ರಾವಲ್ಪಿಂಡಿ: ಪಾಕಿಸ್ತಾನ ಸೇನೆಯು ತನ್ನ ಮೇಲ್ಮೈಯಿಂದ ಮೇಲ್ಮೈಗೆ ದಾಳಿ ಮಾಡುವ ಬ್ಯಾಲಿಸ್ಟಿಕ್ ಕ್ಷಿಪಣಿ ಶಾಹೀನ್ -2 ನ ಯಶಸ್ವಿ ತರಬೇತಿ ಉಡಾವಣೆಯನ್ನು ನಡೆಸಿದೆ ಎಂದು ಸೇನೆ ತಿಳಿಸಿದೆ.
"ಕ್ಷಿಪಣಿಯ ಬಗ್ಗೆ ಸೈನಿಕರಿಗೆ ತರಬೇತಿ ನೀಡುವುದು, ವಿವಿಧ ತಾಂತ್ರಿಕ ನಿಯತಾಂಕಗಳನ್ನು ಮೌಲ್ಯೀಕರಿಸುವುದು ಮತ್ತು ಸುಧಾರಿತ ನಿಖರತೆ ಮತ್ತು ವರ್ಧಿತ ಕಾರ್ಯಕ್ಷಮತೆಗಾಗಿ ಕ್ಷಿಪಣಿಯಲ್ಲಿ ಅಳವಡಿಸಲಾದ ವಿವಿಧ ಉಪ ವ್ಯವಸ್ಥೆಗಳ ಕಾರ್ಯಕ್ಷಮತೆಯ ಮೌಲ್ಯಮಾಪನ ಮಾಡುವುದು ತರಬೇತಿ ಉಡಾವಣೆಯ ಉದ್ದೇಶವಾಗಿದೆ" ಎಂದು ಸೇನೆ ಹೇಳಿಕೆಯಲ್ಲಿ ತಿಳಿಸಿದೆ.
ಆದರೆ ಕ್ಷಿಪಣಿಯ ಬಗ್ಗೆ ಯಾವುದೇ ಹೆಚ್ಚಿನ ತಾಂತ್ರಿಕ ಮಾಹಿತಿಯನ್ನು ಸೇನೆ ಒದಗಿಸಿಲ್ಲ. ತರಬೇತಿ ಉಡಾವಣೆಯ ಸಂದರ್ಭದಲ್ಲಿ ಯುದ್ಧತಂತ್ರದ ಯೋಜನೆಗಳ ವಿಭಾಗ, ಸೇನಾ ಯುದ್ಧತಂತ್ರ ಪಡೆಗಳ ಕಮಾಂಡ್ನ ಹಿರಿಯ ಅಧಿಕಾರಿಗಳು, ವಿಜ್ಞಾನಿಗಳು ಮತ್ತು ಯುದ್ಧತಂತ್ರ ಸಂಸ್ಥೆಗಳ ಎಂಜಿನಿಯರ್ಗಳು ಹಾಜರಿದ್ದರು. ಈ ಸಾಧನೆಗೆ ಕೊಡುಗೆ ನೀಡಿದ ವಿಜ್ಞಾನಿಗಳ ತಾಂತ್ರಿಕ ಪರಾಕ್ರಮ, ಸಮರ್ಪಣೆ ಮತ್ತು ಬದ್ಧತೆಯನ್ನು ಸ್ಟ್ರಾಟೆಜಿಕ್ ಪ್ಲಾನ್ಸ್ ವಿಭಾಗದ ಮಹಾನಿರ್ದೇಶಕರು ಶ್ಲಾಘಿಸಿದರು.
