ഹാസൻ: ജെഡി(എസ്) എംഎൽസി സൂരജ് രേവണ്ണയ്‌ക്കെതിരെ രണ്ടാമത്തെ കേസ് രജിസ്‌റ്റർ ചെയ്‌ത് പൊലീസ്. സൂരജ് രേവണ്ണയുടെ അടുത്ത സഹായിയുടെ പരാതിയിന്മേൽ പ്രകൃതി വിരുദ്ധ പീഡനത്തിനാണ് കേസെടുത്തിരിക്കുന്നത്. സൂരജിനെ സംരക്ഷിക്കാൻ വേണ്ടി ഒരു ജെഡി(എസ്) പ്രവർത്തകനെതിരെ സൂരജിൻ്റെ സഹായി നേരത്തെ പരാതി നൽകിയിരുന്നു.
ശനിയാഴ്‌ച രാത്രിയാണ് സൂരജിനെതിരെ പ്രകൃതി വിരുദ്ധ പീഡനത്തിന് ആദ്യ കേസ് രജിസ്‌റ്റർ ചെയ്‌തത്. അടുത്ത ദിവസം തന്നെ അറസ്‌റ്റ് ചെയ്യുകയും 14 ദിവസത്തെ ജുഡീഷ്യൽ കസ്‌റ്റഡിയിൽ റിമാൻഡ് ചെയ്യുകയും ചെയ്‌തു. തിങ്കളാഴ്‌ച കോടതി ഇയാളെ എട്ട് ദിവസത്തെ പൊലീസ് കസ്‌റ്റഡിയിൽ വിട്ടു.
സൂരജ് രേവണ്ണയ്‌ക്കെതിരെ രണ്ടാമത്തെ എഫ്ഐആർ രജിസ്‌റ്റർ ചെയ്യാനുള്ള നടപടികൾ പുരോഗമിക്കുകയാണെന്ന് ഹാസനിലെ പൊലീസ് ഉദ്യോഗസ്ഥൻ പറഞ്ഞു. മെഡിക്കൽ ഡോക്‌ടറായ സൂരജ് മുൻ പ്രധാനമന്ത്രിയായ (ജെഡി(എസ്)) എച്ച് ഡി ദേവഗൗഡയുടെ ചെറുമകനും ഹോളനരസിപുര എംഎൽഎ എച്ച് ഡി രേവണ്ണയുടെ മകനുമാണ്.