ಮಂಡ್ಯ 'ಪಯಣ'ದಲ್ಲಿ ವಿಂಟೇಜ್​ ಕಾರುಗಳದ್ದೇ ಹವಾ; ನೀವೂ ಭೇಟಿ ನೀಡಿ ಈ ಮ್ಯೂಸಿಯಂಗೆ - Payana Vintage Museum

ಮಂಡ್ಯದ ಶ್ರೀರಂಗಪಟ್ಟಣದ ಹೊರ ವಲಯದಲ್ಲಿ ವಿಂಟೇಜ್ ಮ್ಯೂಸಿಯಂ ಇದ್ದು ಕಾರು ಪ್ರಿಯರನ್ನು ಮತ್ತೆ ಹಳೇ ಕಾಲಕ್ಕೆ ಸೆಳೆಯುತ್ತಿದೆ.

ಮಂಡ್ಯ: ಸಕ್ಕರೆನಾಡಲ್ಲಿ ಪ್ರವಾಸಿ ತಾಣಗಳಿಗೇನು ಕೊರತೆ ಇಲ್ಲ. ಕೆ.ಆರ್​.ಎಸ್​​ನ ಬೃಂದಾವನ, ರಂಗನತಿಟ್ಟು ಪಕ್ಷಿಧಾಮ ವಿಶ್ವ ಪ್ರಸಿದ್ಧಿ ಸ್ಥಾನ ಪಡೆದಿದ್ದರೆ ಇವುಗಳ ಜೊತೆಗೆ ಇದೀಗ ಮತ್ತೊಂದು ತಾಣ ಜಿಲ್ಲೆಯಲ್ಲಿ ಪ್ರವಾಸಿಗರ ಹಾಟ್​ಸ್ಪಾಟ್ ಆಗಿದ್ದು, ಪ್ರವಾಸಿಗರ ಕಣ್ಮನ ತಣಿಸುತ್ತಿದೆ. ಯಾವುದು ಆ ಪ್ರವಾಸಿ ತಾಣ? ಇಲ್ಲಿದೆ ಕಂಪ್ಲೀಟ್​ ಡೀಟೆಲ್ಸ್​.

ಶ್ರೀರಂಗಪಟ್ಟಣದ ಹೊರ ವಲಯದ ಮೈಸೂರು-ಬೆಂಗಳೂರು ದಶಪಥ ಹೆದ್ದಾರಿ ಪಕ್ಕದಲ್ಲಿರುವ ಪಯಣ ಹೆಸರಿನ ವಿಂಟೇಜ್ ಮ್ಯೂಸಿಯಂ ಎಲ್ಲರನ್ನೂ ಕೈ ಬೀಸಿ ಕರೆಯುತ್ತಿದೆ. ಹೌದು, ಈ ವಿಂಟೇಜ್ ಮ್ಯೂಸಿಯಂಗೆ ಇದೀಗ ಪ್ರತಿನಿತ್ಯ ಸಾವಿರಾರು ಪ್ರವಾಸಿಗರು ಆಗಮಿಸಿ ಇಲ್ಲಿನ ಪಾರಂಪರಿಕ ಸೊಬಗನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ. ಪಯಣ ಹೆಸರಿನ ಈ ಮ್ಯೂಸಿಯಂನ್ನು ಧರ್ಮಸ್ಥಳ ಸಂಸ್ಥೆಯ ಸಹಯೋಗದಲ್ಲಿ ನಿರ್ಮಿಸಲಾಗಿದೆ. ಸದ್ಯ ಮ್ಯೂಸಿಯಂನಲ್ಲಿ ವಿವಿಧ ದೇಶಗಳ ಹಳೇ ಕಾಲದ ವಿಂಟೇಜ್​ ಕಾರುಗಳನ್ನು ಸಾಲಾಗಿ ನಿಲ್ಲಿಸಲಾಗಿದೆ.

ಸುಮಾರು 70ಕ್ಕೂ ಹೆಚ್ಚು ಹಳೆಯ ಕಾರುಗಳಿದ್ದು ಆಕಾರ, ಬಣ್ಣ ವಿಭಿನ್ನವಾಗಿವೆ. ಇವುಗಳಲ್ಲಿ ಮೈಸೂರು ರಾಜ ವಂಶಸ್ಥ ಜಯಚಾಮರಾಜ ಒಡೆಯರ್​ ಬಳಸುತ್ತಿದ್ದ ಡಾಮ್ಲರ್ ಕಾರು, ನೊಬೆಲ್ ಪ್ರಶಸ್ತಿ ಪುರಸ್ಕೃತ ವಿಜ್ಞಾನಿ ಸಿ. ವಿ. ರಾಮನ್ ಅವರ ವಿಶೇಷ ಕಾರು ಇದ್ದೂ, ಇದರ ಮೂಲ ಯುಎಸ್​ಎ ಆಗಿದೆ. ಸಿಲಿಂಡರ್​ ಆಕಾರದ ಜೋಡಿ ಇಂಜಿನ್ ಹಾಗೂ ಈ ಕಾರಿಗೆ ಎರಡು ಬಾಗಿಲು ಇವೆ. ಅಲ್ಲದೇ ಇಲ್ಲಿ ಹಳೆಯ ಬೈಕ್​, ಸ್ಕೂಟರ್​, ಸೇರಿದಂತೆ ಪಾರಂಪರಿಕ ಕರಕುಶಲ ವಸ್ತುಗಳು ಕೂಡ ಪ್ರವಾಸಿಗರ ಗಮನ ಸೆಳೆಯುತ್ತಿವೆ.

ಇದನ್ನೂ ಓದಿ:ಗೋವಾದ ಬ್ರಾಹ್ಮಿ ಶಾಸನದಲ್ಲಿ ಹೊಸ ರಾಜಮನೆತನ ಬೆಳಕಿಗೆ: ಮಂಗಳೂರಿನ ನಿ. ಪ್ರೊಫೆಸರ್​ ಮಾಹಿತಿ - Haihaya dynasty ruled Goa