ಈ ಕ್ಷಿಪಣಿ ಪರೀಕ್ಷೆಯ ಮೂಲಕ ಪಾಕಿಸ್ತಾನವು ದಕ್ಷಿಣ ಏಷ್ಯಾದಲ್ಲಿ ತನ್ನ ಶಕ್ತಿಯನ್ನು ತೋರಿಸಿದೆ. ಶಾಹೀನ್ ಕ್ಷಿಪಣಿಯ ತೂಕ 23,600 ಕೆ.ಜಿ. ಆಗಿದ್ದು, ಇದರ ಉದ್ದ 17.2 ಮೀಟರ್ ಮತ್ತು ವ್ಯಾಸ 1.4 ಮೀಟರ್. ಇದು 1230 ಕೆಜಿ ಸಿಡಿತಲೆಯನ್ನು ಹೊತ್ತೊಯ್ಯಬಹುದು ಮತ್ತು ಪರಮಾಣು ಶಸ್ತ್ರಾಸ್ತ್ರಗಳನ್ನು ಸಹ ಹೊತ್ತೊಯ್ದು ದಾಳಿ ಮಾಡಬಲ್ಲದು. ಈ ಕ್ಷಿಪಣಿಯು 2200 ಕಿ.ಮೀ ವರೆಗೆ ಚಲಿಸಬಲ್ಲದು. ಅಂದರೆ ಇದು ಪಾಕಿಸ್ತಾನದ ಲಾಹೋರ್ ನಿಂದ ದಕ್ಷಿಣ ಭಾರತದ ದೊಡ್ಡ ನಗರವಾದ ಚೆನ್ನೈವರೆಗೆ ದಾಳಿ ಮಾಡುವ ಸಾಮರ್ಥ್ಯವನ್ನು ಹೊಂದಿದೆ.
ಇದು ಎರಡು ಹಂತದ ಕ್ಷಿಪಣಿಯಾಗಿದ್ದು, ಸ್ವಯಂಚಾಲಿತ ಪ್ರಸರಣದಲ್ಲಿ ಕಾರ್ಯನಿರ್ವಹಿಸುತ್ತದೆ. ಘನ ಪ್ರೊಪೆಲ್ಲಂಟ್ ಇಂಧನದಿಂದ ಹಾರುವ ಈ ಕ್ಷಿಪಣಿಯ ನಿಖರತೆ 350 ಮೀಟರ್ಗಿಂತ ಕಡಿಮೆಯಾಗಿದೆ. ಅಂದರೆ ಕ್ಷಿಪಣಿಯು ಯಾವುದನ್ನಾದರೂ ಗುರಿ ಇಟ್ಟರೆ ಅದು ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲ. ಈ ಕ್ಷಿಪಣಿ ಬೀಳುವ ಸ್ಥಳದಲ್ಲಿ ಸುಮಾರು 350 ಮೀಟರ್ ದೂರದವರೆಗೆ ವಿನಾಶವನ್ನುಂಟು ಮಾಡುತ್ತದೆ.
ಶಾಹೀನ್-2 ಅನ್ನು ಪಾಕಿಸ್ತಾನದ ರಾಷ್ಟ್ರೀಯ ಎಂಜಿನಿಯರಿಂಗ್ ಮತ್ತು ವೈಜ್ಞಾನಿಕ ಆಯೋಗ ಜಂಟಿಯಾಗಿ ಅಭಿವೃದ್ಧಿಪಡಿಸಿವೆ. ಇದನ್ನು ಮೊದಲ ಬಾರಿಗೆ ಮಾರ್ಚ್ 2000 ರಲ್ಲಿ ಪ್ರದರ್ಶಿಸಲಾಯಿತು. ಈ ಕ್ಷಿಪಣಿಯು ಮಾರ್ಚ್ 2004 ರಲ್ಲಿ ಮೊದಲ ಪರೀಕ್ಷೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿತು.
ಇದನ್ನೂ ಓದಿ : ತೀವ್ರಗೊಂಡ ಉಕ್ರೇನ್ ದಾಳಿ: ರಷ್ಯಾದ ಕುರ್ಸ್ಕ್ನಿಂದ 1 ಲಕ್ಷ 21 ಸಾವಿರ ಜನರ ಸ್ಥಳಾಂತರ - Russia Ukraine War
