ಇತಿಹಾಸ ಸೃಷ್ಟಿಸಿದ ಲಿಯೋನೆಲ್ ಮೆಸ್ಸಿ ತಂಡ, ಕೊಲಂಬಿಯಾ ಮಣಿಸಿ 16ನೇ ಬಾರಿ ಕೋಪಾ ಅಮೆರಿಕ ಪ್ರಶಸ್ತಿ ಗೆದ್ದ ಅರ್ಜೆಂಟೀನಾ - Argentina wins Copa America Title

Argentina wins Copa America Title: ಲಿಯೋನೆಲ್ ಮೆಸ್ಸಿಯ ಅರ್ಜೆಂಟೀನಾ ತಂಡವು ಐತಿಹಾಸಿಕ ದಾಖಲೆ ನಿರ್ಮಿಸಿದೆ. 2024 ರ ಕೋಪಾ ಅಮೆರಿಕ ಫುಟ್‌ಬಾಲ್‌ ಫೈನಲ್ ಪಂದ್ಯದಲ್ಲಿ ಕೊಲಂಬಿಯಾ ವಿರುದ್ಧ ಅರ್ಜೆಂಟೀನಾ ತಂಡವು ಭರ್ಜರಿ ಗೆಲವು ಸಾಧಿಸಿದೆ.

ಮಿಯಾಮಿ ಗಾರ್ಡನ್ಸ್ (ಅಮೆರಿಕ):ಲಿಯೋನೆಲ್ ಮೆಸ್ಸಿ ಅವರ ಅರ್ಜೆಂಟೀನಾ ತಂಡವನ್ನು ತಡೆದು ನಿಲ್ಲಿಸಲು ಯಾರಿಂದಲೂ ಆಗದು ಎಂಬುದನ್ನ ಮತ್ತೊಮ್ಮೆ ಸಾಬೀತಾಗಿದೆ. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಫುಟ್​ಬಾಲ್​ನಲ್ಲಿ ಅರ್ಜೆಂಟೀನಾ ಪ್ರಾಬಲ್ಯ ಮತ್ತಷ್ಟು ಹೆಚ್ಚುತ್ತಿದೆ. ಹೌದು, ಇದೀಗ ಅರ್ಜೆಂಟೀನಾ ತಂಡವು ಕೋಪಾ ಅಮೆರಿಕ 2024 ಪ್ರಶಸ್ತಿಗೆ ಮುತ್ತಕ್ಕಿದೆ.

2024 ರ ಕೋಪಾ ಅಮೆರಿಕ ಫುಟ್‌ಬಾಲ್‌ ಫೈನಲ್ ಪಂದ್ಯದಲ್ಲಿ ಕೊಲಂಬಿಯಾವನ್ನು ಸೋಲಿಸುವ ಮೂಲಕ ಅರ್ಜೆಂಟೀನಾ ಕೋಪಾ ಅಮೆರಿಕ ಟ್ರೋಫಿಯನ್ನು ಗೆದ್ದುಕೊಂಡಿತು. ಅರ್ಜೆಂಟೀನಾ ತಂಡಕ್ಕೆ ಲಭಿಸಿರುವ 16ನೇ ಕೊಪಾ ಅಮೆರಿಕ ಪ್ರಶಸ್ತಿ ಇದಾಗಿದೆ. ಅರ್ಜೆಂಟೀನಾ ಸತತ ಎರಡನೇ ಬಾರಿ ಕೋಪಾ ಅಮೆರಿಕ ಪ್ರಶಸ್ತಿ ತನ್ನದಾಗಿಸಿಕೊಂಡಿದೆ. ಇದಕ್ಕೂ ಮುನ್ನ 2021ರ ಟೂರ್ನಿಯಲ್ಲಿ ಅರ್ಜೆಂಟೀನಾ ಫೈನಲ್‌ನಲ್ಲಿ ಬ್ರೆಜಿಲ್‌ ತಂಡವನ್ನು ಸೋಲಿಸಿ ಪ್ರಶಸ್ತಿ ಗೆದ್ದಿತ್ತು.

ಕುಣಿದು ಕುಪ್ಪಳಿಸಿದ ಅರ್ಜೆಂಟೀನಾ ತಂಡದ ಆಟಗಾರರು (AP)

