കണ്ണുകളിലൂടെ കഥ പറയുന്ന നടനാണ് ഫഹദ് ഫാസിൽ. അരങ്ങേറ്റ ചിത്രത്തിൽ ഫഹദിന് നിരവധി പരിഹാസങ്ങൾ നേരിടേണ്ടി വന്നെങ്കിലും ഇതിനെല്ലാം മറുപടിയെന്നോണമായിരുന്നു താരത്തിൻ്റെ തിരിച്ചുവരവ്. ഏറ്റവും പുതിയ ചിത്രമായ കുമ്പളങ്ങി നൈറ്റ്സിലും ഫഹദ് പതിവ് തെറ്റിച്ചില്ല. ഷമ്മി എന്ന 'സൈക്കോ' കഥാപാത്രമായി ഫഹദ് കയ്യടി നേടി. ആണധികാരത്തിൻ്റെ എല്ലാ ഭാവങ്ങളും ഉള്‍ക്കൊള്ളുന്ന കഥാപാത്രമാണ് ഷമ്മി.
കഴിഞ്ഞ ദിവസം കൊച്ചിയില്‍ ഒരു സ്വകാര്യചടങ്ങില്‍ ഫഹദ് ഫാസില്‍ അതിഥിയായി എത്തിയിരുന്നു. പരിപാടി ഉദ്ഘാടനം ചെയ്തതിന് ശേഷം കുമ്പളങ്ങി നൈറ്റ്സിൽ തനിക്ക് കയ്യടി നേടിത്തന്ന ഡയലോഗ് ഫഹദ് വീണ്ടും പറഞ്ഞു. 'ഷമ്മി ഹീറോയാടാ' എന്ന് താരം പറഞ്ഞപ്പോൾ ആവേശത്തോടെയായിരുന്നു ആ വാക്കുകള്‍ ആരാധകര്‍ ഏറ്റെടുത്തത്. ഇതിൻ്റെ വീഡിയോയും സോഷ്യൽ മീഡിയയിൽ തരംഗമായിക്കഴിഞ്ഞു.