ಮೆಲ್ಬರ್ನ್(ಆಸ್ಟ್ರೇಲಿಯಾ):ಇಲ್ಲಿನ ರಾಡ್ ಲೆವರ್ ಟೆನ್ನಿಸ್ ಕೋರ್ಟ್‌ನಲ್ಲಿ ಭಾನುವಾರ ನಡೆದ ಆಸ್ಟ್ರೇಲಿಯನ್ ಓಪನ್ ಟೆನ್ನಿಸ್ ಪುರುಷರ ಸಿಂಗಲ್ಸ್ ಫೈನಲ್ನಲ್ಲಿ ರಷ್ಯಾದ ಡೇನಿಯಲ್ ಮೆಡ್ವೆಡೆವ್ ವಿರುದ್ಧ ಇಟಲಿಯ ಜಾನಿಕ್ ಸಿನ್ನರ್ ಐತಿಹಾಸಿಕ ಜಯ ಸಾಧಿಸಿದರು. ಈ ಮೂಲಕ 22 ವರ್ಷದ ಜಾನಿಕ್ ಸಿನ್ನರ್ ಚೊಚ್ಚಲ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿ ಎತ್ತಿ ಹಿಡಿದರು. ಇದಕ್ಕೂ ಮೊದಲು ವಿಶ್ವದ ನಂ.1 ಟೆನ್ನಿಸಿಗ ನೊವಾಕ್ ಜೊಕೊವಿಕ್ ಅವರನ್ನು ಸೆಮಿಫೈನಲ್ನಲ್ಲಿ ಸೋಲಿಸಿರುವ ಇವರು ಫೈನಲ್ ಪ್ರವೇಶಿಸಿದ್ದರು.
ಪಂದ್ಯ ಹೀಗಿತ್ತು: ಐದು ಸೆಟ್ಗಳಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಮೆಡ್ವೆಡೆವ್ ಎದುರು ಸಿನ್ನರ್ ಪ್ರಬಲ ಪೈಪೋಟಿ ತೋರಿದರು. 3-6, 3-6, 6-4, 6-4, 6-3 ಸೆಟ್ಗಳಿಂದ ಮೆಡ್ವೆಡೆವ್ ಅವರನ್ನು ಸೋಲಿಸಲು ಸಿನ್ನರ್ ಸುಮಾರು 3 ಗಂಟೆ 44 ನಿಮಿಷ ಕಾಲಾವಧಿ ತೆಗೆದುಕೊಂಡರು. ಮೊದಲೆರಡು ಸೆಟ್ಗಳಲ್ಲಿ ಗೆದ್ದ ಮೆಡ್ವೆಡೆವ್ ಪ್ರಶಸ್ತಿ ಎತ್ತಿ ಹಿಡಿಯುವ ಉತ್ಸಾಹದಲ್ಲಿದ್ದರು. ಆದರೆ ಪುಟಿದೆದ್ದ ಸಿನ್ನರ್ ಮುಂದಿನ ಮೂರೂ ಸೆಟ್ಗಳಲ್ಲಿ ಮೆಡ್ವೆಡೆವ್‌ರನ್ನು ಮಣಿಸಿದರು.
2022ರ ಆಸ್ಟ್ರೇಲಿಯನ್ ಓಪನ್ ಫೈನಲ್ನಲ್ಲಿ ರಾಫೆಲ್ ನಡಾಲ್ ವಿರುದ್ಧ ಡೇನಿಯಲ್ ಮೆಡ್ವೆಡೆವ್ ಪರಾಭವಗೊಂಡಿದ್ದರು. ಇದೀಗ ಎರಡನೇ ಸೋಲಿನ ಕಹಿ ಅನುಭವಿಸಿದ್ದಾರೆ.