ಹಾರ್ದಿಕ್​ ಆಲ್ರೌಂಡರ್​ ಆಟಕ್ಕೆ ಮಣಿದ ಬಾಂಗ್ಲಾ: ಸೆಮಿಫೈನಲ್​ಗೆ ಭಾರತ ಮತ್ತಷ್ಟು ಸನಿಹ - India Beat Bangladesh

ಶನಿವಾರ ನಡೆದ ಟಿ20 ವಿಶ್ವಕಪ್​ನ ಸೂಪರ್​ 8ರ ಪಂದ್ಯದಲ್ಲಿ ಬಾಂಗ್ಲಾದೇಶ ವಿರುದ್ಧ ಭಾರತ 50 ರನ್​ಗಳ ಗೆಲುವು ಸಾಧಿಸಿತು. ಆಲ್ರೌಂಡರ್​ ಹಾರ್ದಿಕ್​ ಪಾಂಡ್ಯ ಪಂದ್ಯಶ್ರೇಷ್ಠ ಆಟವಾಡಿದರು.

ನಾರ್ಥ್​ಸೌಂಡ್(ಆ್ಯಂಟಿಗುವ): ಟಿ20 ವಿಶ್ವಕಪ್​ನ ಸೂಪರ್-8ರ ಏಳನೇ ಪಂದ್ಯದಲ್ಲಿ ಬಾಂಗ್ಲಾದೇಶದ ವಿರುದ್ಧ ಭಾರತ ಭರ್ಜರಿ ಗೆಲುವು ಸಾಧಿಸಿದ್ದು, ಸೆಮಿಫೈನಲ್‌ಗೆ ಸನಿಹವಾಗಿದೆ.

ಆ್ಯಂಟಿಗುವಾದ ಸರ್ ವಿವಿಯನ್ ರಿಚರ್ಡ್ಸ್ ಸ್ಟೇಡಿಯಂನಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ, ಹಾರ್ದಿಕ್ ಪಾಂಡ್ಯರ ಅಜೇಯ ಅರ್ಧಶತಕದ ಬಲದಿಂದ 196 ರನ್ ಕಲೆಹಾಕಿತು. ಇದಕ್ಕುತ್ತರವಾಗಿ, ಬಾಂಗ್ಲಾ ತಂಡ ಭಾರತದ ಬೌಲಿಂಗ್​ ದಾಳಿಗೆ ತತ್ತರಿಸಿ 146 ರನ್‌ಗಳಿಗೆ ಇನಿಂಗ್ಸ್​ ಮುಗಿಸಿತು. ಅಂತಿಮವಾಗಿ ಭಾರತ 50 ರನ್​ಗಳಿಂದ ಪಂದ್ಯ ಜಯಿಸಿತು.

ಈ ಗೆಲುವಿನೊಂದಿಗೆ 4 ಅಂಕಗಳನ್ನು ಪಡೆಯುವ ಮೂಲಕ ರೋಹಿತ್​ ಶರ್ಮಾ ನೇತೃತ್ವದ ಟೀಂ ಇಂಡಿಯಾ ಸೂಪರ್ 8 ಗ್ರೂಪ್ 1ರಲ್ಲಿ ಪಾಯಿಂಟ್ ಪಟ್ಟಿಯಲ್ಲಿ ಅಗ್ರಸ್ಥಾನ ಅಲಂಕರಿಸಿದೆ.

