ലഖ്‌നൗ: രാജ്യത്തിന്‍റെ വിവിധ ഭാഗങ്ങളില്‍ പ്രകൃതി ദുരന്തങ്ങളില്‍ നഷ്‌ടമായ ജീവനും സ്വത്തും വച്ച് ബിജെപിയും കോണ്‍ഗ്രസും രാഷ്‌ട്രീയം കളിക്കുന്നുവെന്ന ആരോപണവുമായി ബിഎസ്‌പി അധ്യക്ഷ മായാവതി രംഗത്ത്. അസന്തുലിതമായ വികസന പ്രവൃത്തികളും അത് മൂലമുണ്ടായ പരിസ്ഥിതി നാശങ്ങളും പരിശോധിക്കേണ്ടതുണ്ടെന്നും അവര്‍ ചൂണ്ടിക്കാട്ടി.
കോണ്‍ഗ്രസും ബിജെപിയും നയിക്കുന്ന സര്‍ക്കാരുകളാണ് ഏറെയും അസന്തുലിതമായ വികസന പ്രവൃത്തികള്‍ നടത്തിയിരിക്കുന്നതെന്നും മായാവതി എക്‌സില്‍ കുറിച്ചു. പ്രകൃതി ദുരന്തങ്ങളില്‍ കുറ്റപ്പെടുത്തല്‍ പാടില്ലെന്നും അവര്‍ കൂട്ടിച്ചേര്‍ത്തു. പാര്‍ലമെന്‍റിന് അകത്തും പുറത്തും ബിജെപിയും കോണ്‍ഗ്രസും നടത്തുന്ന രാഷ്‌ട്രീയം പൊതു-രാഷ്‌ട്രതാത്പര്യങ്ങളെ ഹനിക്കുന്നതാണ്. ഇത് വേദനിപ്പിക്കുന്നതാണെന്നും മായാവതി പറഞ്ഞു.