ಷೇರು ಮಾರುಕಟ್ಟೆ: ಸೆನ್ಸೆಕ್ಸ್​ 104, ನಿಫ್ಟಿ 32 ಅಂಕಗಳ ಏರಿಕೆ

ಸೋಮವಾರದ ವಹಿವಾಟಿನಲ್ಲಿ ಭಾರತದ ಷೇರು ಮಾರುಕಟ್ಟೆಗಳು ಅಲ್ಪ ಇಳಿಕೆಯೊಂದಿಗೆ ಕೊನೆಗೊಂಡಿವೆ.

ಮುಂಬೈ: ಭಾರತೀಯ ಬೆಂಚ್ ಮಾರ್ಕ್ ಸೂಚ್ಯಂಕಗಳಾದ ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೋಮವಾರ (ಮಾರ್ಚ್ 18) ಆರಂಭಿಕ ವಹಿವಾಟಿನಲ್ಲಿ ಇಳಿಕೆಯಲ್ಲಿ ವಹಿವಾಟು ಆರಂಭಿಸಿದ ನಂತರ ಅಲ್ಪ ಏರಿಕೆಯೊಂದಿಗೆ ಕೊನೆಗೊಂಡವು. 72,587.30ಕ್ಕೆ ಇಳಿದ ಸೆನ್ಸೆಕ್ಸ್ ಇಂಟ್ರಾಡೇ ವಹಿವಾಟಿನಲ್ಲಿ 72,985.89 ಮತ್ತು 72,314.16 ರ ಗರಿಷ್ಠ ಮತ್ತು ಕನಿಷ್ಠ ಮಟ್ಟಗಳ ನಡುವೆ ಏರಿಳಿತ ಕಂಡಿತು. ಸೆನ್ಸೆಕ್ಸ್ ತನ್ನ ಹಿಂದಿನ ಗರಿಷ್ಠ ಮಟ್ಟದಿಂದ ಸ್ವಲ್ಪ ಲಾಭ ಕಳೆದುಕೊಂಡಿದ್ದರೂ, ಸೆನ್ಸೆಕ್ಸ್ 104.99 ಪಾಯಿಂಟ್ ಅಥವಾ 0.14% ಏರಿಕೆ ಕಂಡು 72,748.42 ರಲ್ಲಿ ಕೊನೆಗೊಂಡಿದೆ.

ಏತನ್ಮಧ್ಯೆ, 21,990.10 ಕ್ಕೆ ಇಳಿದ ನಿಫ್ಟಿ 50, ಕನಿಷ್ಠ 21,916.55 ಮತ್ತು ಗರಿಷ್ಠ 22,123.70 ರ ನಡುವೆ ವ್ಯವಹಾರ ನಡೆಸಿತು. ನಿಫ್ಟಿ 32.35 ಪಾಯಿಂಟ್ ಅಥವಾ ಶೇಕಡಾ 0.15ರಷ್ಟು ಏರಿಕೆ ಕಂಡು 22,055.70 ರಲ್ಲಿ ಕೊನೆಗೊಂಡಿದೆ. ಟಾಟಾ ಸ್ಟೀಲ್, ಮಹೀಂದ್ರಾ & ಮಹೀಂದ್ರಾ, ಜೆಎಸ್ ಡಬ್ಲ್ಯೂ ಸ್ಟೀಲ್, ಟಾಟಾ ಮೋಟಾರ್ಸ್ ಮತ್ತು ಆಕ್ಸಿಸ್ ಬ್ಯಾಂಕ್ ಸೆನ್ಸೆಕ್ಸ್​ನಲ್ಲಿ ಹೆಚ್ಚು ಲಾಭ ಗಳಿಸಿದರೆ, ಇನ್ಫೋಸಿಸ್, ಟಿಸಿಎಸ್, ಟೈಟಾನ್, ವಿಪ್ರೋ ಮತ್ತು ಎಚ್​ಯುಎಲ್ ನಷ್ಟ ಅನುಭವಿಸಿದವು.

