ಮಹಿಳಾ ದಸರಾ : ಫ್ಯಾಷನ್ ಶೋನಲ್ಲಿ ಹೆಜ್ಜೆಹಾಕಿ ರಂಜಿಸಿದ ಕಾಲೇಜು ವಿದ್ಯಾರ್ಥಿನಿಯರು - Womens Dasara

ಮೈಸೂರಿನ ಜೆ. ಕೆ ಮೈದಾನದ ಸಭಾಂಗಣದಲ್ಲಿ ಆಯೋಜಿಸಿದ್ದ ಫ್ಯಾಷನ್ ಶೋನಲ್ಲಿ ವಿವಿಧ ಕಾಲೇಜಿನ ವಿದ್ಯಾರ್ಥಿನಿಯರು ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಮೈಸೂರು : ಸಾಂಪ್ರದಾಯಿಕ ಉಡುಗೆ-ತೊಡುಗೆಗಳನ್ನು ಧರಿಸಿ ನಾನಾ ಕಾಲೇಜಿನ ವಿದ್ಯಾರ್ಥಿನಿಯರು ಫ್ಯಾಷನ್ ಶೋನಲ್ಲಿ ಹೆಜ್ಜೆಹಾಕುವ ಮೂಲಕ ಮಿಂಚಿದರು.

ಮಹಿಳಾ ಮತ್ತು ಮಕ್ಕಳ ದಸರಾ ಉಪಸಮಿತಿ ವತಿಯಿಂದ ಭಾನುವಾರ ಜೆ. ಕೆ ಮೈದಾನದಲ್ಲಿರುವ ಸಭಾಂಗಣದಲ್ಲಿ ಆಯೋಜಿಸಿದ್ದ ಫ್ಯಾಷನ್ ಶೋನಲ್ಲಿ ದೇಶಿಯ ಸಾಂಪ್ರದಾಯಿಕ ಬಟ್ಟೆ ಧರಿಸಿ, ಕ್ಯಾಟ್ ವಾಕ್​ ಮೂಲಕ ವೇದಿಕೆ ಮೇಲೆ ವಿದ್ಯಾರ್ಥಿನಿಯರು ಹೆಜ್ಜೆ ಹಾಕಿದರು.

ಮಹಾರಾಣಿ ಕಾಲೇಜು, ಜೆಎಸ್​ಎಸ್ ಮಹಿಳಾ ಕಾಲೇಜು, ಎಂಐಎಫ್​ಟಿ, ಡ್ರೀಮ್ ಜೋನ್ ಕಾಲೇಜಿನ ವಿದ್ಯಾರ್ಥಿನಿಯರು, ಫ್ಯಾಷನ್ ಶೋನಲ್ಲಿ ಹೆಜ್ಜೆ ಹಾಕಿ, ಸಭಿಕರನ್ನು ರಂಜಿಸಿದರು. ಫ್ಯಾಷನ್ ಷೋನಲ್ಲಿ ಡ್ರೀಮ್ ಜೋನ್ ಕಾಲೇಜಿನ ವಿದ್ಯಾರ್ಥಿನಿಯರು ಪ್ರಥಮ ಸ್ಥಾನ, ಎಂಐಎಫ್​ಟಿ ಕಾಲೇಜು ದ್ವಿತೀಯ ಸ್ಥಾನಗಳಿಸಿತು. ಪಿರಿಯಾಪಟ್ಟಣ ತಾಲೂಕಿನ ಮಹಿಳೆಯರು, ಕಾಡಿನ ಸಾಂಪ್ರದಾಯಿಕ ನೃತ್ಯ ಪ್ರದರ್ಶನ ಮಾಡಿದರು.

