ಹಲವು ವರ್ಷಗಳ ಬಳಿಕ ತೆರೆಗೆ ಬರಲಿದೆ ಮಕ್ಕಳ ಸಿನಿಮಾ: ಸೆ.13ಕ್ಕೆ 'ದಿ ಜರ್ನಿ ಅಫ್ ಬೆಳ್ಳಿ' ರಿಲೀಸ್ - The Journey of Belli

'ದಿ ಜರ್ನಿ ಅಫ್ ಬೆಳ್ಳಿ' ಎಂಬ ಮಕ್ಕಳ ಸಿನಿಮಾ ಸೆ.13ರಂದು ತೆರೆಕಾಣಲಿದೆ. ಚಿತ್ರ ನಿರ್ಮಾಪಕ, ನಿರ್ದೇಶಕಿ ಮತ್ತು ಬಾಲ ಕಲಾವಿದೆ ಈಟಿವಿ ಭಾರತದ ಜೊತೆ ತಮ್ಮ ಅನಿಸಿಕೆ ಹಂಚಿಕೊಂಡಿದ್ದಾರೆ.

ಮಂಗಳೂರು (ದಕ್ಷಿಣ ಕನ್ನಡ): ಇತ್ತೀಚಿನ ದಿನಗಳಲ್ಲಿ ಮಕ್ಕಳ‌ ಸಿನಿಮಾಗಳ ಸಂಖ್ಯೆ ಕಡಿಮೆಯಾಗಿದೆ. ಬಾಲಿವುಡ್, ಸ್ಯಾಂಡಲ್​​ವುಡ್ ಸೇರಿದಂತೆ ಯಾವ ಚಿತ್ರರಂಗ ಕೂಡಾ ಮಕ್ಕಳ ಸಿನಿಮಾ ನಿರ್ಮಾಣದತ್ತ ಹೆಚ್ಚಿನ ಆಸಕ್ತಿ ವಹಿಸುತ್ತಿಲ್ಲ. ಈ ಕೊರತೆಯ ನಡುವೆ ಕನ್ನಡದಲ್ಲಿ ಮಕ್ಕಳ ಚಿತ್ರವೊಂದು ನಿರ್ಮಾಣವಾಗಿದೆ. ಫಿನಿಕ್ಸ್ ಫಿಲ್ಮ್ ಲಾಂಛನದಡಿಯಲ್ಲಿ 'ದಿ ಜರ್ನಿ ಅಫ್ ಬೆಳ್ಳಿ' ಎಂಬ ಸಿನಿಮಾ ನಿರ್ಮಾಣಗೊಂಡಿದ್ದು, ಸೆ.13ರಂದು ತೆರೆಕಾಣಲಿದೆ.

'ದಿ ಜರ್ನಿ ಅಫ್ ಬೆಳ್ಳಿ' ದೇಶಪ್ರೇಮ ಬಿಂಬಿಸುವ ಕನ್ನಡ ಸಿನಿಮಾ. 9 ವರ್ಷದ ಹುಡುಗಿ ಗಡಿಭಾಗದಲ್ಲಿ ಕರ್ತವ್ಯನಿರತನಾಗಿರುವ ತನ್ನ ತಂದೆಯ ಬರುವಿಕೆಗಾಗಿ ಕಾಯುವ ಕಥೆಯನ್ನೊಳಗೊಂಡಿದೆ. ಕೊಡಗು ಜಿಲ್ಲೆಯಲ್ಲಿ ಚಿತ್ರೀಕರಣ ನಡೆಸಲಾಗಿದ್ದು, ಇದರಲ್ಲಿ ಕೊಡಗು ಸಂಸ್ಕೃತಿಯನ್ನು ತೋರಿಸಲಾಗಿದೆ.

ಈ‌ ಸಿನಿಮಾವನ್ನು ಮಂಗಳೂರಿನ ಮಹೇಂದ್ರ ಕುಮಾರ್ ಅವರು ನಿರ್ಮಾಣ ಮಾಡಿದ್ದಾರೆ. ಈ ಮೊದಲು ಮಹೇಂದ್ರ ಕುಮಾರ್ 'ಕಾರ್ನಿಕದ ಕಲ್ಲುರ್ಟಿ' ಎಂಬ ಚಿತ್ರ ನಿರ್ಮಾಣ ಮಾಡಿದ್ದರು. 'ದಿ ಜರ್ನಿ ಅಫ್ ಬೆಳ್ಳಿ' ‌ ಅವರ ಎರಡನೇ ಸಿನಿಮಾ. 'ದಿ ಜರ್ನಿ ಅಫ್ ಬೆಳ್ಳಿ' ಬಿಡುಗಡೆಗೂ ಮುನ್ನ ಹಲವು ಅಂತಾರಾಷ್ಟ್ರೀಯ ಫಿಲ್ಮ್ ಫೆಸ್ಟಿವಲ್​ಗಳಲ್ಲಿ ಭಾಗವಹಿಸಿದೆ.

