ಸಂಸದೆ ಜೊತೆ ಮದುವೆ ಫಿಕ್ಸ್ ಮಾಡಿಕೊಂಡ T20 ಸ್ಪೆಷಲಿಸ್ಟ್​​​​!

ಟೀಂ ಇಂಡಿಯಾದ ಸ್ಟಾರ್​ ಕ್ರಿಕೆಟರ್​ ರಿಂಕು ಸಿಂಗ್​ ಅತ್ಯಂತ ಕಿರಿಯ ಲೋಕಸಭೆ ಸಂಸದೆ ಜೊತೆ ಮದುವೆ ಮಾಡಿಕೊಳ್ಳಲು ಸಜ್ಜಾಗಿದ್ದಾರೆ.

ನವದೆಹಲಿ: ಟೀಂ ಇಂಡಿಯಾದ ಸ್ಟಾರ್​ ಕ್ರಿಕೆಟರ್ ಮತ್ತು ಟಿ20 ಸ್ಪೆಷಲಿಸ್ಟ್​ ರಿಂಕು ಸಿಂಗ್​ ಶೀಘ್ರದಲ್ಲೇ ಹಸೆಮಣೆ ಏರಲು ಸಜ್ಜಾಗಿದ್ದಾರೆ. ಸಮಾಜವಾದಿ ಪಕ್ಷದ ಸಂಸದೆ ಪ್ರಿಯಾ ಸರೋಜ್​ ಜೊತೆಗೆ ಸಪ್ತಪದಿ ತುಳಿಯಲು ತೀರ್ಮಾನಿಸಿದ್ದಾರೆ. ಕಳೆದ ತಿಂಗಳು ರಿಂಕು ಸಿಂಗ್​ ಮತ್ತು ಪ್ರಿಯಾ ಸರೋಜ್​ ಗುಟ್ಟಾಗಿ ನಿಶ್ಷಿತಾರ್ಥ ಮಾಡಿಕೊಂಡಿದ್ದರು ಎಂದು ವರದಿಯಾಗಿತ್ತು.

ಆ ಬಳಿಕ ಈ ವಿಷಯ ಎಲ್ಲೆಡೆ ಹಬ್ಬಿದೆ. ಇದರ ಬೆನ್ನಲ್ಲೆ, ಪ್ರಿಯಾ ಸರೋಜ್ ತಂದೆ ಮತ್ತು ಶಾಸಕ ತುಫಾನಿ ಸರೋಜ್​ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿ ಕೇವಲ ಮದುವೆ ಮಾತುಕತೆ ಮಾತ್ರ ನಡೆದಿದೆ ಎಂದಿದ್ದರು. ಇದಾದ ಬಳಿಕ ಇಬ್ಬರ ಮದುವೆ ವಿಷಯವಾಗಿ ತುಫಾನಿ ಸರೋಜ್​ ಸ್ಪಷ್ಟನೆ ನೀಡಿದ್ದಾರೆ.

ಮದುವೆ ವಿಚಾರವಾಗಿ ರಿಂಕು ಸಿಂಗ್​ ಅವರ ತಂದೆಯೊಂದಿಗೆ ಮಾತನಾಡಲಾಗಿದೆ ಎಂದು ಬಹಿರಂಗಪಡಿಸಿದ್ದಾರೆ. ಎರಡೂ ಕುಟುಂಬಗಳು ಮದುವೆಗೆ ಒಪ್ಪಿಗೆ ನೀಡಿವೆ ಎಂದೂ ಹೇಳಿದ್ದಾರೆ. ಶೀಘ್ರದಲ್ಲೇ ಲಕ್ನೋದಲ್ಲಿ ಮದುವೆ ಮಾಡಿಕೊಳ್ಳಲಿದ್ದಾರೆ. ಪ್ರಿಯಾ ಮತ್ತು ರಿಂಕು ಸಿಂಗ್ ನಡುವಿನ ಮದುವೆ ವಿಚಾರ ಕಳೆದ ಒಂದು ವರ್ಷದಿಂದ ನಡೆಯುತ್ತಿತ್ತು. ಇಬ್ಬರ ಒಪ್ಪಿಗೆಯ ಬಳಿಕ ಇದೀಗ ಮದುವೆಯನ್ನು ಅಂತಿಮಗೊಳಿಸಲಾಗಿದೆ. ಶೀಘ್ರದಲ್ಲೆ ಮದುವೆ ದಿನಾಂಕ ಫಿಕ್ಸ್​ ಮಾಡಲಿದ್ದೇವೆ ಎಂದು ತಿಳಿಸಿದ್ದಾರೆ.

