'ನನ್ನ ಮಗನ 10 ವರ್ಷದ ಕ್ರಿಕೆಟ್​ ಕೆರಿಯರ್​ ಈ ನಾಲ್ವರಿಂದ ಹಾಳಾಯ್ತು': ಸಂಜು ಸ್ಯಾಮ್ಸನ್​ ತಂದೆಯ ಆರೋಪ

Sanju Samson Father Allegation: ಸಂಜು ಸ್ಯಾಮ್ಸನ್​ ಅವರ ತಂದೆ ಟೀಂ ಇಂಡಿಯಾದ ಮೂವರು ಮಾಜಿ ನಾಯಕರು ಮತ್ತು ಓರ್ವ ಕೋಚ್​ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ.

Sanju Samson Father Allegation: ಭಾರತ ಕ್ರಿಕೆಟ್​ ತಂಡ ಟಿ20 ಸರಣಿಗಾಗಿ ಸದ್ಯ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿದೆ. ಈ ಸರಣಿಗಾಗಿ ಆಯ್ಕೆಯಾದ ತಂಡದಲ್ಲಿ ಸಂಜು ಸ್ಯಾಮ್ಸನ್​ ಕೂಡ ಸ್ಥಾನ ಪಡೆದುಕೊಂಡಿದ್ದಾರೆ. ಮೊದಲ ಪಂದ್ಯದಲ್ಲಿ ಭರ್ಜರಿ ಪ್ರದರ್ಶನ ತೋರಿದ ಸಂಜು, ಶತಕ ಸಿಡಿಸಿ ಹರಿಣಗಳ ವಿರುದ್ಧ ಘರ್ಜಿಸಿದ್ದರು. ಅಲ್ಲದೇ ಈ ಪಂದ್ಯವನ್ನೂ ಟೀಂ ಇಂಡಿಯಾ ಗೆದ್ದುಕೊಂಡಿತ್ತು. ನಂತರ ನಡೆದ ಎರಡು ಪಂದ್ಯಗಳಲ್ಲಿ ಸಂಜು ಶೂನ್ಯ ಸುತ್ತಿದ್ದಾರೆ.

ಏತನ್ಮಧ್ಯೆ, ಸಂಜು ಸ್ಯಾಮ್ಸನ್​ ಅವರ ತಂದೆ ನಾಲ್ವರು ಹಿರಿಯ ಆಟಗಾರರ ವಿರುದ್ಧ ದೊಡ್ಡ ಆರೋಪ ಮಾಡಿದ್ದಾರೆ. ಆ ನಾಲ್ವರಿಂದ ನನ್ನ ಮಗನ 10 ವರ್ಷದ ಕ್ರಿಕೆಟ್​ ಕೆರಿಯರ್ ಹಾಳಾಯಿತು ಎಂದು ಆರೋಪಿಸಿದ್ದಾರೆ.

ಹೌದು, ಸಂಜು ಸ್ಯಾಮ್ಸನ್​ ಅವರ ತಂದೆ ವಿಶ್ವನಾಥ್​ ಆರೋಪ ಮಾಡಿರುವ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದೆ. ಕಳೆದ ಹತ್ತು ವರ್ಷದಲ್ಲಿ ಟೀಂ ಇಂಡಿಯಾದ 3 ಮಾಜಿ ನಾಯಕರು ಮತ್ತು ಒಬ್ಬ ತರಬೇತುದಾರನಿಂದಾಗಿ ಮಗನ ಕ್ರಿಕೆಟ್​ ಕೆರಿಯರ್​ ಹಾಳಾಗಿದೆ ಎಂದಿದ್ದಾರೆ.

ಮಲಯಾಳಂನ ಖಾಸಗಿ ಮಾಧ್ಯಮದಲ್ಲಿ ಮಾತನಾಡಿರುವ ಅವರು, ಟೀಂ ಇಂಡಿಯಾದ ಮಾಜಿ ನಾಯಕರಾದ ವಿರಾಟ್​ ಕೊಹ್ಲಿ, ಧೋನಿ, ರೋಹಿತ್​ ಶರ್ಮಾ ಮತ್ತು ಕೋಚ್​ ರಾಹುಲ್​ ದ್ರಾವಿಡ್​ ಅವರಿಂದ ತಮ್ಮ ಮಗನ ಹತ್ತು ವರ್ಷದ ಕ್ರಿಕೆಟ್​ ಹಾಳಾಗಿದೆ. ಇದರಿಂದಾಗಿ ಸಂಜು ತುಂಬಾ ನೊಂದುಕೊಂಡಿದ್ದ. ಇದೀಗ ಚೇತರಿಸಿಕೊಂಡಿದ್ದಾನೆ ಎಂದಿದ್ದಾರೆ. ಇದೇ ವೇಳೆ ಸಂಜು ಸ್ಯಾಮ್ಸನ್​ ಅವರ ತಂದೆ ಪ್ರಸ್ತುತ ಟೀಂ ಇಂಡಿಯಾದ ಕೋಚ್ ಮತ್ತು ಟಿ20 ತಂಡದ ನಾಯಕ ಸೂರ್ಯಕುಮಾರ್​ ಯಾದವ್​ ಅವರಿಗೆ ಧನ್ಯವಾದ ತಿಳಿಸಿದ್ದಾರೆ.