ಮೊಕ್ಕೊ ಇಂಟರ್​​ನ್ಯಾಷನಲ್ ಫೆಸ್ಟಿವಲ್​​ನಲ್ಲಿ ಬೆಸ್ಟ್ ಪ್ರೊಡ್ಯೂಸರ್, ಬೆಸ್ಟ್ ಡೆಬ್ಯೂ ಫಿಲ್ಮ್ ಮೇಕರ್, ಕ್ರೌನ್ ವುಡ್ ಇಂಟರ್​ನ್ಯಾಷನಲ್ ಫೆಸ್ಟಿವಲ್​​ನಲ್ಲಿ ಬೆಸ್ಟ್ ಚಿಲ್ಡ್ರನ್ಸ್ ಫಿಲ್ಮ್, ಇಂಡೋ ಫ್ರೆಂಚ್ ಇಂಟರ್ ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್​​ನಲ್ಲಿ ವಿನ್ನರ್, ತ್ರಿಲೋಕ‌ ಇಂಟರ್ ನ್ಯಾಷನಲ್ ಫಿಲ್ಮ್ ಫೇರ್ ಅವಾರ್ಡ್​​ನಲ್ಲಿ ಬೆಸ್ಟ್ ಪ್ರೊಡ್ಯೂಸರ್, ಬೆಸ್ಟ್ ವುಮೆನ್ ಡೈರೆಕ್ಟರ್, ಬಿರ್ಸಮುಂಡ ಇಂಟರ್​​ನ್ಯಾಷನಲ್ ಫಿಲ್ಮ್ ಅವಾರ್ಡ್ ಸ್ಪೆಷಲ್ ಜ್ಯೂರಿ ಅವಾರ್ಡ್, ರೋಶನಿ ಇಂಟರ್ ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್​ನಲ್ಲಿ ಬೆಸ್ಟ್ ಚಿಲ್ಡ್ರನ್ ಫಿಲ್ಮ್ ಅವಾರ್ಡ್ ಪಡೆದುಕೊಂಡಿದೆ.

'ದಿ ಜರ್ನಿ ಅಫ್ ಬೆಳ್ಳಿ' ಪೋಸ್ಟರ್ (ETV Bharat)

ಈ ಬಗ್ಗೆ ಮಾತನಾಡಿದ ನಿರ್ಮಾಪಕ ಮಹೇಂದ್ರ ಕುಮಾರ್, ಇದು ಸೈನಿಕ ಮತ್ತು ಮಗಳ ಭಾಂದವ್ಯದ‌ ಮೇಲೆ ತೆಗೆದ ಕಥೆ. ಹತ್ತಕ್ಕೂ ಹೆಚ್ಚು ಇಂಟರ್​​ನ್ಯಾಷನಲ್ ಫಿಲ್ಮ್ ಫೆಸ್ಟಿವಲ್​​ನಲ್ಲಿ ಪ್ರಶಸ್ತಿಗಳು ಬಂದಿವೆ. ಸಿನಿಮಾ ಅದ್ಬುತವಾಗಿ ಮೂಡಿ ಬಂದಿದೆ ಎಂದು ತಿಳಿಸಿದರು.

