ಐಟಿ ವಲಯದಲ್ಲಿ ಕನ್ನಡ ಹೆಚ್ಚು ಬಳಕೆಯಾಗಲಿ: ನಿರ್ದೇಶಕ ಯೋಗರಾಜ್​ ಭಟ್ - WALKATHON IN BENGALURU

ಬೆಂಗಳೂರು: ನಾವೆಲ್ಲರೂ ಪರಿಣಾಮಕಾರಿಯಾಗಿ ಬಳಸಿದರಷ್ಟೇ ಕನ್ನಡ ಉಳಿಯಲು ಸಾಧ್ಯ. ಇದಕ್ಕಾಗಿ ಐಟಿ ವಲಯದಲ್ಲಿ ಹೆಚ್ಚು ಕನ್ನಡ ಬಳಕೆಯಾಗಬೇಕು ಎಂದು ನಿರ್ದೇಶಕ ಯೋಗರಾಜ್​ ಭಟ್​ ಹೇಳಿದರು.

‘ನಡೆ ಕನ್ನಡ, ನುಡಿ ಕನ್ನಡ ಹಬ್ಬ–2024’ರ ಭಾಗವಾಗಿ ನಮ್ಮ ಸಂಸತಿಯನ್ನು ಸಂಭ್ರಮಿಸೋಣ, ನಮ್ಮ ಕನ್ನಡಕ್ಕಾಗಿ ನಡೆಯೋಣ ಎನ್ನುವ ಧ್ಯೇಯ ವಾಕ್ಯದೊಂದಿಗೆ ಕಾರ್ಪೊರೇಟ್​ ಕನ್ನಡಿಗರು ಸಂಸ್ಥೆ, ಜಯನಗರದ 2ನೇ ಬ್ಲಾಕ್​ನಲ್ಲಿ ಭಾನುವಾರ ಆಯೋಜಿಸಿದ್ದ 'ಕನ್ನಡಕ್ಕಾಗಿ ನಡಿಗೆ' ವಾಕಥಾನ್​ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಬೆಂಗಳೂರು ನಗರ ದೇಶದ ಐಟಿ ರಾಜಧಾನಿಯಾಗಲು ಇಲ್ಲಿನ ಕಾರ್ಪೊರೇಟ್​ ಕನ್ನಡಿಗರ ಕೊಡುಗೆ ಬಹಳಷ್ಟಿದೆ. ವಿಶ್ವದಾದ್ಯಂತ ಕನ್ನಡ ಪಸರಿಸಲು ಸಿಲಿಕಾನ್​ ಸಿಟಿಯ ವಾಸಿಗಳು ಹಾಗೂ ತಂತ್ರಜ್ಞಾನ ಕ್ಷೇತ್ರದ ಕನ್ನಡ ಉದ್ಯೋಗಿಗಳು ಸಾಕಷ್ಟು ಶ್ರಮಿಸಿದ್ದಾರೆ. ಕನ್ನಡದ ಅಸ್ಮಿತೆ ಉಳಿಸುವಲ್ಲಿ ಕಾರ್ಪೊರೇಟ್​ ಕನ್ನಡಿಗರು ಕೊಡುಗೆಯೂ ಹೆಚ್ಚಿದೆ ಎಂದರು.

ವಾಕಥಾನ್​ನಲ್ಲಿ ಸಾವಿರಕ್ಕೂ ಅಧಿಕ ಐಟಿ-ಬಿಟಿ ಸೇರಿ ಇತರ ವಲಯದ ಕಾರ್ಪೊರೇಟ್​ ಕನ್ನಡಿಗರು ಪಾಲ್ಗೊಂಡಿದ್ದರು. ಈ ಸಂದರ್ಭದಲ್ಲಿ ವಿಜೃಂಭಣೆಯಿಂದ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು ಕೂಡ ನಡೆದವು. ಶಾಸಕ ಉದಯ್​ ಬಿ.ಗರುಡಾಚಾರ್​, ದಕ್ಷಿಣ ಸಂಚಾರ ವಿಭಾಗ ಉಪ ಪೊಲೀಸ್​ ಆಯುಕ್ತ ಶಿವಪ್ರಕಾಶ್​ ದೇವರಾಜು, ನಟರಾದ ರಾಕೇಶ್​ ಮಯ್ಯ, ಸಂಜನ್​ ಕಜೆ, ಕಾರ್ಪೊರೇಟ್​ ಕನ್ನಡಿಗರ ವೇದಿಕೆಯ ನಿತೇಶ್​ ಮೂರ್ತಿ, ಎಸ್​.ಜಯರಾಮ್​, ಗೋವಿಂದಯ್ಯ, ಅಚ್ಚುತ್​ಗೌಡ ಮತ್ತಿತರರಿದ್ದರು.

ಇದನ್ನೂ ಓದಿ: ಬೆಂಗಳೂರು: ಇತಿಹಾಸ ಪ್ರಸಿದ್ಧ ಕಡಲೆಕಾಯಿ ಪರಿಷೆಗೆ ನಾಳೆ ಚಾಲನೆ, ಖರೀದಿಗೆ ಇಂದೇ ಮುಗಿಬಿದ್ದ ಜನ