ಕರ್ನಾಟಕ

karnataka

ETV Bharat / bharat

ಎನ್​ಸಿ ಸರ್ಕಾರ ರಚನೆಗೆ ಮುನ್ನ ಶ್ರೀನಗರಕ್ಕೆ ಮತ್ತೊಮ್ಮೆ ಭೇಟಿ ನೀಡಿದ ದೇವೇಗೌಡ; ಕುತೂಹಲ ಮೂಡಿಸಿದ ನಡೆ

ಶ್ರೀನಗರ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಹೆಚ್​ ಡಿ ದೇವೇಗೌಡ ಅವರನ್ನು ಮಾಜಿ ಸಿಎಂ ಮತ್ತು ಎನ್​ಸಿ ಅಧ್ಯಕ್ಷ ಫಾರುಕ್​ ಅಬ್ದುಲ್ಲಾ ಸ್ವಾಗತಿಸಿದರು.

By ETV Bharat Karnataka Team

Published : 4 hours ago

j-and-k-devegowda-in-srinagar-again-as-nc-eyes-government-formation
ಮಾಜಿ ಪ್ರಧಾನಿ ದೇವೇಗೌಡ (ANI)

ಶ್ರೀನಗರ: ಕಣಿವೆನಾಡು ಜಮ್ಮು ಮತ್ತು ಕಾಶ್ಮೀರಕ್ಕೆ ಮಾಜಿ ಪ್ರಧಾನಿ ದೇವೇಗೌಡ ಅವರು ಎರಡು ದಿನಗಳ ಪ್ರವಾಸ ಕೈಗೊಂಡಿದ್ದು, ಬುಧವಾರ ಸಂಜೆ ಇಲ್ಲಿಗೆ ಬಂದಿಳಿದಿದ್ದಾರೆ. ವಿಶೇಷ ಎಂದರೆ, ಕಳೆದ 40 ದಿನಗಳಲ್ಲಿ ಇಲ್ಲಿಗೆ ದೇವೇಗೌಡ ಅವರ ಎರಡನೇ ಪ್ರವಾಸ ಇದಾಗಿದೆ. ದಶಕಗಳ ಬಳಿಕ ಇತ್ತೀಚಿಗೆ ನಡೆದ ಚುನಾವಣೆಯಲ್ಲಿ ನ್ಯಾಷನಲ್​ ಕಾನ್ಫರೆನ್ಸ್​ ಪಕ್ಷ ಗೆಲವಿನ ಬಳಿಕ ಸರ್ಕಾರ ರಚನೆಗೆ ಸಜ್ಜಾಗಿದ್ದು, ಈ ನಡುವೆ ಅವರ ಆಗಮನ ರಾಜಕೀಯದಲ್ಲಿ ಹಲವು ಕುತೂಹಲಕ್ಕೆ ಕಾರಣವಾಗಿದೆ.

ಶ್ರೀನಗರ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ದೇವೇಗೌಡ ಅವರನ್ನು ಮಾಜಿ ಸಿಎಂ ಮತ್ತು ಎನ್​ಸಿ ಅಧ್ಯಕ್ಷ ಫಾರೂಕ್​ ಅಬ್ದುಲ್ಲಾ ಆತ್ಮೀಯವಾಗಿ ಸ್ವಾಗತ ಕೋರಿದರು. ಚುನಾವಣೆಯಲ್ಲಿ ಎನ್​ಸಿ ಅಭೂತಪೂರ್ವ ಯಶಸ್ಸಿಗೆ ವೈಯಕ್ತಿಕವಾಗಿ ಡಾ ಫಾರೂಕ್​ ಅವರಿಗೆ ಶುಭಕೋರುವ ಉದ್ದೇಶದಿಂದ ಮಾಜಿ ಪ್ರಧಾನಿ ಅವರು ಆಗಮಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಕಳೆದೆರಡು ದಿನದ ಹಿಂದೆ ಹೊರ ಬಿದ್ದ ಚುನಾವಣಾ ಫಲಿತಾಂಶದಲ್ಲಿ 90 ವಿಧಾನಸಭಾ ಕ್ಷೇತ್ರಗಳ ಪೈಕಿ ಎನ್​ಸಿ 42 ಸ್ಥಾನಗಳಲ್ಲಿ ಗೆಲುವು ಸಾಧಿಸಿದೆ.

