർസിപിക്ക് വോട്ട് ചെയ്യരുതെന്നും സുനിത ആവശ്യപ്പെട്ടു.
പിതാവിന്‍റെ കൊലപാതക കേസ് ഇഴഞ്ഞുനീങ്ങുകയാണ്. സി.ബി.ഐക്ക് മുകളില്‍ എന്തു തരം സമ്മർദമാണ് ഉള്ളതെന്ന് അറിയില്ല. സഹോദരി ശർമിള മാത്രമാണ് തുടക്കം മുതൽ കൂടെ നിന്നതെന്നും സുനിത മാധ്യമങ്ങളോടു പറഞ്ഞു. കേസിന്‍റെ അന്വേഷണം വൈകുകയാണെന്ന് പറഞ്ഞ സുനിത, ജനകീയ കോടതിയാണ് ശിക്ഷ വിധിക്കേണ്ടതെന്നും സംഭവങ്ങള്‍ ജനങ്ങളുടെ മുന്നിൽ വച്ചാൽ മാത്രമേ തനിക്ക് നീതി ലഭിക്കുകയുള്ളൂ എന്നും കൂട്ടിച്ചേര്‍ത്തു.
നേരത്തെ സിബിഐ അന്വേഷണത്തിന് ഉത്തരവിട്ട ഹർജി എന്തിനാണ് ജഗൻ പിൻവലിച്ചതെന്ന് സുനിത ചോദിച്ചു. പുതിയ സർക്കാർ രൂപീകരിക്കുന്നതിന് മുമ്പായാണ് ജഗൻ മോഹന്‍ റെഡ്ഡി ഹർജി പിൻവലിച്ചതെന്ന് അവർ ചൂണ്ടിക്കാട്ടി. ശിവശങ്കര്‍ റെഡ്ഡിയുടെ അറസ്റ്റിന് ശേഷം കേസ് ആകെ മാറിയെന്നും സുനിത പറഞ്ഞു. ശിവശങ്കർ റെഡ്ഡിയുടെ അറസ്റ്റിന് ശേഷം പ്രതികള്‍ ഭയക്കാന്‍ ആരംഭിച്ചു. അന്നുമുതലാണ് സിബിഐക്കെതിരെ കേസുകൾ വരാന്‍ ആരംഭിച്ചത്. അംഗങ്ങൾക്കെതിരെ കേസുകൾ വന്നപ്പോഴാണ് സിബിഐ ഉദ്യോഗസ്ഥർ കടപ്പ വിട്ടതെന്നും അവര്‍ ആരോപിച്ചു.