ಔರಂಗಬಾದ್: 13 ವರ್ಷದ ಅಪ್ರಾಪ್ತ ವಯಸ್ಸಿನ ಖೋ- ಖೋ ಆಟಗಾರ್ತಿ ಮೇಲೆ ರಾಷ್ಟ್ರಮಟ್ಟದ ಆಟಗಾರನಾಗಿರುವ ಕೋಚ್ ಲೈಂಗಿಕ ದೌರ್ಜನ್ಯ ನಡೆಸಿರುವಂತಹ ಆಘಾತಕಾರಿ ಘಟನೆಯೊಂದು ಮಹಾರಾಷ್ಟ್ರದಲ್ಲಿ ಬೆಳಕಿಗೆ ಬಂದಿದೆ. ಈ ಸಂಬಂಧ ತರಬೇತುದಾರ, ಹೋಟೆಲ್ ಮಾಲೀಕ, ಮ್ಯಾನೇಜರ್ ಮೇಲೆ ವೇದಾಂತ್ನಗರ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಸ್ಪರ್ಧೆಗಾಗಿ ಮುಂಬೈಗೆ ಹೋಗಬೇಕು ಎಂದು ರೈಲ್ವೆ ನಿಲ್ದಾಣಕ್ಕೆ ಬರುವಂತೆ ಕೋಚ್ ಅಪ್ರಾಪ್ತ ಅಥ್ಲೀಟ್ ಪಟುವನ್ನು ಕರೆದಿದ್ದರು. ರೈಲ್ವೆ ನಿಲ್ದಾಣಕ್ಕೆ ಬಂದಿಳಿದ ಕಾರ್ ಬರುವುದಕ್ಕೆ ತಡವಾಗುತ್ತದೆ ಎಂದು ಹೇಳಿ ಹೋಟೆಲ್ಗೆ ಕರೆದೊಯ್ದಿದ್ದರು. ಈ ವೇಳೆ ತರಬೇತುದಾರ ಬಾಲಕಿ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ. ಘಟನೆ ಬಳಿಕ ಗ್ರಾಮ ಸೇರಿದ ನಂತರವೂ ಬಾಲಕಿಗೆ ತನ್ನೊಂದಿಗೆ ಸಹಕರಿಸುವಂತೆ ಕೋಚ್ ಬೇಡಿಕೆ ಇಟ್ಟಿದ್ದರು. ಇದರಿಂದ ನೊಂದ ಬಾಲಕಿ ಘಟನೆ ಕುರಿತು ಪೋಷಕರಿಗೆ ತಿಳಿಸಿದ್ದಾಳೆ. ಈ ವಿಷಯ ಅರಿತ ಬಾಲಕಿಯ ತಾಯಿ ಪೊಲೀಸರಿಗೆ ದೂರು ಸಲ್ಲಿಸಿದ್ದಾರೆ.
ಖೋ- ಖೋ ಆಟಗಾರ್ತಿ ಮೇಲೆ ದೌರ್ಜನ್ಯ: ಪೈಥಾನ್ ತಾಲೂಕಿನಲ್ಲಿ ಬಾಲಕಿ ವಿದ್ಯಾಭ್ಯಾಸ ಮಾಡುತ್ತಿದ್ದು, ಖೋ- ಖೋ ಆಟಗಾರ್ತಿಯಾಗಬೇಕು ಎಂಬ ಕನಸನ್ನು ಹೊಂದಿದ್ದಳು. ಇದಕ್ಕಾಗಿ ದೊಡ್ಡ ದೊಡ್ಡ ಟೂರ್ನಮೆಂಟ್ನಲ್ಲಿ ಆಕೆ ಆಟವಾಡಬೇಕಿತ್ತು. ಈ ವೇಳೆ ಆಕೆಯ ಕುಟುಂಬ ಬಾಲಕಿಗೆ ರಾಷ್ಟ್ರೀಯ ಆಟಗಾರರಾಗಿದ್ದ ಕೋಚ್ ಜಗನ್ನಾಥ್ ಶಿವಾಜಿ ಗೊರ್ಡೆ ಸಿದ್ಧತೆಗೆ ಸಹಾಯ ಮಾಡುತ್ತಾರೆ ಎಂದು ನಂಬಿದ್ದರು. ಸೆಪ್ಟೆಂಬರ್ 25ರಂದು ಟೂರ್ನಮೆಂಟ್ಗೆ ಮುಂಬೈಗೆ ಹೋಗಾಗಬೇಕಾಗುತ್ತದೆ ಎಂದು ಕೋಚ್ ಕೂಡ ಕುಟುಂಬಸ್ಥರಿಗೆ ನಂಬಿಸಿದ್ದರು. ಬಾಲಕಿಗೆ ಔರಂಗಾಬಾದ್ ರೈಲ್ವೆ ನಿಲ್ದಾಣಕ್ಕೆ ಬರುವಂತೆ ಹೇಳಿದ್ದರು. ಬಳಿಕ ಮುಂಬೈಗೆ ರಾತ್ರಿ ಟ್ರೈನ್ ಇದ್ದು, ಅಲ್ಲಿಯವರೆಗೆ ನಾವು ಹೋಟೆಲ್ನಲ್ಲಿ ವಿರಾಮ ಪಡೆಯೋಣ ಎಂದು ಬಾಲಕಿ ಮನವೊಲಿಸಿದ್ದರು. ಹೋಟೆಲ್ನಲ್ಲಿ ಕೋಣೆ ಬುಕ್ ಮಾಡಿದ್ದ ಕೋಚ್ ಆಕೆ ಮೇಲೆ ಬಲವಂತವಾಗಿ ದೌರ್ಜನ್ಯ ಎಸಗಿದ್ದಾರೆ ಎಂದು ದೂರು ದಾಖಲಾಗಿದೆ.
ನಿಲ್ಲದ ದೌರ್ಜನ್ಯ: ಘಟನೆಯಿಂದ ಭೀತಿಗೊಳಗಾಗಿದ್ದ ಬಾಲಕಿ, ಈ ಕುರಿತು ಯಾರಿಗೂ ಯಾವುದೇ ಮಾಹಿತಿಯನ್ನು ತಿಳಿಸಿರಲಿಲ್ಲ. ತನ್ನ ಗ್ರಾಮಕ್ಕೆ ಮರಳಿದ ಬಳಿಕ ಆಕೆಗೆ ಕರೆ ಮಾಡಿದ ಕೋಚ್ ತನ್ನೊಂದಿಗೆ ಸಹಕಾರ ನೀಡುವಂತೆ ಒತ್ತಾಯಿಸಿದ್ದ. ಇದರಿಂದ ಬೆದರಿದ ಬಾಲಕಿ ತಕ್ಷಣಕ್ಕೆ ಕುಟುಂಬಸ್ಥರಿಗೆ ತಿಳಿಸಿದ್ದಾಳೆ. ಘಟನೆ ಸಂಬಂಧ ಪೊಕ್ಸೊ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.
ಇದನ್ನೂ ಓದಿ: ಮುಂಬೈನ 14 ಅಂತಸ್ತಿನ ಕಟ್ಟಡದಲ್ಲಿ ಬೆಂಕಿ: ಮೂವರು ಸಾವು