ಬಾಂಗ್ಲಾದೇಶ ಇನ್ನಿಂಗ್ಸ್:ಭಾರತ ನೀಡಿದ ಗುರಿ ಬೆನ್ನಟ್ಟಿದ ಬಾಂಗ್ಲಾಉತ್ತಮ ಆರಂಭವನ್ನೇನೋ ಪಡೆಯಿತು. ಆದರೆ ತಂಡದ ಸ್ಕೋರ್​ 35 ಆಗಿದ್ದಾಗ ಆರಂಭಿಕ ಬೌಲರ್​ ಲಿಟನ್​ ದಾಸ್​ (13) ಆಟಕ್ಕೆ ಹಾರ್ದಿಕ್​ ಪಾಂಡ್ಯ ಕಡಿವಾಣ​ ಹಾಕಿದರು. ಇದಾದ ಬಳಿಕ ತಂಜೀದ್ ಹಸನ್ ಮತ್ತು ನಜ್ಮುಲ್ ಹುಸೇನ್ ಶಾಂಟೊ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯಲು ಪ್ರಯತ್ನಿಸಿದರು. ಆದರೆ, ಮುಂದೆ ಈ ಜೋಡಿ ನಿರ್ಗಮಿಸಿದ ನಂತರ ತಂಡದ ಬ್ಯಾಟಿಂಗ್ ಬಲ ಕುಸಿಯುತ್ತಾ ಸಾಗಿತು.

ನಜ್ಮುಲ್ ಹುಸೇನ್ ಶಾಂಟೊ ಬಾಂಗ್ಲಾ ಪರ ಹೈ ಸ್ಕೋರರ್​ ಎನಿಸಿದರು. ಇವರು 32 ಎಸೆತಗಳಲ್ಲಿ 40 ರನ್‌ಗಳ ಇನಿಂಗ್ಸ್‌ ಆಡಿದರು. ಇನ್ನುಳಿದಂತೆ ತಂಜೀದ್ ಹಸನ್ (29) ಹಾಗೂ ರಿಶಾದ್ ಹುಸೇನ್ (24) ತಂಡದ ಸ್ಕೋರ್​ಗೆ ಕೊಡುಗೆ ನೀಡಿದರು.

ಭಾರತದ ಪರ ಕುಲ್ದೀಪ್ ಯಾದವ್ 3, ಬುಮ್ರಾ, ಅರ್ಷದೀಪ್‌ ತಲಾ 2, ಹಾರ್ದಿಕ್​ ಪಾಂಡ್ಯ 1 ವಿಕೆಟ್​ ಉರುಳಿಸಿದರು.

ಭಾರತದ ಇನಿಂಗ್ಸ್:ಇದಕ್ಕೂ ಮುನ್ನ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗಿಳಿದ ಟೀಂ ಇಂಡಿಯಾ ಹಾರ್ದಿಕ್​ ಪಾಂಡ್ಯಾರ ಆಕರ್ಷಕ ಅರ್ಧಶತಕದ ನೆರವಿನಿಂದ 5 ವಿಕೆಟ್​ ನಷ್ಟಕ್ಕೆ 196 ರನ್​ ಕಲೆಹಾಕಿತು. ಪಾಂಡ್ಯ 27 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 3 ಸಿಕ್ಸರ್ ನೆರವಿನಿಂದ ಅಜೇಯ 50 ರನ್ ಪೇರಿಸಿದರು. ಉಳಿದಂತೆ ರೋಹಿತ್​ ಶರ್ಮಾ (23), ವಿರಾಟ್ ಕೊಹ್ಲಿ (37), ರಿಷಬ್ ಪಂತ್ (36) ಮತ್ತು ಶಿವಂ ದುಬೆ (34) ರನ್​ ಕೊಡುಗೆ ಕೊಟ್ಟರು.

ಬೌಲಿಂಗ್​ನಲ್ಲಿ ಬಾಂಗ್ಲಾ ಪರ ತಂಜಿಮ್ ಹಸನ್ ಮತ್ತು ರಿಶಾದ್​ ತಲಾ 2, ಶಾಕಿಬ್​ 1 ವಿಕೆಟ್​ ಪಡೆದರು.

ಇದನ್ನೂ ಓದಿ:ಕೆರಿಬಿಯನ್ನರ ಅಬ್ಬರಕ್ಕೆ ತತ್ತರಿಸಿದ ಅಮೆರಿಕ​: ಯುಎಸ್​​​ಗೆ ಸತತ ಎರಡನೇ ಸೋಲು - West Indies Crush USA