ന്യൂഡല്ഹി: ഗുണ്ടാത്തലവനായ കല ജഥേഡി എന്ന സന്ദീപും ലോഡി ഡോണായ അനുരാധ ചൗധരിയും വിവാഹിതരായി. കനത്ത പൊലീസ് സുരക്ഷയിലാണ് വിവാഹം നടന്നത്. ഡല്ഹിയിലെ ദ്വാരകയിലെ ബാങ്ക്വാറ്റ് ഹാളില് വച്ചായിരുന്നു വിവാഹം.
ഹരിയാനയിലെ സോനിപത് സ്വദേശിയായ അനുരാധ ചൗധരി ഇന്ന് (മാര്ച്ച് 12) രാവിലെയായോടെയാണ് ബാങ്ക്വാറ്റ് ഹാളില് എത്തിയത്. ബാങ്ക്വറ്റ് ഹാളിലെ സന്തോഷ് ഗാര്ഡനിലും പരിസരത്തും പൊലീസ് കനത്ത സുരക്ഷയാണ് ഒരുക്കിയിരുന്നത്. രാവിലെ 10 മണി മുതല് വൈകിട്ട് 4 മണി വരെയാണ് വിവാഹ ചടങ്ങുകള് നടക്കുക.
വിവിധ കേസുകളില് തടവിലായിരുന്ന കല ജഥേഡിയ്ക്ക് വിവാഹത്തിനായി കോടതി പരോള് അനുവദിക്കുകയായിരുന്നു. വിവിധ കേസുകളില് ഉള്പ്പെട്ട് തടവില് കഴിഞ്ഞിരുന്ന കല ജഥേഡിയുടെ തലയ്ക്ക് നേരത്തെ 7 ലക്ഷം രൂപ പാരിതോഷികം പ്രഖ്യാപിച്ചിരുന്നു. എന്നാല് പിന്നീട് ജഥേഡിയെ കണ്ടെത്തുകയും അറസ്റ്റ് ചെയ്യുകയുമായിരുന്നു.
വധുവായ അനുരാധ ചൗധരിയും നിവധി കേസുകളില് കുറ്റവാളിയായിരുന്നു. 2019ലാണ് ഇരുവരും തമ്മില് കണ്ടുമുട്ടുന്നതും പ്രണയത്തിലാകുന്നതും. തുടര്ന്ന് വിവിധ കുറ്റകൃത്യങ്ങളില് പങ്കാളികളായ ഇരുവരെയും 2021ല് പൊലീസ് അറസ്റ്റ് ചെയ്തു. പൊലീസ് ഇരുവരെയും ജയിലിലടച്ചു. തുടര്ന്ന് അനുരാധ ചൗധരി ജാമ്യപേക്ഷ സമര്പ്പിക്കുകയും ജാമ്യം അനുവദിക്കുകയും ചെയ്തു. എന്നാല് കല ജഥേഡി സമര്പ്പിച്ച ജാമ്യ അപേക്ഷ കോടതി തള്ളുകയുമായിരുന്നു.