ಗ್ಯಾಲಕ್ಸಿ ಝಡ್ ಫೋಲ್ಡ್ 6, ಫ್ಲಿಪ್ 6 ಜುಲೈ 10ರಂದು ಬಿಡುಗಡೆ: ಮುಂಗಡ ಬುಕ್ಕಿಂಗ್​​ ಆರಂಭ - Samsung Galaxy Launch

ಗ್ಯಾಲಕ್ಸಿ ಝಡ್ ಫೋಲ್ಡ್ 6, ಫ್ಲಿಪ್ 6 ಜುಲೈ 10ರಂದು ಬಿಡುಗಡೆ: ಮುಂಗಡ ಬುಕ್ಕಿಂಗ್​​ ಆರಂಭ

ನವದೆಹಲಿ:ಸ್ಯಾಮ್ ಸಂಗ್ ತನ್ನ ಮುಂದಿನ ಶ್ರೇಣಿಯ ಮಡಚಬಹುದಾದ ಸ್ಮಾರ್ಟ್​ಫೋನ್​ಗಳಾದ ಗ್ಯಾಲಕ್ಸಿ ಝಡ್ ಫೋಲ್ಡ್ 6 ಮತ್ತು ಗ್ಯಾಲಕ್ಸಿ ಝಡ್ ಫ್ಲಿಪ್ 6 ಗಳ ಮುಂಗಡ ಬುಕ್ಕಿಂಗ್​​​ ಅನ್ನು (pre-reservations) ಪ್ರಾರಂಭಿಸಿದೆ. ಈ ಅತ್ಯಾಧುನಿಕ ಸ್ಮಾರ್ಟ್​ಪೋನ್​ಗಳು ಜುಲೈ 10 ರಂದು ಪ್ಯಾರಿಸ್ ನಲ್ಲಿ ನಡೆಯಲಿರುವ ಗ್ಯಾಲಕ್ಸಿ ಅನ್ ಪ್ಯಾಕ್ಡ್ ಈವೆಂಟ್​ನಲ್ಲಿ ಜಾಗತಿಕವಾಗಿ ಬಿಡುಗಡೆಯಾಗಲಿವೆ. ಈ ಫೋನ್​ಗಳನ್ನು ಎಲ್ಲರಿಗಿಂತ ಮೊದಲು ಕೊಳ್ಳಲು ಬಯಸುವವರು Samsung ಡಾಟ್ com, ಸ್ಯಾಮ್ ಸಂಗ್ ಎಕ್ಸ್ ಕ್ಲೂಸಿವ್ ಸ್ಟೋರ್​ಗಳು, Amazon ಡಾಟ್ in, Flipkart ಡಾಟ್ com ಮತ್ತು ಭಾರತದಾದ್ಯಂತದ ಪ್ರಮುಖ ಚಿಲ್ಲರೆ ಮಳಿಗೆಗಳಲ್ಲಿ ಇವನ್ನು ಪ್ರಿ-ರಿಸರ್ವ್ ಮಾಡಬಹುದು.

ಪ್ರಿ-ರಿಸರ್ವ್ ಮಾಡುವುದು ಹೇಗೆ? : ಗ್ರಾಹಕರು 1,999 ರೂ.ಗಳ ಟೋಕನ್ ಮೊತ್ತವನ್ನು ಪಾವತಿಸುವ ಮೂಲಕ ಹೊಸ ಫೊಲ್ಡಬಲ್ ಫೋನ್​ ಅನ್ನು ಮುಂಚಿತವಾಗಿ ಕಾಯ್ದಿರಿಸಬಹುದು. ಈ ಮುಂಗಡ ಬುಕಿಂಗ್ ಸಮಯಾವಧಿ ಜೂನ್ 26, 2024 ರಂದು ಬೆಳಗ್ಗೆ 10:00 ಗಂಟೆಗೆ ಪ್ರಾರಂಭವಾಗುತ್ತದೆ ಮತ್ತು ಜುಲೈ 10, 2024 ರಂದು ರಾತ್ರಿ 11:59 ಕ್ಕೆ ಕೊನೆಗೊಳ್ಳುತ್ತದೆ.