ತಮ್ಮ ಮಗನ ಬೆಂಬಲಕ್ಕೆ ನಿಂತ ಕೋಚ್​ ಗಂಭೀರ್​ ಮತ್ತು ಸೂರ್ಯಕುಮಾರ್​ ಯಾದವ್​ ಅವರಿಗೆ ಕೃತಜ್ಞತೆ ಎಂದಿದ್ದಾರೆ. ಇದೇ ವೇಳೆ ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗ ಕೃಷ್ಣಮಾಚಾರಿ ಶ್ರೀಕಾಂತ್​ ವಿರುದ್ಧವೂ ಕೆಲ ಆರೋಪ ಮಾಡಿದ್ದಾರೆ. ಕೃಷ್ಣಮಾಚಾರಿ ಸಂಜು ಜೊತೆ ಅನುಚಿತವಾಗಿ ವರ್ತಿಸಿದ್ದಾರೆ ಎಂದಿದ್ದಾರೆ. ಬಾಂಗ್ಲಾದೇಶ ವಿರುದ್ಧದ ಟಿ20ಯಲ್ಲಿ ಸಂಜು ಶತಕ ಸಿಡಿಸಿದ ಬಳಿಕ ಕೃಷ್ಣಮಾಚಾರಿ ಕಾಮೆಂಟ್​ ಮಾಡಿದ್ದರು. ಇದಕ್ಕೆ ಸಂಜು ತಂದೆ ಅಸಮಾಧಾನ ಹೊರಹಾಕಿದ್ದು ಯಾವುದೇ ತಂಡದ ವಿರುದ್ಧ ಶತಕ ಸಿಡಿಸಿದರೂ ಅದು ಶತಕವೇ ಸರಿ ಎಂದಿದ್ದಾರೆ.

ವಿಶ್ವನಾಥ್​​ ಇಂತಹ ವಿವಾದಾತ್ಮಕ ಹೇಳಿಕೆ ನೀಡಿರುವುದು ಇದೇ ಮೊದಲಲ್ಲ. 2016ರಲ್ಲೂ ಕೇರಳ ಕ್ರಿಕೆಟ್​ ಸಂಸ್ಥೆ ವಿರುದ್ಧವೂ ಗಂಭೀರ ಆರೋಪ ಮಾಡಿದ್ದರು. ಅದಾದ ಬಳಿಕ ಅವರನ್ನು ಮೈದಾನಕ್ಕೆ ಕರೆತರದಂತೆ ಎಚ್ಚರಿಕೆ ನೀಡಲಾಗಿತ್ತು.

ಸಂಜು ಸ್ಯಾಮ್ಸನ್​ ದಾಖಲೆ:ಸಂಜು ಇದುವರೆಗೂ ಒಟ್ಟು 16 ODI ಪಂದ್ಯಗಳನ್ನು ಆಡಿದ್ದಾರೆ. ಈ ಅವಧಿಯಲ್ಲಿ 1 ಶತಕ ಮತ್ತು 3 ಅರ್ಧಶತಕಗಳ ಸಹಾಯದಿಂದ 510 ರನ್​ ಗಳಿಸಿದ್ದಾರೆ. 36 T20I ಪಂದ್ಯಗಳನ್ನು ಆಡಿದ್ದಾರೆ. ಇದರಲ್ಲಿ 701 ರನ್​ ಕಲೆಹಾಕಿದ್ದಾರೆ. 2 ಶತಕ 2 ಅರ್ಧಶತಕ ದಾಖಲಿಸಿದ್ದಾರೆ. ಟಿ20ಯಲ್ಲಿ 111 ಇವರ ಹೈಸ್ಕೋರ್​ ಆಗಿದೆ.

ಇದನ್ನೂ ಓದಿ:IND vs SA T20: ಚೊಚ್ಚಲ ಶತಕ ಸಿಡಿಸಿ ದಾಖಲೆ ಬರೆದ ತಿಲಕ್​ ವರ್ಮಾ: ಈ ಸಾಧನೆ ಮಾಡಿದ 4ನೇ ಭಾರತೀಯ!