ದೇವೇಗೌಡ ಅವರು ನೆಲೆಸಿರುವ ತಾಜ್​ ವಿವಾಂಟಾ ಹೋಟೆಲ್​ನಲ್ಲಿ ಇಬ್ಬರು ನಾಯಕರು ಭೇಟಿಯಾಗಿ ಮಾತುಕತೆ ನಡೆಸಿದ್ದಾರೆ. ಬುಧವಾರ ಸಂಜೆ ನಡೆದ ಸಭೆಯಲ್ಲಿ ಅವರು ಅನೇಕ ವಿಚಾರಗಳ ಕುರಿತು ವಿಸ್ತೃತ ಚರ್ಚೆ ನಡೆಸಿದ್ದು, ಈ ವಿಚಾರಗಳು ಬಹಿರಂಗಗೊಂಡಿಲ್ಲ. ಈ ನಡುವೆ ಡಾ ಫಾರೂಕ್​ ಅವರಿಗೆ ಶುಭಾಶಯ ಕೋರುವ ಉದ್ದೇಶದಿಂದಲೇ ಅವರು ಆಗಮಿಸಿದ್ದಾರೆ ಎಂದು ದೃಢಪಟ್ಟರೂ ಅವರ ಪ್ರವಾಸದ ವೇಳಾಪಟ್ಟಿ ಇನ್ನೂ ಸ್ಪಷ್ಟವಾಗಿಲ್ಲ. ಇಂದು ರಾತ್ರಿ ವಾಸ್ತವ್ಯದ ವೇಳೆ ಅವರು ಅನೇಕ ರಾಜಕೀಯ ಮುಖಂಡರನ್ನು ಭೇಟಿಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಇದೇ ವೇಳೆ ದೇವೇಗೌಡ ಅವರ ಪ್ರವಾಸದಲ್ಲಿ ಹಿಂದೆ ತಮ್ಮ ಅಧಿಕಾರ ಅವಧಿಯಲ್ಲಿನ ಶ್ರೀನಗರ- ಬಾರಾಮುಲ್ಲಾ ರೈಲು ಮಾರ್ಗದ ಯೋಜನೆ ಪರಿಶೀಲಿಸುವುದು ಪ್ರಮುಖ ಅಂಶವಾಗಿದೆ. ಕಣಿವೆ ರಾಜ್ಯಕ್ಕೆ ಅವರ ಪದೇ ಪದೇ ಭೇಟಿಯು ಇಳಿ ವಯಸ್ಸಿನಲ್ಲೂ ಅವರು ಕೇಂದ್ರಾಡಳಿತ ರಾಜಕೀಯ ಅಭಿವೃದ್ಧಿಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದಾರೆ ಎಂಬ ಚರ್ಚೆಗೆ ಕಾರಣವಾಗಿದೆ.

ಈ ನಡುವೆ ಎನ್​ಸಿ ಶಾಸಕಾಂಗ ಪಕ್ಷ ಇಂದು ಹೊಸದಾಗಿ ಆಯ್ಕೆಗೊಂಡ ನಾಯಕರನ್ನು ಭೇಟಿಯಾಗಲಿದ್ದು ಓಮರ್​ ಅಬ್ದುಲ್ಲಾ ಜಮ್ಮು ಮತ್ತು ಕಾಶ್ಮೀರದ ಮುಖ್ಯಮಂತ್ರಿಯಾಗಲಿದ್ದಾರೆ ಎಂಬುದನ್ನು ಫಾರೂಕ್​ ದೃಢಪಡಿಸಲಿದ್ದಾರೆ. ಕಾಂಗ್ರೆಸ್​ ಜೊತೆ ಚುನಾವಣಾ ಪೂರ್ವ ಮೈತ್ರಿ ಮಾಡಿಕೊಂಡಿದ್ದ ಎನ್​ಸಿ 42 ಸ್ಥಾನ ಪಡೆದರೆ, ಕಾಂಗ್ರೆಸ್​ 6, ಸಿಪಿಐಎಂ 1 ಸ್ಥಾನ ಪಡೆದಿದೆ.

ಇದನ್ನೂ ಓದಿ: ಪ್ರಥಮ ಸಂಪುಟ ಸಭೆಯಲ್ಲೇ ರಾಜ್ಯ ಸ್ಥಾನಮಾನ ಪುನಃಸ್ಥಾಪನೆಗೆ ನಿರ್ಣಯ: ಒಮರ್ ಅಬ್ದುಲ್ಲಾ

ABOUT THE AUTHOR

...view details