ഹരിദ്വാർ (ഉത്തരാഖണ്ഡ്): പൂര്‍വ്വീകരുടെ ചിതാഭസ്‌മം ഗംഗാ നദിയിലൊഴുക്കി പാക്കിസ്ഥാനിൽ നിന്നുള്ള 223 ഹിന്ദു തീർത്ഥാടകർ. ഹരിദ്വാറിലെ അസ്‌തി പ്രവാഹ ഘട്ടിൽ വച്ചാണ് പാകിസ്ഥാനിൽ നിന്നെത്തിയ തീർത്ഥാടക സംഘത്തിലുള്ളവർ ചിതാഭസ്‌മം ഗംഗയിൽ നിമജ്ജനം ചെയ്‌തത്‌. സിന്ധ് സമുദായത്തിൽ പെട്ടവരാണ് ഇവരെല്ലാം.
ഗംഗയിൽ ഒഴുക്കാൻ വേണ്ടി വർഷങ്ങളോളം സൂക്ഷിച്ചുവച്ചിരുന്ന ചിതാഭസ്‌മമാണ് ഇപ്പോൾ നിമജ്ജനം ചെയ്‌തത്‌. ഞായറാഴ്‌ച നടന്ന ചടങ്ങില്‍ ചിതാഭസ്‌മം ഗംഗയിൽ നിമജ്ജനം ചെയ്‌തതോടെ പരേതാത്‌മാക്കൾക്ക് മോക്ഷം ലഭിച്ചതായി ചടങ്ങിൽ സംസാരിച്ച ഷദാനി ദർബാറിലെ സ്വാമി യുധിഷ്‌ടിർ ലാൽ പറഞ്ഞു.