ಆರಂಭಿಕ ಕೊಳ್ಳುಗರಿಗೆ ವಿಶೇಷ ಆಫರ್: ಮುಂಗಡ ಬುಕ್ಕಿಂಗ್​​ ಮಾಡುವ ಗ್ರಾಹಕರು ತಮ್ಮ ಮೆಚ್ಚಿನ ಗ್ಯಾಲಕ್ಸಿ ಸ್ಮಾರ್ಟ್​ಫೋನ್​ ಅನ್ನು ಎಲ್ಲರಿಗಿಂತ ಮೊದಲಿಗೆ ಪಡೆಯುವುದು ಮಾತ್ರವಲ್ಲದೇ ಇನ್ನೂ ಹಲವಾರು ಪ್ರಯೋಜನಗಳನ್ನು ಪಡೆಯುತ್ತಾರೆ. ಪ್ರಿ-ರಿಸರ್ವ್ ಮಾಡಿ ಹೆಚ್ಚುವರಿಯಾಗಿ 8,999 ರೂ.ಗಳವರೆಗೆ ಆಫರ್​ಗಳನ್ನು ಪಡೆಯಬಹುದು ಎಂದು ಸ್ಯಾಮ್ಸಂಗ್ ಹೇಳಿದೆ.

ಆಫರ್​ನಲ್ಲಿ ಇರುವುದೇನು?: ಮುಂಗಡ ಬುಕ್ಕಿಂಗ್​ ಮಾಡುವ ಗ್ರಾಹಕರಿಗೆ samsung ಡಾಟ್ com ಅಥವಾ ಸ್ಯಾಮ್ ಸಂಗ್ ಶಾಪ್ ಅಪ್ಲಿಕೇಶನ್​​ನಲ್ಲಿ ಖರ್ಚು ಮಾಡಬಹುದಾದ 7,000 ರೂ.ಗಳವರೆಗೆ ಇ-ವೋಚರ್ ಸಿಗುತ್ತದೆ. ಮುಖ್ಯ ಉತ್ಪನ್ನವನ್ನು ಕಾರ್ಟ್​ಗೆ ಸೇರಿಸಿದ ನಂತರ ಮತ್ತು ಚೆಕ್ ಔಟ್ ನಲ್ಲಿ ಇ-ವೋಚರ್ ಅನ್ನು ಅನ್ವಯಿಸಿದ ನಂತರ ಈ ಪ್ರಯೋಜನವು ಸಿಗುತ್ತದೆ. ಅಲ್ಲದೇ ಪ್ರಿ-ರಿಸರ್ವ್​​ಗಾಗಿ ಪಾವತಿಸಿದ 1,999 ರೂ.ಗಳನ್ನು ಹೊಸ ಗ್ಯಾಲಕ್ಸಿ ಸಾಧನದ ಖರೀದಿ ಮೌಲ್ಯಕ್ಕೆ ಸರಿಹೊಂದಿಸಲಾಗುತ್ತದೆ.

ಭಾರತ ಮತ್ತು ಇತರ ಜಾಗತಿಕ ಮಾರುಕಟ್ಟೆಗಳಲ್ಲಿ ಏಕಕಾಲದಲ್ಲಿ ತನ್ನ ಪ್ರಮುಖ ಸಾಧನಗಳನ್ನು ಬಿಡುಗಡೆ ಮಾಡುವ ಸ್ಯಾಮ್ ಸಂಗ್​​ನ ಕಾರ್ಯತಂತ್ರವು ವಿಶ್ವದ ಎರಡನೇ ಅತಿದೊಡ್ಡ ಸ್ಮಾರ್ಟ್​ಫೋನ್ ಮಾರುಕಟ್ಟೆಯಾಗಿರುವ ಭಾರತದ ಮೇಲೆ ಅದರ ಬದ್ಧತೆಯನ್ನು ಒತ್ತಿಹೇಳುತ್ತದೆ. ಇತ್ತೀಚಿನ ವರ್ಷಗಳಲ್ಲಿ, ಸ್ಯಾಮ್ ಸಂಗ್ ಫೋಲ್ಡ್ ಮತ್ತು ಫ್ಲಿಪ್ ಸರಣಿ ಸೇರಿದಂತೆ ತನ್ನ ಮಾರ್ಕ್ಯೂ ಸಾಧನಗಳನ್ನು ಜಾಗತಿಕ ಬಿಡುಗಡೆಯೊಂದಿಗೆ ಭಾರತದಲ್ಲಿಯೂ ಏಕಕಾಲದಲ್ಲಿ ಕಂಪನಿ ಬಿಡುಗಡೆ ಮಾಡಿರುವುದು ವಿಶೇಷ.

ಇದನ್ನೂ ಓದಿ :ಉಪಗ್ರಹ ತಪಾಸಣೆ: ಆಸ್ಟ್ರೇಲಿಯಾದ ಸ್ಪೇಸ್ ಮೆಷಿನ್ಸ್​, ಇಸ್ರೊ ಮಧ್ಯೆ ಒಡಂಬಡಿಕೆ - Australia India Space Research