ಸಂದೇಶಖಾಲಿ ಪ್ರತಿಭಟನೆಗಳ ಹಿಂದೆ ಹಣದ ಆಟ: ಸಿಎಂ ಮಮತಾ ಶಂಕೆ

ಸಂದೇಶಖಾಲಿ ಪ್ರತಿಭಟನೆಗಳ ಹಿಂದೆ ಹಣ ಆಟವಾಡಿದೆ ಎಂದು ಸಿಎಂ ಮಮತಾ ಆರೋಪಿಸಿದ್ದಾರೆ.

ಕೋಲ್ಕತಾ: ಪಶ್ಚಿಮ ಬಂಗಾಳದ ಉತ್ತರ 24 ಪರಗಣ ಜಿಲ್ಲೆಯ ಸಂದೇಶ್ ಖಾಲಿಯಲ್ಲಿ ಈ ವರ್ಷದ ಆರಂಭದಲ್ಲಿ ಸ್ಥಳೀಯರು ಮತ್ತು ವಿಶೇಷವಾಗಿ ಮಹಿಳೆಯರು ನಡೆಸಿದ ಆಂದೋಲನದ ಹಿಂದೆ ಹಣ ಆಟವಾಡಿರಬಹುದು ಎಂದು ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಸೋಮವಾರ ಶಂಕೆ ವ್ಯಕ್ತಪಡಿಸಿದ್ದಾರೆ.

ಅಮಾನತುಗೊಂಡ ತೃಣಮೂಲ ಕಾಂಗ್ರೆಸ್ ನಾಯಕ ಶೇಖ್ ಶಹಜಹಾನ್ ಅವರ ವಿರುದ್ಧ ಕೇಳಿ ಬಂದಿದ್ದ ಲೈಂಗಿಕ ಕಿರುಕುಳ ಮತ್ತು ಅಕ್ರಮ ಭೂ ಕಬಳಿಕೆ ವಿರುದ್ಧ ಸ್ಥಳೀಯರು ಆಂದೋಲನ ನಡೆಸಿದ್ದರು. ಸದ್ಯ ಈ ಬಗ್ಗೆ ಸಿಎಂ ಮಮತಾ ಮಾತನಾಡಿದ್ದಾರೆ.

ಜಿಲ್ಲೆಯ ಕರಾವಳಿಯ ದ್ವೀಪಗಳ ಸಂಗಮವಾದ ಸಂದೇಶ್ ಖಾಲಿಯಲ್ಲಿ ಸ್ಥಳೀಯರ ಆಂದೋಲನದ ನಂತರ ಇದೇ ಮೊದಲ ಬಾರಿಗೆ ಸೋಮವಾರ ಸಾರ್ವಜನಿಕ ಸಭೆಯಲ್ಲಿ ಮಾತನಾಡಿದ ಮಮತಾ, ನೇರವಾಗಿ ಪ್ರತಿಭಟನೆಗಳ ಬಗ್ಗೆ ಉಲ್ಲೇಖಿಸದಿದ್ದರೂ ಪರೋಕ್ಷವಾಗಿ ಈ ಬಗ್ಗೆ ಮಾತನಾಡಿದರು.

"ಸಂದೇಶ್ ಖಾಲಿಯಲ್ಲಿ ಹಣದ ಆಟ ನಡೆದಿದೆ, ಜನರನ್ನು ದಾರಿ ತಪ್ಪಿಸಲಾಗಿದೆ. ಆದರೆ ಸುಳ್ಳುಗಳು ಹೆಚ್ಚು ಕಾಲ ಉಳಿಯುವುದಿಲ್ಲ. ಹೀಗಾಗಿ ನೀವೆಲ್ಲರೂ ಒಗ್ಗಟ್ಟಿನಿಂದ ಇರಬೇಕೆಂದು ನಾನು ವಿನಂತಿಸುತ್ತೇನೆ. ದುಷ್ಟ ಜನರ ಬಲೆಗೆ ಬೀಳಬೇಡಿ. ಯಾರಾದರೂ ನಿಮ್ಮನ್ನು ಮೋಸ ಮಾಡಲು ಯತ್ನಿಸಿದರೆ ಪ್ರತಿಭಟಿಸಿ ಎಂದು ಮಹಿಳೆಯರಿಗೆ ನಾನು ವಿನಂತಿಸುತ್ತೇನೆ" ಎಂದು ಮುಖ್ಯಮಂತ್ರಿ ಹೇಳಿದರು.

