ನವದೆಹಲಿ: ಎಂಟೋಡ್ ಫಾರ್ಮಾಸ್ಯುಟಿಕಲ್ಸ್ ತನ್ನ ಉತ್ಪನ್ನವಾದ PresVu ಐ ಡ್ರಾಪ್ಸ್ ಕುರಿತು ಮಾಧ್ಯಮಗಳಿಗೆ ಮತ್ತು ಸಾರ್ವಜನಿಕರಿಗೆ ಅನೈತಿಕ ಮತ್ತು ಸುಳ್ಳು ಪ್ರಚಾರ ಮಾಡಿದೆ ಎಂಬ ಆರೋಪಗಳನ್ನು ತಳ್ಳಿಹಾಕಿದೆ.
ಈ ಬಗ್ಗೆ ಎಂಟೋಡ್ ಫಾರ್ಮಾಸ್ಯುಟಿಕಲ್ಸ್‌ನ ಸಿಇಒ ನಿಖಿಲ್ ಕೆ ಮಸೂರ್ಕರ್ ಪ್ರತಿಕ್ರಿಯಿಸಿ, "ಪ್ರೆಸ್ವು ಐ ಡ್ರಾಪ್ಸ್ ಕುರಿತಾಗಿ ನಾವು ಯಾವುದೇ ಅನೈತಿಕ ಅಥವಾ ಸುಳ್ಳು ಸಂಗತಿಗಳನ್ನು ಮಾಧ್ಯಮಗಳಿಗೆ ಅಥವಾ ಸಾರ್ವಜನಿಕರಿಗೆ ನೀಡಿಲ್ಲ. ಮಾಧ್ಯಮಗಳಿಗೆ ಬಹಿರಂಗಪಡಿಸಲಾದ ಎಲ್ಲಾ ಸಂಗತಿಗಳು ವಯಸ್ಕರಲ್ಲಿ ಪ್ರೆಸ್ಬಿಯೋಪಿಯಾ ಚಿಕಿತ್ಸೆಗಾಗಿ ಅನುಮೋದಿತ ಸೂಚನೆ ಮತ್ತು ನಾವು ಮಾಡಿದ ಮೂರು ಹಂತಗಳ ಕ್ಲಿನಿಕಲ್ ಪ್ರಯೋಗ ದತ್ತಾಂಶದ ಆಧಾರಿತವಾಗಿವೆ. ಸುದ್ದಿಗಳಲ್ಲಿ ಪ್ರಕಟಿಸಲಾದ ಕೆಲವು ಅಭಿಪ್ರಾಯಗಳು ಎಂಟೋಡ್ ಫಾರ್ಮಾಸ್ಯುಟಿಕಲ್ಸ್ ಅಥವಾ ಅದರ ಯಾವುದೇ ವಕ್ತಾರರನ್ನು ಪ್ರತಿನಿಧಿಸುವುದಿಲ್ಲ" ಎಂದಿದ್ದಾರೆ.
"ಪ್ರೆಸ್ವು ಹಲವು ವರ್ಷಗಳ ಸಂಶೋಧನೆ ಮತ್ತು ಅಭಿವೃದ್ಧಿಯ ಫಲಿತಾಂಶವಾಗಿದೆ. ಈ ಡಿಸಿಜಿಐ ಅನುಮೋದನೆ ಭಾರತದಲ್ಲಿ ಕಣ್ಣಿನ ಆರೈಕೆಗೆ ನಮ್ಮ ಧ್ಯೇಯದಲ್ಲಿ ಪ್ರಮುಖ ಹೆಜ್ಜೆಯಾಗಿದೆ. ಪ್ರೆಸ್ವು ಲಕ್ಷಾಂತರ ಜನರಿಗೆ ತಮ್ಮ ಕಣ್ಣಿನ ದೃಶ್ಯ ಸಾಮರ್ಥ್ಯ ಹೆಚ್ಚಿಸಿಕೊಳ್ಳಲು ಪರಿಹಾರವಾಗಿದೆ. ನಾವೀನ್ಯತೆ ಮತ್ತು ಕೈಗೆಟುಕುವ ದರದಲ್ಲಿ ಆರೋಗ್ಯ ಪರಿಹಾರಗಳನ್ನು ಒದಗಿಸುವ ನಮ್ಮ ಬದ್ಧತೆಯ ಬಗ್ಗೆ ನಾವು ಹೆಮ್ಮೆಪಡುತ್ತೇವೆ "ಎಂದು ಹೇಳಿದ್ದಾರೆ.