ಗೊಂದಲ ರಹಿತ, ಪಾರದರ್ಶಕ ಮತ ಎಣಿಕೆಗೆ ಬೆಳಗಾವಿಯಲ್ಲಿ ಸಕಲ ಸಿದ್ಧತೆ - Lok Sabha election vote counting

ಬೆಳಗಾವಿ ಜಿಲ್ಲೆಯಲ್ಲಿ ನಾಳೆ ನಡೆಯಲಿರುವ ಲೋಕಸಭೆ ಚುನಾವಣೆಯ ಮತ ಎಣಿಕೆಗೆ ಪೂರ್ವ ತಯಾರಿ ಭರ್ಜರಿಯಾಗಿದ್ದು, ಜಿಲ್ಲಾಧಿಕಾರಿ ನಿತೇಶ ಪಾಟೀಲ ಮಾಹಿತಿ ನೀಡಿದ್ದಾರೆ.

ಬೆಳಗಾವಿ:ಜೂ. 4ರಂದು ನಡೆಯಲಿರುವ ಲೋಕಸಭೆ ಚುನಾವಣೆ ಮತ ಎಣಿಕೆಗೆ ಉತ್ತಮವಾಗಿ ತಯಾರಿ ಮಾಡಿಕೊಂಡಿದ್ದೇವೆ. ಯಾವುದೇ ಗೊಂದಲ ಇಲ್ಲದೇ ಪಾರದರ್ಶಕವಾಗಿ ಮತ ಎಣಿಕೆ ಪೂರ್ಣಗೊಳಿಸಿ ಫಲಿತಾಂಶವನ್ನು ನೀಡುತ್ತೇವೆ ಎಂದು ಚುನಾವಣಾ ಅಧಿಕಾರಿಯೂ ಆಗಿರುವ ಬೆಳಗಾವಿ ಜಿಲ್ಲಾಧಿಕಾರಿ ನಿತೇಶ ಪಾಟೀಲ ಹೇಳಿದ್ದಾರೆ.

ಮತ ಎಣಿಕೆ ನಡೆಯಲಿರುವ ಬೆಳಗಾವಿ ನಗರದ ರಾಣಿ ಪಾರ್ವತಿ ದೇವಿ ಕಾಲೇಜಿನಲ್ಲಿ ಭಾನುವಾರ ಸುದ್ದಿಗೋಷ್ಠಿ ನಡೆಸಿ ಅವರು ಮಾತನಾಡಿದರು. "8 ವಿಧಾನಸಭೆ ಕ್ಷೇತ್ರಗಳನ್ನು ಒಳಗೊಂಡಿರುವ ಬೆಳಗಾವಿ ಲೋಕಸಭೆ ಕ್ಷೇತ್ರಕ್ಕೆ ಮೇ 7ರಂದು ನಡೆದ ಚುನಾವಣೆಯಲ್ಲಿ 13,75,283 ಮತದಾರರು ಮತ ಚಲಾಯಿಸಿದ್ದು, ಶೇ.71.49 ಮತದಾನ ದಾಖಲಾಗಿತ್ತು. ಒಟ್ಟು 19,23,788 ಮತಗಳು. ಇನ್ನು ಈವರೆಗೆ 11,148 ಪೋಸ್ಟಲ್ ಬ್ಯಾಲೆಟ್ ಮತಗಳು ಬಂದಿದ್ದು, ಬೆಳಿಗ್ಗೆ 8 ಗಂಟೆವರೆಗೆ ಬಂದ ಪೋಸ್ಟಲ್ ಬ್ಯಾಲೆಟ್ ಮತಗಳನ್ನು ಪರಿಗಣಿಸಲಾಗುತ್ತದೆ. ಇನ್ನು 300 ಮತಗಳು ಹೆಚ್ಚಿಗೆ ಬರಬಹುದು".