ಪ್ರಿಯಾ ಸರೋಜ್​ ಹಿನ್ನೆಲೆ:ಇವರು ಸಮಾಜವಾದಿ ಪಕ್ಷದ ಪ್ರಿಯಾ ಅತ್ಯಂತ ಕಿರಿಯ ಸಂಸದೆ. ಕಳೆದ ವರ್ಷ ನಡೆದ ಲೋಕಸಭಾ ಚುನಾವಣೆಯಲ್ಲಿ ಉತ್ತರ ಪ್ರದೇಶದ ಮಚ್ಲಿಶಹರ್ ಕ್ಷೇತ್ರದಿಂದ ಅಖಾಡಕ್ಕಿಳಿದು, ಬಿಜೆಪಿ ಅಭ್ಯರ್ಥಿ ಬಿ.ಪಿ.ಸರೋಜ್ ವಿರುದ್ಧ 35 ಸಾವಿರ ಮತಗಳ ಅಂತರದಿಂದ ಗೆಲುವು ಸಾಧಿಸಿದ್ದರು. ಇದರೊಂದಿಗೆ 25ನೇ ವಯಸ್ಸಿನಲ್ಲಿ ಲೋಕಸಭೆಗೆ ಆಯ್ಕೆಯಾದ ಎರಡನೇ ಕಿರಿಯ ಸಂಸದೆಯಾಗಿ ಗುರುತಿಸಿಕೊಂಡರು.

ಪ್ರಿಯಾ ಸರೋಜ್ ರಾಜಕೀಯ ಹಿನ್ನೆಲೆಯುಳ್ಳ ಕುಟುಂಬದಿಂದ ಬಂದವರು. ಇವರ ತಂದೆ ತುಫಾನಿ ಸರೋಜ್ ಮಚ್ಲಿಶಹರ್ ಕ್ಷೇತ್ರದಿಂದ ಸತತ ಮೂರು ಬಾರಿ ಸಂಸದರಾಗಿ ಆಯ್ಕೆ ಆಗಿದ್ದರು. ಪ್ರಸ್ತುತ ಶಾಸಕರು. ಪ್ರಿಯಾ ಸರೋಜ್ ದೆಹಲಿ ವಿಶ್ವವಿದ್ಯಾನಿಲಯದಲ್ಲಿ ಎಲ್​ಎಲ್​ಬಿ ಅಧ್ಯಯನ ಮಾಡಿದ್ದರು. ಸುಪ್ರೀಂ ಕೋರ್ಟ್ ವಕೀಲೆಯೂ ಆಗಿದ್ದರು.

ರಿಂಕು ಸಿಂಗ್​: ಟಿ20 ಕ್ರಿಕೆಟಿಗ ರಿಂಕು ಸಿಂಗ್​ ತಮ್ಮ ಸ್ಫೋಟಕ ಬ್ಯಾಟಿಂಗ್‌ನಿಂದಲೇ ಖ್ಯಾತಿ ಪಡೆದಿದ್ದಾರೆ. ಐಪಿಎಲ್​ನಿಂದ ಬೆಳಕಿಗೆ ಬಂದಿರುವ ಇವರು ಟೀ ಇಂಡಿಯಾದಲ್ಲೂ ಸ್ಥಾನ ಪಡೆದಿದ್ದಾರೆ. ಐಪಿಎಲ್​ನಲ್ಲಿ ಕೆಕೆಆರ್​ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ.

ಇದನ್ನೂ ಓದಿ:ಆಟದ ಬಗ್ಗೆ ನನಗೆ ಸ್ಪಷ್ಟತೆ ಇದೆ, ಪ್ರತೀ ಬಾರಿಯೂ ಹೆಚ್ಚು ರನ್ ಗಳಿಸುವುದು ಸುಲಭದ ಮಾತಲ್ಲ: ರೋಹಿತ್ ಶರ್ಮಾ