ಹೈದರಾಬಾದ್​ ಉದ್ಯಮಿಯ ಕೈಹಿಡಿಯಲಿರುವ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧು

ರಾಜಸ್ಥಾನದ ಉದಯಪುರದಲ್ಲಿ ಅದ್ಧೂರಿಯಾಗಿ ಮದುವೆ ನಡೆಯಲಿದ್ದು, ಡಿ. 22 ರಿಂದ ಮದುವೆ ಕಾರ್ಯಕ್ರಮಗಳು ಪ್ರಾರಂಭವಾಗಲಿದ್ದು, ಡಿ. 24ರಂದು ಹೈದರಾಬಾದ್​ನಲ್ಲಿ ಆರತಕ್ಷತೆ ನಡೆಯಲಿದೆ.

ಹೈದರಾಬಾದ್​: ಭಾರತದ ಸ್ಟಾರ್ ಶಟ್ಲರ್ ಮತ್ತು ಎರಡು ಬಾರಿ ಒಲಿಂಪಿಕ್ ಪದಕ ವಿಜೇತೆ ಪಿವಿ ಸಿಂಧು ತಮ್ಮ ಜೀವನದ ಹೊಸ ಅಧ್ಯಾಯಕ್ಕೆ ಕಾಲಿಡಲು ಸಿದ್ಧವಾಗಿದ್ದಾರೆ. 29 ವರ್ಷದ ಸಿಂಧು ಅವರು ಹೈದರಾಬಾದ್​ನ ಪೊಸಿಡೆಕ್ಸ್​ ಟೆಕ್ನಾಲಜೀಸ್​ನ ಕಾರ್ಯನಿರ್ವಾಹಕ ನಿರ್ದೇಶಕ ವೆಂಕಟ ದತ್ತ ಸಾಯಿ ಅವರೊಂದಿಗೆ ಇದೇ ತಿಂಗಳ 22 ರಂದು ಹಸೆಮಣೆ ಏರಲಿದ್ದಾರೆ.

ರಾಜಾಸ್ಥಾನದ ಉದಯಪುರದಲ್ಲಿ ಅದ್ಧೂರಿಯಾಗಿ ವಿವಾಹ ಸಮಾರಂಭ ನಡೆಯಲಿದ್ದು, ಡಿ.20ರಂದು ವಿವಾಹ ಕಾರ್ಯಕ್ರಮಗಳು ಪ್ರಾರಂಭವಾಗಲಿವೆ. ಡಿ.24 ರಂದು ಹೈದರಾಬಾದ್​ನಲ್ಲಿ ಆರತಕ್ಷತೆ ನಡೆಯಲಿದೆ ಎಂದು ಸಿಂಧು ಅವರ ಕುಟುಂಬ ಖಚಿತಪಡಿಸಿದೆ.

"ಎರಡೂ ಮನೆಯವರು ಬಹಳ ಹಿಂದಿನಿಂದಲೂ ಪರಿಚಿತರು. ಆದರೆ ನಾವು ಈ ಮದುವೆಯನ್ನು ಒಂದು ತಿಂಗಳ ಹಿಂದೆಯಷ್ಟೇ ಖಚಿತಪಡಿಸಿದ್ದೇವೆ. ಸಿಂಧು ಜನವರಿಯಿಂದ ಸತತ ಟೂರ್ನಿಗಳನ್ನು ಆಡಲಿದ್ದಾರೆ. ಅವರ ಬಿಡುವಿಲ್ಲದ ವೇಳಾಪಟ್ಟಿಯಿಂದಾಗಿ ನಾವು ಡಿಸೆಂಬರ್ 22 ರಂದು ವಿವಾಹ ಸಮಾರಂಭ ನಿಗದಿಪಡಿಸಿದ್ದೇವೆ. 24 ರಂದು ಹೈದರಾಬಾದ್‌ನಲ್ಲಿ ಆರತಕ್ಷತೆ ಕಾರ್ಯಕ್ರಮ ನಡೆಯಲಿದೆ. ಜನವರಿಯಲ್ಲಿ ಸಿಂಧು ಅವರು ಬ್ಯಾಡ್ಮಿಂಟನ್​ ಅಂಗಳಕ್ಕೆ ಮರಳಲು ಸಾಧ್ಯವಾಗುವ ರೀತಿಯಲ್ಲಿ ಮದುವೆ ವೇಳಾಪಟ್ಟಿಯನ್ನು ನಿರ್ಧರಿಸಲಾಗಿದೆ. ಯಾಕೆಂದರೆ ಮುಂದಿನ ಟೂರ್ನಮೆಂಟ್​ ಆಕೆಗೆ ಬಹಳ ಮುಖ್ಯವಾಗಿದೆ" ಎಂದು ಸಿಂಧು ಅವರ ತಂದೆ ಪಿವಿ ರಮಣ ಇತ್ತೀಚೆಗೆ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಇದನ್ನೂ ಓದಿ:ತಿರುಪತಿ ದೇಗುಲದ ದರ್ಶನ ಪಡೆದ ನಟಿ ಕೀರ್ತಿ ಸುರೇಶ್: ಮದುವೆ ಬಗ್ಗೆ ಹೇಳಿದ್ದೇನು? ವಿಡಿಯೋ ನೋಡಿ