അമൃത്‌സർ: ഹിമാചൽ പ്രദേശിലെ ഡൽഹൗസിയിൽ പാർക്കിങ്ങിനെച്ചൊല്ലിയുണ്ടായ തര്‍ക്കത്തില്‍ എൻആർഐ ദമ്പതികള്‍ക്ക് മർദനമേറ്റ സംഭവത്തിൽ സീറോ എഫ്ഐആർ ഫയൽ ചെയ്‌ത് പഞ്ചാബ് പൊലീസ്. ആക്രമണത്തിൽ പരിക്കേറ്റ കവാൽജീത് സിങ്ങിനെ കാണാൻ പഞ്ചാബ് എൻആർഐ വകുപ്പ് മന്ത്രി കുൽദീപ് സിങ് ധലിവാൾ ആശുപത്രിയില്‍ എത്തി. കവാൽജീതിൻ്റെ കുടുംബത്തിന് പഞ്ചാബ് സർക്കാരിൽ നിന്ന് സാധ്യമായ എല്ലാ സഹായവും അദ്ദേഹം ഉറപ്പ് നൽകി.
ഹിമാചൽ പ്രദേശ് മുഖ്യമന്ത്രി സിഖ്‌വീന്ദർ സിങ് സുഖുവുമായി സംസാരിച്ചതായി ധലിവാൾ പറഞ്ഞു. ഇത് അങ്ങേയറ്റം ദൗർഭാഗ്യകരമായ സംഭവമാണ്. ഉടൻ തന്നെ എഫ്ഐആർ ഫയൽ ചെയ്യണമായിരുന്നു. ഹിമാചൽ മുഖ്യമന്ത്രിയുമായി ഞാൻ വിഷയം ചർച്ച ചെയ്‌തിട്ടുണ്ടെന്നും ധലിവാൾ അറിയിച്ചു. പ്രതികളെ ഉടൻ കണ്ടെത്തുമെന്നും അവർക്കെതിരെ നടപടിയെടുക്കുമെന്നും മന്ത്രി കൂട്ടിച്ചേർത്തു.
പഞ്ചാബികളായതിൻ്റെ പേരിലാണ് തങ്ങള്‍ ആക്രമിക്കപ്പെട്ടതെന്ന് കവാൽജീതും ഭാര്യയും പിന്നീട് പറഞ്ഞു. ഇവർക്കൊപ്പമുണ്ടായിരുന്ന കവാൽജീതിൻ്റെ സഹോദരനും മർദനമേറ്റിരുന്നു.