ಗ್ರಾಮೀಣ ವಸತಿ ಯೋಜನೆಗಳು ಸೇರಿದಂತೆ ವಿವಿಧ ಸಾಮಾಜಿಕ ಅಭಿವೃದ್ಧಿ ಯೋಜನೆಗಳ ಪ್ರಯೋಜನಗಳನ್ನು ಪಡೆಯಲು ಯಾರೂ ಯಾರಿಗೂ ಲಂಚ ನೀಡಬೇಡಿ ಸಿಎಂ ಮಮತಾ ಎಂದು ಜನರಿಗೆ ಸಲಹೆ ನೀಡಿದರು.

"ನಿಮ್ಮ ಸ್ವಂತ ಹಣದ ಮೇಲೆ ನಿಮಗೆ ಸಂಪೂರ್ಣ ಹಕ್ಕಿದೆ. ಸಾಮಾಜಿಕ ಕಲ್ಯಾಣ ಯೋಜನೆಗಳ ಪ್ರಯೋಜನಗಳನ್ನು ಉಚಿತವಾಗಿ ಒದಗಿಸಲಾಗುತ್ತದೆ. ಹೀಗಾಗಿ ಸೌಲಭ್ಯ ಮತ್ತು ಸೇವೆಗಳನ್ನು ಪಡೆಯಲು ದಯವಿಟ್ಟು ಯಾರಿಗೂ ಹಣ ಪಾವತಿಸಬೇಡಿ" ಎಂದು ಅವರು ಹೇಳಿದರು.

ಸಂದೇಶ್ ಖಾಲಿಗಾಗಿ ಹಲವಾರು ಯೋಜನೆಗಳನ್ನು ಇದೇ ಸಂದರ್ಭದಲ್ಲಿ ಸಿಎಂ ಘೋಷಿಸಿದರು. ಸಂದೇಶ್ ಖಾಲಿ ಗ್ರಾಮೀಣ ಆಸ್ಪತ್ರೆಯಲ್ಲಿ ಹಾಸಿಗೆಗಳ ಸಂಖ್ಯೆಯನ್ನು 30 ರಿಂದ 50 ಕ್ಕೆ ಹೆಚ್ಚಿಸುವುದು, ಜನರಿಗೆ ಮತ್ತಷ್ಟು ಉತ್ತಮ ಸೇವೆ ನೀಡಲು ಉತ್ತರ 24 ಪರಗಣ ಜಿಲ್ಲೆಯಲ್ಲಿ ಹೆಚ್ಚುವರಿ ಉಪ ವಿಭಾಗ ರಚಿಸುವುದು ಹೀಗೆ ಹಲವಾರು ಯೋಜನೆಗಳನ್ನು ಅವರು ಘೋಷಿಸಿದರು. ಸಂದೇಶ್ ಖಾಲಿ ಚಳವಳಿಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಸುಜಯ್ ಮೊಂಡಲ್ ಸಭೆಯಲ್ಲಿ ತೃಣಮೂಲ ಕಾಂಗ್ರೆಸ್​ಗೆ ಸೇರ್ಪಡೆಯಾದರು.

ಇದನ್ನೂ ಓದಿ : ರಾಜಕೀಯ ಪ್ರಚಾರದಲ್ಲಿ ಮಕ್ಕಳ ಬಳಕೆ ವೀಡಿಯೊ ಡಿಲೀಟ್ ಮಾಡುವಂತೆ 'ಎಕ್ಸ್​' ಗೆ NHRC ಸೂಚನೆ - NHRC TELLS X