ಏತನ್ಮಧ್ಯೆ ನಿಫ್ಟಿ- 50ಯಲ್ಲಿ ಟಾಟಾ ಸ್ಟೀಲ್, ಮಹೀಂದ್ರಾ & ಮಹೀಂದ್ರಾ, ಜೆಎಸ್​ಡಬ್ಲ್ಯೂ ಸ್ಟೀಲ್, ಟಾಟಾ ಮೋಟಾರ್ಸ್ ಮತ್ತು ಅಪೊಲೊ ಹಾಸ್ಪಿಟಲ್ ಎಂಟರ್ ಪ್ರೈಸಸ್ ಹೆಚ್ಚು ಲಾಭ ಗಳಿಸಿದವು ಮತ್ತು ಯುಪಿಎಲ್, ಇನ್ಫೋಸಿಸ್, ಟಾಟಾ ಕನ್ಸೂಮರ್ ಪ್ರಾಡಕ್ಟ್ಸ್, ಟಿಸಿಎಸ್ ಮತ್ತು ಟೈಟಾನ್ ನಷ್ಟಕ್ಕೀಡಾದವು. ನಿಫ್ಟಿ ಬ್ಯಾಂಕ್ ಸೂಚ್ಯಂಕ ಶೇ 0.04, ಹಣಕಾಸು ಸೇವೆಗಳು ಶೇ 0.09, ಐಟಿ ಮತ್ತು ಎಫ್ ಎಂಸಿಜಿ ಕ್ರಮವಾಗಿ ಶೇ 1.64 ಮತ್ತು ಶೇ 0.46ರಷ್ಟು ಕುಸಿತ ಕಂಡಿವೆ.

ಡಾಲರ್ ಎದುರು ರೂಪಾಯಿ ಮೌಲ್ಯ 4 ಪೈಸೆ ಏರಿಕೆ ಕಂಡು 82.84 ಕ್ಕೆ ತಲುಪಿದೆ. ಆರು ಕರೆನ್ಸಿಗಳ ವಿರುದ್ಧ ಅಮೆರಿಕದ ಕರೆನ್ಸಿಯನ್ನು ಅಳೆಯುವ ಡಾಲರ್ ಸೂಚ್ಯಂಕ 103.09 ಕ್ಕೆ ಸ್ವಲ್ಪ ಏರಿಕೆಯಾಗಿದೆ. ಅಂತಾರಾಷ್ಟ್ರೀಯ ಕಚ್ಚಾ ತೈಲ ಬೆಲೆಗಳು ಇಂದು ಮುಂಜಾನೆ ಏರಿಕೆಯಾಗಿದ್ದು, ಕಳೆದ ವಾರಕ್ಕಿಂತ ಶೇಕಡಾ 4 ರಷ್ಟು ಲಾಭ ಕಂಡಿವೆ. ಬ್ರೆಂಟ್ ತೈಲ ಬೆಲೆ ಶೇಕಡಾ 0.35 ರಷ್ಟು ಏರಿಕೆಯಾಗಿ 85.54 ಕ್ಕೆ ತಲುಪಿದ್ದರೆ, ಡಬ್ಲ್ಯುಟಿಐ ಬೆಲೆ ಶೇಕಡಾ 0.43 ರಷ್ಟು ಏರಿಕೆಯಾಗಿ 81.39 ಕ್ಕೆ ತಲುಪಿದೆ.

ಏಷ್ಯಾದ ಮಾರುಕಟ್ಟೆಗಳು ವಾರದ ಮೊದಲ ವಹಿವಾಟು ದಿನದಲ್ಲಿ ಏರಿಕೆ ಕಂಡವು. ನಿಕ್ಕಿ ಶೇಕಡಾ 2.17 ರಷ್ಟು ಏರಿಕೆ ಕಂಡು 39,538.06 ಕ್ಕೆ ತಲುಪಿದ್ದರೆ, ಕೊಸ್ಪಿ ಶೇಕಡಾ 0.64 ರಷ್ಟು ಏರಿಕೆ ಕಂಡು 2,683.72 ಕ್ಕೆ ತಲುಪಿದೆ.

ಇದನ್ನೂ ಓದಿ : ಮೊಮ್ಮಗನಿಗೆ 240 ಕೋಟಿ ರೂ. ಮೌಲ್ಯದ ಷೇರು ಉಡುಗೊರೆ ನೀಡಿದ ಇನ್ಪೋಸಿಸ್ ನಾರಾಯಣಮೂರ್ತಿ