ಗೌರಿ ಶ್ರೀನಿವಾಸ್ ಚಿತ್ರಕ್ಕೆ ಆ್ಯಕ್ಷನ್​​ ಕಟ್​ ಹೇಳಿದ್ದಾರೆ. ಲಿಚ್ಚಿ ಫಿಲಂಸ್ ಸಂಸ್ಥಾಪಕರಾದ ಗೌರಿ ಶ್ರೀನಿವಾಸ್ ಹಲವು ಸಿನಿಮಾಗಳನ್ನು ನಿರ್ದೇಶಿಸಿದ್ದಾರೆ. ಸಿನಿಮಾದ ಬಗ್ಗೆ ಮಾತನಾಡಿದ ಅವರು, ಈ ಸಿನಿಮಾಗೆ ಕಥೆ ಬರೆಯುವಾಗ ಒಂದು ಹೊಸತನ ತರಬೇಕೆಂದಿತ್ತು. ಈ ಕಥೆಯನ್ನು ನಿರ್ಮಾಪಕರಿಗೆ ಹೇಳಿದಾಗ ತುಂಬಾ ಖುಷಿ ಪಟ್ಟರು. ಸಿನಿಮಾದ ಬೆಳ್ಳಿ ಪಾತ್ರಕ್ಕೆ ಅಡಿಷನ್​​ನಲ್ಲಿ ಸಮನ್ವಿ ಆಯ್ಕೆಯಾದರು. ಸಮನ್ವಿಯದ್ದು ಇದು ಚೊಚ್ಚಲ ಚಿತ್ರ ಎಂದು ತಿಳಿಸಿದರು.

ಇದನ್ನೂ ಓದಿ:'ಅಮ್ಮ' ಅಧ್ಯಕ್ಷ ಸ್ಥಾನಕ್ಕೆ ಸೂಪರ್​ಸ್ಟಾರ್ ಮೋಹನ್​​ ಲಾಲ್​​ ರಾಜೀನಾಮೆ - Actor Mohanlal Resigns

ಈ‌ ಸಿನಿಮಾದ ಮುಖ್ಯಪಾತ್ರದಲ್ಲಿ ನಟಿಸಿರುವ ಬಾಲ ಕಲಾವಿದೆ ಸಮನ್ವಿ ಎಸ್ ಪಾಟೀಲ್ ಮೂಲತಃ ಹುಬ್ಬಳ್ಳಿಯ ಬಾಲಕಿ. ಭರವಸೆ ಮೂಡಿಸುವ ಈ ಬಾಲ ಪ್ರತಿಭೆ ಸಿನಿಮಾದಲ್ಲಿ ತುಂಬಾನೇ ಚೆನ್ನಾಗಿ ತಮ್ಮ ಪಾತ್ರ ನಿರ್ವಹಿಸಿದ್ದಾರೆ. ಈ ಬಗ್ಗೆ ಮಾತನಾಡಿದ ಸಮನ್ವಿ, ಪಾತ್ರ ನಿರ್ವಹಿಸುವಾಗ ಚಿತ್ರತಂಡದವರು ಉತ್ತಮವಾಗಿ ತಿಳಿಸಿಕೊಟ್ಟರು. ನಿರ್ದೇಶಕಿ ಚೆನ್ನಾಗಿ ಹೇಳಿಕೊಟ್ಟರು. ನನಗೆ ಮೊದಲ ಬಾರಿ ಕೊಡಗು ಸೀರೆ ಹಾಕಿದಾಗ ವಿಭಿನ್ನ ಎನಿಸಿತು. ಕೊಡಗು ಸಂಸ್ಕೃತಿ ತುಂಬಾನೇ ಇಷ್ಟವಾಯಿತು. ಸಿನಿಮಾ ಕೂಡಾ ಇಷ್ಟವಾಯಿತು ಎಂದು ತಿಳಿಸಿದರು.

ಇದನ್ನೂ ಓದಿ:'ಚಿತ್ರರಂಗ ಮಹಿಳೆಯರಿಗೆ ಸುರಕ್ಷಿತ ಸ್ಥಳವಾಗಬೇಕು': ಮಲಯಾಳಂ ಚಿತ್ರರಂಗದ ಕರಾಳತೆ ಬಗ್ಗೆ ಪೃಥ್ವಿರಾಜ್ ಸುಕುಮಾರನ್ ಪ್ರತಿಕ್ರಿಯೆ - Prithviraj Sukumaran

ಸೆ.13 ರಂದು ರಾಜ್ಯದ 30 ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಹಲವು ವರ್ಷಗಳ ಬಳಿಕ ಬರುತ್ತಿರುವ ಈ ಮಕ್ಕಳ ಸಿನಿಮಾ ಪ್ರೇಕ್ಷಕರ ಮನ ಗೆಲ್ಲುತ್ತದೆಯೇ? ಎಂಬುದನ್ನು ಕಾದು ನೋಡಬೇಕಾಗಿದೆ.