കൊല്‍ക്കത്തയിലെ ബലാത്സംഗ കൊലപാതകം: 'പ്രതിഷേധങ്ങളെ അടിച്ചമര്‍ത്താൻ ശ്രമം', ബംഗാള്‍ സര്‍ക്കാരിനെതിരെ കൊല്ലപ്പെട്ട ഡോക്‌ടറുടെ കുടുംബം - Victim Parents aganist bengal govt

കൊൽക്കത്തയിൽ യുവ ഡോക്‌ടർ കൊല്ലപ്പെട്ട സംഭവം. മുഖ്യമന്ത്രി മമത ബാനർജി പ്രതിഷേധത്തെ അടിച്ചമർത്താൻ ശ്രമിക്കുന്നുവെന്ന് പെൺകുട്ടിയുടെ മാതാപിതാക്കൾ പറഞ്ഞു. സിബിഐ അന്വേഷണത്തിലൂടെ സത്യം പുറത്തുവരുമെന്ന് ഞങ്ങൾ പ്രതീക്ഷിക്കുന്നുവെന്ന് അവർ കൂട്ടിച്ചേർത്തു.

കൊൽക്കത്ത:ആർജി കർ മെഡിക്കൽ കോളജിൽ വനിത ഡോക്‌ടർ ബലാത്സംഗത്തിനിരയായി കൊല്ലപ്പെട്ട സംഭവത്തിൽ മുഖ്യമന്ത്രി മമത ബാനർജിക്കെതിരെ പെൺകുട്ടിയുടെ മാതാപിതാക്കൾ. കേസന്വേഷണത്തിൽ മമതയുടേയും കൊൽക്കത്ത പൊലീസിന്‍റെയും ഇടപെടലിൽ അവർ ആശങ്ക പ്രകടിപ്പിച്ചു. മാത്രമല്ല, സംഭവം നടന്ന് മണിക്കൂറുകൾക്ക് ശേഷം, പെൺകുട്ടിയുടെ മൃതദേഹം ആശുപത്രിയിലെ സെമിനാർ ഹാളിൽ നിന്ന് ആദ്യം കണ്ടെത്തിയ അതേ അവസ്ഥയിലായിരുന്നില്ലെന്ന് അവർ ആരോപിച്ചു.

പിജി ഡോക്‌ടർ കൊല്ലപ്പെട്ടതിനെതിരെ മുഖ്യമന്ത്രി മമത ബാനർജി പരസ്യമായി പ്രതിഷേധിച്ചിരുന്നു. എന്നാൽ, പശ്ചിമബംഗാൾ സർക്കാർ പ്രതിഷേധത്തെ അടിച്ചമർത്താൻ ശ്രമിക്കുന്നതായി മാതാപിതാക്കൾ മാധ്യമങ്ങളോട് പറഞ്ഞു. 'സംഭവത്തിൽ ജനങ്ങളുടെ പ്രതിഷേധം ഇല്ലാതാക്കാനും നീതി ലഭിക്കുന്നത് തടയാനുമുള്ള സർക്കാർ ശ്രമം അപലപനീയമാണ്.

ഇതിനെതിരെ ഞങ്ങൾ പ്രതികരിക്കും. സിബിഐ അന്വേഷണത്തിലൂടെ സത്യം പുറത്തുവരുമെന്ന് ഞങ്ങൾ പ്രതീക്ഷിക്കുന്നു' എന്ന് പെൺകുട്ടിയുടെ പിതാവ് പറഞ്ഞു.

സംഭവത്തിൽ പ്രതികളെ എല്ലാം പിടികൂടുമെന്നും എല്ലാവരെയും ശിക്ഷിക്കുമെന്നും മമത ബാനർജി പറഞ്ഞിരുന്നു. മാത്രമല്ല ഭരണകൂടം സ്വമേധയാ തെരുവിലിറങ്ങി പ്രതിഷേധങ്ങൾ നടത്തിയിരുന്നു. പെൺകുട്ടിക്ക് നീതി ലഭിക്കണമെന്ന് ആവശ്യപ്പെട്ട് മമത ബാനർജിയും പ്രതിഷേധങ്ങളിൽ പങ്കെടുത്തിരുന്നു. എന്നാൽ അതേ മമതയാണ് ഇപ്പോൾ ജനങ്ങളെ തടയുന്നതെന്ന് അദ്ദേഹം വ്യക്തമാക്കി.

