ജിയോയും എയര്‍ടെലും കീഴടക്കുന്ന 4 ജി വിപണിയിലേക്ക് പുതിയ തന്ത്രങ്ങളുമായി രത്തന്‍ടാറ്റ. ഇദ്ദേഹത്തിന്‍റെ ടാറ്റ കൺസൾട്ടൻസി സർവീസസ് (ടിസിഎസ്) ബി.എസ്.എന്‍.എലുമായി 15,000 കോടി രൂപയുടെ കരാറിലേക്കെത്തിയ വാര്‍ത്തകളില്‍ ശുഭപ്രതീക്ഷയിലാണ് മൊബെെല്‍ ഉപഭോക്താക്കള്‍. ഇന്ത്യയിലെ 1,000 ഗ്രാമങ്ങളിലേക്ക് 4ജി ഇന്‍റർനെറ്റ് സേവനങ്ങൾ ലഭ്യമാക്കാനാണ് പദ്ധതി.
ഇതോടെ രാജ്യത്തെ ടെലികോം മത്സരരംഗത്ത് സുപ്രധാന പങ്കുവഹിക്കാന്‍ ബി.എസ്.എന്‍.എലിന് സാധിക്കും. അടുത്തിടെ ജിയോ, എയര്‍ടെല്‍, വി.ഐ (വോഡഫോണ്‍, ഐഡിയ) എന്നീ നെറ്റ് വര്‍ക്കുകള്‍ തങ്ങളുടെ പ്ലാനുകളില്‍ വിലവര്‍ദ്ധനവ് പ്രഖ്യാപിച്ചിരുന്നു. ഇതു കോടിക്കണക്കിന് ഉപഭോക്താക്കള്‍ക്ക് കനത്ത തിരിച്ചടിയായി.
ഇതോടെ നിരവധി ഉപഭോക്താക്കള്‍ ബി.എസ്.എന്‍.എലിലേക്ക് പോര്‍ട്ട് ചെയ്‌തതായി റിപ്പോര്‍ട്ടുണ്ടായിരുന്നു. നിലവിലെ കരാറിന്‍റെ ഭാഗമായി ടി.സി.എസ് ഇന്ത്യയിലെ നാല് മേഖലകളിൽ വലിയ ഡാറ്റാ സെന്‍ററുകൾ സ്ഥാപിക്കുന്നതായി കമ്പനി സി.ഒ.ഒ വ്യക്തമാക്കി. 4 ജി സേവനം വിപുലീകരിക്കാന്‍ ഇവ സഹായിക്കും.