"ಮತ ಏಣಿಕೆ ನಡೆಯಲಿರುವ ಜೂ.4ರಂದು ಬೆಳಗ್ಗೆ 6 ಗಂಟೆಗೆ ಮತಪೆಟ್ಟಿಗೆ ಇರುವ ಭದ್ರತಾ ಸ್ಟ್ರಾಂಗ್ ರೂಮ್​ಗಳನ್ನು ಅಭ್ಯರ್ಥಿಗಳು, ಕೌಂಟಿಂಗ್ ಏಜೆಂಟ್​ಗಳು, ಚುನಾವಣಾ ಆಯೋಗದ ಸಾಮಾನ್ಯ ವೀಕ್ಷಕರ ಸಮ್ಮುಖದಲ್ಲಿ ತೆರೆಯಲಾಗುವುದು. ಒಟ್ಟು 17 ಕೊಠಡಿಗಳಿದ್ದು, 1 ಕೊಠಡಿ ಪೋಸ್ಟಲ್ ಬ್ಯಾಲೆಟ್ ಮತಗಳಿಗೆ ಮೀಸಲಿಡಲಾಗಿದೆ. 8 ಗಂಟೆಯಿಂದ ಮತ ಎಣಿಕೆ ಆರಂಭವಾಗುತ್ತದೆ. ಅಂದು ಜಿಲ್ಲಾದ್ಯಂತ ಮದ್ಯಪಾನ ಮಾರಾಟ ನಿಷೇಧಿಸಲಾಗಿದೆ. 200 ಮೀಟರ್ ಸುತ್ತಲೂ ನಿಷೇಧಾಜ್ಞೆ ಇರಲಿದ್ದು, ಕೇಂದ್ರದಲ್ಲಿ ಮೊಬೈಲ್, ತಂಬಾಕು, ಬೀಡಿ ಕೂಡ ನಿಷಿದ್ಧಗೊಳಿಸಿದ್ದೇವೆ".

"ಇವಿಎಂ ಮತಗಳ ಣಿಕೆಗೆ 8 ಕೊಠಡಿ ಸಿದ್ಧಪಡಿಸಿಕೊಂಡಿದ್ದೇವೆ. ಪೋಸ್ಟಲ್​ ಬ್ಯಾಲೆಟ್​ ಮತಗಳ ಏಣಿಕೆಗೆ ಎರಡು ಹೆಚ್ಚುವರಿ ರೂಮ್​ ಮಾಡಿಕೊಂಡಿದ್ದೇವೆ. ಚುನಾವಣೆ ಆಯೋಗದಿಂದ 18 ಟೇಬಲ್​ ಹಾಕಲು ಅನುಮತಿ ಪಡೆದಿದ್ದೇವೆ. 14 ಟೇಬಲ್​ಗಳಲ್ಲಿ ಮತ ಎಣಿಕೆಗೆ ಅವಕಾಶವಿದೆ. 14+1 ಏಜೆಂಟ್​ಗಳಿಗೆ ಅವಕಾಶ ನೀಡಲಾಗುತ್ತದೆ. ಪೋಸ್ಟಲ್ ಬ್ಯಾಲೆಟ್​​ 18 ಟೇಬಲ್​ಗಳಿಗೆ 18 ಕೌಂಟಿಂಗ್ ಏಜೆಂಟ್​ಗಳಿಗೆ ಅವಕಾಶ ನೀಡಲಾಗಿದೆ. ಒಟ್ಟು 552 ಸಿಬ್ಬಂದಿಗಳನ್ನು ಮತ ಎಣಿಕೆಗೆ ನಿಯೋಜಿಸಲಾಗಿದ್ದು, 30 ಏರ್.ಓಗಳು ಇರುತ್ತಾರೆ".

"ತಾಂತ್ರಿಕ ದೋಷಗಳನ್ನು ನಿವಾರಿಸುವ ನಿಟ್ಟಿನಲ್ಲಿ ಚುನಾವಣೆ ಆಯೋಗದಿಂದ 8 ಜನ ಇಂಜಿನಿಯರ್​ಗಳು ಆಗಮಿಸಿದ್ದಾರೆ. ಚುನಾವಣೆ ಆಯೋಗದ ವೆಬ್​ಸೈಟ್​ನಲ್ಲಿ ಪ್ರತಿಕ್ಷಣದ ಮತ ಎಣಿಕೆ ಪ್ರಕಟಿಸಲಾಗುತ್ತದೆ. ಅಲ್ಲದೇ ನಗರದ ಆರ್.ಪಿ.ಡಿ. ಸರ್ಕಲ್​ನಲ್ಲಿ ಸಾರ್ವಜನಿಕರು ಫಲಿತಾಂಶ ವೀಕ್ಷಿಸಲು ಎಲ್ಇಡಿ ಅಳವಡಿಸಲಾಗುತ್ತದೆ. ಪಟಾಕಿ, ಗುಲಾಲು ತರದಂತೆ ಸೂಚನೆ ನೀಡಿದ್ದೇವೆ. 200 ಮೀಟರ್​ ಅಂತರದಲ್ಲಿ ಯಾವುದೇ ರೀತಿ ವಿಜಯೋತ್ಸವ ಮಾಡುವಂತಿಲ್ಲ. ಇದು ಹೊರತು ಪಡಿಸಿ ಬೇರೆ ಸ್ಥಳದಲ್ಲಿ ಸಾರ್ವಜನಿಕರಿಗೆ ಅನಾನುಕೂಲ ಆಗದಂತೆ ವಿಜಯೋತ್ಸವ ಆಚರಿಸಬೇಕು" ಎಂದು ಜಿಲ್ಲಾಧಿಕಾರಿ ನಿತೇಶ ಪಾಟೀಲ ತಿಳಿಸಿದರು.