ಇದಕ್ಕೂ ಮುನ್ನ ಮಹಿಳಾ ಉದ್ಯಮಿ ಛಾಯಾ ನಂಜಪ್ಪ ಅವರು, ಗ್ರಾಮೀಣ ಭಾಗದಲ್ಲಿ ಉತ್ಪನ್ನಗಳನ್ನು ತಯಾರಿಸಿ ಉದ್ಯಮಿಯಾಗುವ ಬಗ್ಗೆ ಮಹಿಳೆಯರೊಂದಿಗೆ ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿ, ಜೀವನದಲ್ಲಿ ಕಷ್ಟ ಎಂದು ಕುಗ್ಗ ಬೇಡಿ. ಸವಾಲುಗಳನ್ನು ಎದುರಿಸಿದರೆ ಸುಂದರ ಜೀವನ ಕಟ್ಟಿಕೊಳ್ಳಬಹುದು ಎಂದು ತಮ್ಮ ಕಷ್ಟದ ಜೀವನವನ್ನ ನೆನಪಿಸಿಕೊಂಡರು.

ಯಶಸ್ವಿ ಉದ್ಯಮಿಗಳಾಗಲು ಸಾಧ್ಯ : ಗ್ರಾಮೀಣ ಭಾಗದಲ್ಲಿ ಉತ್ತಮ ಗುಣಮಟ್ಟದ ಜೇನುತುಪ್ಪ ಮಾರಾಟ ಮಾಡುವ, ನಮನ್ ಸಂಸ್ಥೆ ಕಟ್ಟಿ ಬೆಳೆಸಲು ತಾವು ಪಟ್ಟ ಕಷ್ಟಗಳು, ಆರ್ಥಿಕತೆ ಸಂಕಷ್ಟಗಳನ್ನು ವಿವರಿಸಿದರು. ಏನೇ ಕಷ್ಟ ಎದುರಾದರೂ ಎಂದಿಗೂ ಎದೆಗುಂದಬಾರದು, ಪ್ರತಿದಿನ ಹೊಸ ಆಲೋಚನೆಯೊಂದಿಗೆ ಛಲದಿಂದ ಮುಂದುವರೆದರೆ ಯಶಸ್ವಿ ಉದ್ಯಮಿಗಳಾಗಲು ಸಾಧ್ಯ ಎಂದು ತಿಳಿಸಿದರು.

ಹೋರಾಟ ಮಾಡಿ ಗೆದ್ದು ತೋರಿಸಬೇಕು : ಮಹಿಳೆಯರು ಉದ್ಯಮ ಆರಂಭಿಸಿದಾಗ, ಸಮಾಜವು ಕೆಲವೊಮ್ಮೆ ಉದ್ಯಮ ಬೆಳೆಸಲು ಸಾಧ್ಯವೇ? ಎಂದು ಅನುಮಾನ ಪಡುತ್ತ, ಅವಮಾನವನ್ನು ಕೂಡ ಮಾಡುತ್ತಾರೆ. ಅದಕ್ಕೆಲ್ಲ ಗಮನ ಹರಿಸದೇ, ನಾವು ಉದ್ಯಮಿಯಾಗಲು ಹೋರಾಟ ಮಾಡಿ ಗೆದ್ದು ತೋರಿಸಬೇಕು ಎಂದರು.

ಉಮ್ಮತತ್ ಜಾನಪದ ಕಲಾವಿದೆ ಡಾ. ರಾಣಿ ಮಾಚಯ್ಯ ಸಂವಾದದಲ್ಲಿ ಮಾತನಾಡಿ, ಉಮ್ಮತತ್ ಜಾನಪದ ಕಲೆಯಲ್ಲಿ ತಮಗಿರುವ ಆಸಕ್ತಿ, ಕಷ್ಟದ ನಡುವೆ ಬೆಳೆದ ರೀತಿಯನ್ನು ವಿವರಿಸಿ, 'ಸಾಧನೆ ಮಾಡಲು ಮಹಿಳೆಯರು ಹಿಂಜರಿಯದೇ ಮುನ್ನಗ್ಗಬೇಕು' ಎಂದು ಸಲಹೆ ನೀಡಿದರು.

ಇದನ್ನೂ ಓದಿ :ಮಿಸೆಸ್ ಇಂಡಿಯಾ ಕರ್ನಾಟಕಕ್ಕೆ ಆಯ್ಕೆಯಾದ ಮಂಗಳೂರಿನ ಮಹಿಳಾ ಡಾಕ್ಟರ್, ಉದ್ಯಮಿ - MRS INDIA KARNATAKA MANGALURU 2024