ರಾಜ ಚಾರ್ಲ್ಸ್ III ಸಹೋದರಿ ರಾಜಕುಮಾರಿ ಅನ್ನಿ ತಲೆಗೆ ಗಾಯ, ಆಸ್ಪತ್ರೆಗೆ ದಾಖಲು - Princess Anne is injured

ಬ್ರಿಟನ್​ ರಾಜ ಚಾರ್ಲ್ಸ್ IIIರ ಸಹೋದರಿ ರಾಜಕುಮಾರಿ ಅನ್ನಿ ತಲೆಗೆ ಗಾಯವಾಗಿದ್ದು, ಅವರು ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಲಂಡನ್: ಬ್ರಿಟನ್ ಕಿಂಗ್ ಚಾರ್ಲ್ಸ್ III ರ ಏಕೈಕ ಸಹೋದರಿ ಬ್ರಿಟನ್‌ನ ರಾಜಕುಮಾರಿ ಅನ್ನಿ ತಲೆಗೆ ಗಾಯವಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ನ್ಯೂಯಾರ್ಕ್ ಪೋಸ್ಟ್​ ವರದಿ ಮಾಡಿದೆ.

ಗ್ಯಾಟ್‌ಕೊಂಬ್ ಪಾರ್ಕ್ ಎಸ್ಟೇಟ್‌ನಲ್ಲಿ ಭಾನುವಾರ ರಾತ್ರಿ ಈ ಘಟನೆ ನಡೆದಿದೆ. "ನಿನ್ನೆ ಸಂಜೆ ಗ್ಯಾಟ್‌ಕೊಂಬ್ ಪಾರ್ಕ್ ಎಸ್ಟೇಟ್‌ನಲ್ಲಿ ನಡೆದ ಘಟನೆಯಲ್ಲಿ ರಾಜಕುಮಾರಿ ರಾಯಲ್‌ಗೆ(ಅನ್ನಿ) ಸಣ್ಣ ಗಾಯಗಳಾಗಿವೆ" ಎಂದು ಬಕಿಂಗ್‌ಹ್ಯಾಮ್ ಅರಮನೆ ತನ್ನ ಹೇಳಿಕೆಯಲ್ಲಿ ಸೋಮವಾರ ತಿಳಿಸಿದೆ. " ಬ್ರಿಸ್ಟಲ್‌ನ ಸೌತ್‌ಮಿಡ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನಡೆಯುತ್ತಿದ್ದು, ಶೀಘ್ರವಾಗಿ ಚೇತರಿಸಿಕೊಳ್ಳುವ ನಿರೀಕ್ಷೆಯಿದೆ" ಎಂದು ಹೇಳಿಕೆಯಲ್ಲಿ ಸೇರಿಸಲಾಗಿದೆ. ಅರಮನೆಯ ಅಧಿಕಾರಿಗಳು ಈ ಘಟನೆಯ ಬಗ್ಗೆ ಕಿಂಗ್ ಚಾರ್ಲ್ಸ್‌ಗೆ ತಿಳಿಸಲಾಗಿದೆ ಎಂದಿದ್ದಾರೆ.

ಸದ್ಯಕ್ಕಿರುವ ಮಾಹಿತಿ ಪ್ರಕಾರ, ಭಾನುವಾರ ರಾತ್ರಿ ರಾಜಮನೆತನದ ಮೈದಾನದ ಸುತ್ತಲೂ ಓಡಾಡುತ್ತಿದ್ದಾಗ 73 ವರ್ಷದ ರಾಜಕುಮಾರಿ ಅನ್ನಿ ಕುದುರೆಯ ಕಾಲಿನ ಅಡಿ ಅಥವಾ ತಲೆ ಭಾಗದಡಿ ಸಿಲುಕಿ ಗಾಯಗೊಂಡಿರಬಹುದು ಎಂಬ ಶಂಕೆ ವ್ಯಕ್ತವಾಗಿದೆ.

ಇದನ್ನೂ ಓದಿ:ರಾಜತಾಂತ್ರಿಕತೆಗೆ ಮಹಿಳೆಯರ ಕೊಡುಗೆ ಶ್ಲಾಘನೆಗೆ ಅಂತಾರಾಷ್ಟ್ರೀಯ ಮಹಿಳಾ ರಾಜತಾಂತ್ರಿಕರ ದಿನಾಚರಣೆ - Contribution of Women to Diplomacy