ನಗರ ಪೊಲೀಸ್​ ಆಯುಕ್ತ ಯಡಾ ಮಾರ್ಟಿನ್​​ ಮಾರ್ಬನ್ಯಾಂಗ್​ ಮಾತನಾಡಿ, "ಮತ ಎಣಿಕೆ ಕೇಂದ್ರ ಮತ್ತು ಬೆಳಗಾವಿ ನಗರದಲ್ಲಿ ಎರಡು ಹಂತದಲ್ಲಿ ಭದ್ರತೆ ನಿಯೋಜಿಸಲಾಗಿದೆ. ಮತ ಎಣಿಕೆ ಕೇಂದ್ರದಲ್ಲಿ ಇಬ್ಬರು ಡಿಸಿಪಿ, ಹೊರಗಡೆ ಒಬ್ಬರು ಡಿಸಿಪಿ ಇರುತ್ತಾರೆ. 5 ಎಸಿಪಿಗಳು, 13 ಸಿಪಿಐ, 21 ಪಿಎಸ್​ಐ, 463 ಸಿಬ್ಬಂದಿಗಳನ್ನು ನಿಯೋಜಿಸಲಾಗಿದೆ. ನಗರದಲ್ಲಿ 105 ಸೂಕ್ಷ್ಮ ಪ್ರದೇಶಗಳನ್ನು ಗುರುತಿಸಲಾಗಿದ್ದು, ಅಲ್ಲೆಲ್ಲಾ ಬಿಗಿ ಪೊಲೀಸ್ ಬಂದೋಬಸ್ತ್ ಮಾಡುತ್ತೇವೆ. 5 ಕೆಎಸ್​ಆರ್​ಪಿ ತುಕಡಿಗಳು, 300 ಹೋಮ್ ಗಾರ್ಡ್​ಗಳ ಬಳಕೆಗೆ ಅವಕಾಶ ಸಿಕ್ಕಿದೆ. 4 ಡ್ರೋನ್ ಕ್ಯಾಮರಾಗಳನ್ನು ಬಳಸುತ್ತೇವೆ. ನಗರದಲ್ಲಿ 300 ಸಿಸಿಟಿವಿಗಳನ್ನು ಅಳವಡಿಸುತ್ತಿದ್ದೇವೆ. ಈ ಬಾರಿ ಯಾವುದೇ ರೀತಿ ಅಹಿತಕರ ಘಟನೆಗಳು ಸಂಭವಿಸದಂತೆ ತೀವ್ರ ನಿಗಾವಹಿಸುತ್ತೇವೆ" ಎಂದು ಮಾಹಿತಿ ನೀಡಿದರು.

ಸುದ್ದಿಗೋಷ್ಠಿಯಲ್ಲಿ ಪ್ರೊಬೇಷನರಿ ಐಎಎಸ್ ಅಧಿಕಾರಿ ದಿನೇಶ ಭಾಗಿಯಾಗಿದ್ದರು. ಬಳಿಕ ಮತ ಎಣಿಕೆ ಕೊಠಡಿ, ಪಾರ್ಕಿಂಗ್, ಭದ್ರತಾ ಸಿಬ್ಬಂದಿ ನಿಯೋಜನೆ, ಊಟೋಪಹಾರ ವ್ಯವಸ್ಥೆ, ಮಾಧ್ಯಮ ಕೇಂದ್ರ ಮತ್ತಿತರ ಸೌಕರ್ಯಗಳನ್ನು ಜಿಲ್ಲಾಧಿಕಾರಿ ನಿತೇಶ್ ಪಾಟೀಲ ಮತ್ತು ಪೊಲೀಸ್ ಆಯುಕ್ತ ಯಡಾ ಮಾರ್ಟಿನ್ ಮಾರ್ಬನ್ಯಾಂಗ್ ಮತ್ತಿತರ ಅಧಿಕಾರಿಗಳು ಪರಿಶೀಲಿಸಿದರು.

ಇದನ್ನೂ ಓದಿ:ಜಿಲ್ಲಾ ಚುನಾವಣಾಧಿಕಾರಿಯಿಂದ ಪದವೀಧರ ಕ್ಷೇತ್ರದ ಮಸ್ಟರಿಂಗ್ ಕೇಂದ್ರ ಪರಿಶೀಲನೆ - Council Election