ಸೌತ್ ಸಿನಿಮಾ ಇಂಡಸ್ಟ್ರಿಯ ಸೂಪರ್ ಸ್ಟಾರ್ಗಳಾದ ಅಲ್ಲು ಅರ್ಜುನ್ ಮತ್ತು ಶ್ರೀಲೀಲಾ ಅಭಿನಯದ 'ಪುಷ್ಪ 2: ದಿ ರೂಲ್' ಚಿತ್ರದ ಬಹುನಿರೀಕ್ಷಿತ ಸ್ಪೆಷಲ್ ಸಾಂಗ್ 'ಕಿಸ್ಸಿಕ್' ಶನಿವಾರ ಅನಾವರಣಗೊಂಡಿದೆ. ಪುಷ್ಪಾ ಮೊದಲ ಭಾಗದ ಸಿನಿಮಾದ 'ಊ ಅಂಟಾವಾ' ಹಾಡಿನಲ್ಲಿ ಸೌತ್ ಸುಂದರಿ ಸಮಂತಾ ರುತ್ ಪ್ರಭು ಸೊಂಟ ಬಳುಕಿಸಿದ್ದರು. ಇದೀಗ ಸೆನ್ಸೇಶನಲ್ ಸ್ಟಾರ್ ಶ್ರೀಲೀಲಾ ಈ ಸಾಂಗ್ನಲ್ಲಿ ಆಕರ್ಷಕವಾಗಿ ಡ್ಯಾನ್ಸ್ ಮಾಡಿದ್ದಾರೆ. ತೆಲುಗು, ಕನ್ನಡ, ಹಿಂದಿ ಮತ್ತು ತಮಿಳು ಮಾತ್ರವಲ್ಲದೇ ಬಂಗಾಳಿ ಭಾಷೆಯಲ್ಲಿಯೂ ಹಾಡು ಲಭ್ಯವಿದೆ.
'ಪುಷ್ಪ 2: ದಿ ರೂಲ್' 2021ರಲ್ಲಿ ತೆರೆಕಂಡು ಬ್ಲಾಕ್ಬಸ್ಟರ್ ಹಿಟ್ ಆದ ಪುಷ್ಪ: ದಿ ರೈಸ್ ಚಿತ್ರದ ಮುಂದುವರಿದ ಭಾಗ. ಸಿನಿಮಾ ಬಿಡುಗಡೆಯ ಹೊಸ್ತಿಲಿನಲ್ಲಿದ್ದು, ಈಗಾಗಲೇ ಪ್ರಚಾರ ಪ್ರಾರಂಭಿಸಿದೆ. ಕಳೆದ ಭಾನುವಾರ ಅದ್ಧೂರಿಯಾಗಿ ಟ್ರೇಲರ್ ಅನಾವರಣಗೊಂಡಿತ್ತು.
ಸುಕುಮಾರ್ ಆ್ಯಕ್ಷನ್, ಕಟ್ ಹೇಳಿರುವ ಈ ಚಿತ್ರದ ಮುಖ್ಯಭೂಮಿಕೆಯಲ್ಲಿ ರಾಷ್ಟ್ರಪ್ರಶಸ್ತಿ ವಿಜೇತ ನಟ ಅಲ್ಲು ಅರ್ಜುನ್ ಮತ್ತು ಕನ್ನಡತಿ ರಶ್ಮಿಕಾ ಮಂದಣ್ಣ ಅಭಿನಯಿಸಿದ್ದಾರೆ. ನಟ ಫಹಾದ್ ಫಾಸಿಲ್ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಇವರ ಜೊತೆ ಜಗಪತಿ ಬಾಬು, ರಾವ್ ರಮೇಶ್, ಸುನೀಲ್, ಅನಸೂಯ, ಧನಂಜಯ್ ಸೇರಿದಂತೆ ಹಲವರು ಚಿತ್ರದಲ್ಲಿ ತಮ್ಮದೇ ಆದ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.