ന്യൂഡല്‍ഹി: വരുന്ന 25 വര്‍ഷം കൊണ്ട് ഇന്ത്യ വികസിത രാജ്യമായി മാറുമെന്നും ഐക്യം പ്രധാനമാണെന്നുമുള്ള പ്രസ്‌താവനയുമായി പ്രധാനമന്ത്രി നരേന്ദ്ര മോദി. അടുത്ത 25 വർഷത്തിനുള്ളിൽ ഇന്ത്യയെ ഒരു വികസിത രാഷ്ട്രമാക്കാൻ ഐക്യവും അഖണ്ഡതയും വളരെ പ്രധാനമാണെന്നും അദ്ദേഹം പറഞ്ഞു. ഗുജറാത്തിലെ വഡ്‌താലിലെ ശ്രീ സ്വാമിനാരായണ മന്ദിറിന്‍റെ 200-ാം വാർഷികാഘോഷങ്ങളുടെ ഭാഗമായി വീഡിയോ കോൺഫറൻസിലൂടെ ഒരു പരിപാടിയെ അഭിസംബോധന ചെയ്യുകയായിരുന്നു പ്രധാനമന്ത്രി.
ഇന്ത്യയെ ഒരു വികസിത രാഷ്ട്രമാക്കാനുള്ള നമ്മുടെ പ്രതിജ്ഞയിൽ പങ്കുചേരാൻ രാജ്യത്തെ എല്ലാ പൗരന്മാരോടും സ്വാമിനാരായണൻ വിഭാഗത്തിലെ സന്യാസിമാരോടും താൻ അഭ്യർഥിക്കുന്നു. നമ്മുടെ ചരിത്രത്തിലെ ഏറ്റവും ദുഷ്‌കരമായ സമയത്താണ് സ്വാമിനാരായൺ നമുക്ക് പുതിയ ശക്തി നൽകിയതെന്നും സ്വാമിനാരായണ മന്ദിറിന്‍റെ 200-ാം വാർഷിക ആഘോഷങ്ങളില്‍ ഓണ്‍ലൈനായി പങ്കെടുത്തുകൊണ്ട് മോദി പറഞ്ഞു.
വിക്‌സിത് ഭാരത് (വികസിത ഇന്ത്യ) എന്ന സ്വപ്‌നം സാക്ഷാത്കരിക്കാൻ യുവാക്കളെ പ്രോത്സാഹിപ്പിക്കേണ്ടത് പ്രധാനമാണെന്നും മോദി ചൂണ്ടിക്കാട്ടി. 'ഞാനും നിങ്ങളും, നമ്മൾ എല്ലാവരും ഒരു വികസിത ഇന്ത്യയ്‌ക്ക് വേണ്ടി ആളുകളെ പ്രോത്സാഹിപ്പിക്കണം. വികസിത ഇന്ത്യ എന്ന സ്വപ്‌നം സാക്ഷാത്കരിക്കാൻ ആളുകളെ, പ്രത്യേകിച്ച് യുവാക്കളെ പ്രോത്സാഹിപ്പിക്കണം' എന്ന് മോദി വ്യക്തമാക്കി. യുവാക്കളെ ലഹരിയിൽ നിന്ന് രക്ഷിക്കാൻ സ്വാമിനാരായണ സമൂഹം എല്ലായ്‌പ്പോഴും ശ്രമിച്ചിരുന്നുവെന്നും, ഇത് തുടരണമെന്നും മോദി ആവശ്യപ്പെട്ടു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.