മകളുടെ മൃതദേഹം കണ്ടെത്തിയ അവസ്ഥയെ കുറിച്ച് ചോദിച്ചപ്പോൾ ആശങ്കാജനകമായ വിവരങ്ങളാണ് മാതാപിതാക്കൾ പങ്കുവെച്ചത്. മകളുടെ മൃതദേഹം സെമിനാർ ഹാളിൽ നിന്ന് ആദ്യം കണ്ടെത്തിയ അതേ അവസ്ഥയിലായിരുന്നില്ലെന്ന് അവർ പറഞ്ഞു. മാത്രമല്ല ആശുപത്രിയിലെത്തിച്ചപ്പോൾ മൃതദേഹം നേരിട്ട് കാണാൻ അനുവദിക്കാത്തതിനാൽ കൂടുതൽ ഒന്നും പറയാൻ കഴിയില്ല എന്ന് പെൺകുട്ടിയുടെ പിതാവ് പറഞ്ഞു.

അതേസമയം, പെൺകുട്ടിയുടെ ശരീരത്തിന്‍റെ ചില ഭാഗങ്ങളിൽ വസ്‌ത്രമുണ്ടായിരുന്നില്ല എന്നാണ് ഞങ്ങളോട് ചിലർ പറഞ്ഞതെന്ന് അമ്മ കൂട്ടിച്ചേർത്തു. മൃതദേഹം സൂക്ഷിച്ച സ്ഥലത്തേക്ക് പ്രവേശനമില്ലാത്തതിനാൽ ഈ വിഷയത്തിൽ കൂടുതൽ സംസാരിക്കാൻ കഴിയില്ലെന്നും സിബിഐ അന്വേഷണം നടക്കുന്നതിനാൽ ഈ ചോദ്യങ്ങൾ ഞങ്ങളോട് ചോദിക്കരുതെന്നും പിതാവ് ആവശ്യപ്പെട്ടു.

കൊല്ലപ്പെട്ട ഡോക്‌ടർ ഡയറിയിൽ എല്ലാ കാര്യങ്ങളും രേഖപ്പെടുത്തുമായിരുന്നെന്ന് അദ്ദേഹം പറഞ്ഞു. ഡയറിയിലെ എല്ലാ പേജും ഇപ്പോഴുമുണ്ടോ എന്ന ചോദ്യത്തിന് 'വിഷയം സബ് ജുഡീഷ്യൽ ആയതിനാൽ എനിക്ക് പ്രതികരിക്കാൻ കഴിയില്ല, ഞങ്ങൾക്ക് അറിവുള്ള കാര്യങ്ങൾ സിബിഐയെ അറിയിക്കും' എന്നായിരുന്നു അദ്ദേഹത്തിന്‍റെ പ്രതികരണം. കീറിപ്പോയ പേജുകളിലൊന്നിന്‍റെ ചിത്രം തന്‍റെ കൈവശം ഉണ്ടെന്നും അദ്ദേഹം പരാമർശിച്ചു, എന്നാൽ അതിന്‍റെ ഉള്ളടക്കം അദ്ദേഹം വെളിപ്പെടുത്തിയില്ല. അത് അന്വേഷകരുമായി പങ്കിടുമെന്ന് അറിയിച്ചു.

ഞങ്ങളുടെ മകളുടെ സ്വപ്‌നങ്ങൾ തകർത്തവർക്ക് കഠിനമായ ശിക്ഷ ലഭിക്കണമെന്നാണ് ആഗ്രഹിക്കുന്നത്. മാത്രമല്ല സംസ്ഥാനത്തും രാജ്യത്തുമായി ഞങ്ങൾക്കൊപ്പം നിൽക്കുന്ന ദശലക്ഷക്കണക്കിന് ജനങ്ങളോട് നന്ദി സൂചിപ്പിക്കുന്നു എന്ന് പെൺകുട്ടിയുടെ പിതാവ് പറഞ്ഞു.

ഓഗസ്‌റ്റ് 9ന് രാത്രി 10.53 ന് ആശുപത്രിയിൽ നിന്ന് തങ്ങൾക്ക് ഒരു കോൾ ലഭിച്ചു. 12:30 ന് ആശുപത്രിയിൽ എത്തിയെങ്കിലും 3 മണിക്ക് മാത്രമാണ് മകളുടെ മൃതദേഹം കാണാൻ അനുവദിച്ചതെന്ന് അമ്മ പറഞ്ഞു. ആ സമയം മണിക്കൂറുകളോളം ചെസ്‌റ്റ് മെഡിസിൻ വിഭാഗത്തിൽ കാത്തിരിക്കുകയായിരുന്നെന്നും അവർ കൂട്ടിച്ചേർത്തു.