2024ರ ಕೋಪಾ ಅಮೆರಿಕ ಫೈನಲ್ ಪಂದ್ಯವನ್ನು ಫ್ಲೋರಿಡಾದ ಹಾರ್ಡ್ ರಾಕ್ ಸ್ಟೇಡಿಯಂನಲ್ಲಿ ಸೋಮವಾರ (ಭಾರತೀಯ ಕಾಲಮಾನ) ನಡೆಯಿತು. ಫೈನಲ್​ ಪಂದ್ಯ ಅತ್ಯಂತ ರೋಚಕವಾಗಿತ್ತು. ಏಕೆಂದರೆ ಗೆಲುವಿನ ಗೋಲು ಫುಟ್‌ ಟೈಮ್‌ನಲ್ಲಿ ಅಲ್ಲ. ಆದರೆ, ಹೆಚ್ಚುವರಿ ಸಮಯದಲ್ಲಿ ಗಳಿಸಿತು. 90 ನಿಮಿಷಗಳ ಕಾಲ ಎರಡೂ ತಂಡಗಳಿಗೆ ಗೋಲಿನ ಖಾತೆ ತೆರೆಯಲು ಸಾಧ್ಯವಾಗಲಿಲ್ಲ. ಪಂದ್ಯವನ್ನು ಅರ್ಜೆಂಟೀನಾ 1-0 ಅಂತರದಿಂದ ಗೆದ್ದುಕೊಂಡಿತು. ಪಂದ್ಯದ ಏಕೈಕ ಗೋಲು 112ನೇ ನಿಮಿಷದಲ್ಲಿ (ಹೆಚ್ಚುವರಿ ಸಮಯ) ಗಳಿಸಿತು. ಇದನ್ನು ಅರ್ಜೆಂಟೀನಾದ ಲೌಟಾರೊ ಮಾರ್ಟಿನೆಜ್ ಗಳಿಸಿದರು. ಒಟ್ಟಾರೆ ಪಂದ್ಯಾವಳಿಯಲ್ಲಿ ಇದು ಅವರ ಐದನೇ ಗೋಲು, ಇದಕ್ಕಾಗಿ ಅವರಿಗೆ ಗೋಲ್ಡನ್ ಬೂಟ್ ಪ್ರಶಸ್ತಿ ಸಹ ನೀಡಲಾಯಿತು.

ಇತಿಹಾಸ ಸೃಷ್ಟಿಸಿದ ಲಿಯೋನೆಲ್ ಮೆಸ್ಸಿ ತಂಡ, ಕೊಲಂಬಿಯಾ ಮಣಿಸಿ 16ನೇ ಬಾರಿ ಕೋಪಾ ಅಮೆರಿಕ ಪ್ರಶಸ್ತಿ ಗೆದ್ದ ಅರ್ಜೆಂಟೀನಾ (AP)

ಗಾಯದಿಂದ ಹೊರಗುಳಿದ ಲಿಯೋನೆಲ್ ಮೆಸ್ಸಿ: ಅರ್ಜೆಂಟೀನಾದ ಸ್ಟಾರ್ ಲಿಯೋನೆಲ್ ಮೆಸ್ಸಿ ಗಾಯದ ಕಾರಣದಿಂದಾಗಿ ಇಡೀ ಪಂದ್ಯ ಆಡಲು ಸಾಧ್ಯವಾಗಲಿಲ್ಲ. ಪಂದ್ಯದ 66ನೇ ನಿಮಿಷದಲ್ಲಿ ಮೆಸ್ಸಿ ಅವರ ಕಾಲಿಗೆ ಗಾಯವಾಯಿತು. ಇದರಿಂದಾಗಿ ಅವರು ಹೊರ ಹೋಗಬೇಕಾಯಿತು. ಗಾಯದಿಂದಾಗಿ, ಅವರು ಬೆಂಚ್ ಮೇಲೆ ಕುಳಿತು ಅಳಲು ಪ್ರಾರಂಭಿಸಿದರು. ಆದರೆ, ತಂಡದ ಉಳಿದ ಆಟಗಾರರು ಮೆಸ್ಸಿ ಅನುಪಸ್ಥಿತಿ ಅನುಭವಿಸಲು ಬಿಡದೇ ಪಂದ್ಯ ಗೆದ್ದರು.

2024ರ ಕೋಪಾ ಅಮೆರಿಕ ಪ್ರಶಸ್ತಿಯನ್ನು ಗೆಲ್ಲುವ ಮೂಲಕ ಅರ್ಜೆಂಟೀನಾ ಪಂದ್ಯಾವಳಿಯ ಅತ್ಯಂತ ಯಶಸ್ವಿ ತಂಡವಾಗಿ ಹೊರಹೊಮ್ಮಿತು. ಈ ಬಾರಿ ತಂಡವು 16ನೇ ಪ್ರಶಸ್ತಿ ಗೆಲ್ಲುವ ಮೂಲಕ ಉರುಗ್ವೆ ತಂಡವನ್ನು ಹಿಂದಿಕ್ಕಿದೆ. ಈ ಋತುವಿನ ಮೊದಲು ಅರ್ಜೆಂಟೀನಾ ಮತ್ತು ಉರುಗ್ವೆ ತಲಾ 15 ಪ್ರಶಸ್ತಿಗಳನ್ನು ಗೆದ್ದಿದ್ದವು.

ಇದನ್ನೂ ಓದಿ:4ನೇ ಬಾರಿಗೆ ಯುರೋ ಕಪ್ ಪ್ರಶಸ್ತಿ ಮುಡಿಗೇರಿಸಿಕೊಂಡ ಸ್ಪೇನ್: ಫೈನಲ್​ನಲ್ಲಿ 2-1 ಗೋಲುಗಳ ಅಂತರದಿಂದ ಸೋತ ಇಂಗ್ಲೆಂಡ್ - Spain Beat England