ನಿವೃತ್ತ ನೌಕಾಧಿಕಾರಿ 22 ದಿನ ಡಿಜಿಟಲ್​ ಅರೆಸ್ಟ್​; ಬರೋಬ್ಬರಿ 98 ಲಕ್ಷ ರೂ. ಪೀಕಿದ ಸೈಬರ್​ ವಂಚಕರು!

ಸೇವೆಯಿಂದ ನಿವೃತ್ತಿಯಾದ ನೌಕಾಧಿಕಾರಿಯೊಬ್ಬರು ಬರೋಬ್ಬರಿ 98 ಲಕ್ಷ ರೂ. ಕಳೆದುಕೊಂಡಿದ್ದಾರೆ. ಅದು ಡಿಜಿಟಲ್​ ಅರೆಸ್ಟ್​ನಿಂದ ಅನ್ನೋದು ಅಚ್ಚರಿಯ ವಿಚಾರ.

ವಾರಣಾಸಿ (ಉತ್ತರ ಪ್ರದೇಶ): ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್​​ ವಂಚನೆ ಹಾಗೂ ಡಿಜಿಟಲ್​ ಅರೆಸ್ಟ್​ನಂತಹ ಪ್ರಕರಣಗಳು ಹೆಚ್ಚುತ್ತಲೇ ಇವೆ. ಈ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಕೂಡ ಕಳವಳ ವ್ಯಕ್ತಪಡಿಸಿದ್ದರು. ಇದೀಗ ವಾರಣಾಸಿಯಲ್ಲಿ ನಿವೃತ್ತ ನೌಕರರೊಬ್ಬರು ಇಂತಹ ಮೋಸದ ಜಾಲಕ್ಕೆ ಸಿಲುಕಿ, 98 ಲಕ್ಷ ಹಣ ಕಳೆದುಕೊಂಡಿದ್ದಾರೆ. ಭಾರತೀಯ ನೌಕಾ ಸೇನೆಯಲ್ಲಿದ್ದ ಸಬ್ ಲೆಫ್ಟಿನೆಂಟ್ ಬರೋಬ್ಬರಿ 22 ದಿನಗಳ ಕಾಲ ಡಿಜಿಟಲ್​ ಅರೆಸ್ಟ್​​ಗೆ ಒಳಗಾಗಿದ್ದು, 98 ಲಕ್ಷ ರೂಪಾಯಿ ಕಳೆದುಕೊಂಡಿದ್ದಾರೆ.

ಪ್ರಕರಣದ ಹಿನ್ನೆಲೆ: ವಾರಣಾಸಿಯ ಮಾಧವ ನಗರ ಕಾಲೋನಿಯ ನಿವಾಸಿಯಾಗಿರುವ ಅನುಜ್​ ಕುಮಾರ್​ ಯಾದವ್​​ ವಂಚನೆಗೆ ಒಳಗಾದ ನಿವೃತ್ತ ಅಧಿಕಾರಿ. 2024 ಜುಲೈ 31ರಂದು ಸೇವೆಯಿಂದ ನಿವೃತ್ತಿಯಾಗಿದ್ದ ಇವರು ವಿಶ್ರಾಂತಿಯ ಜೀವನ ಕಳೆಯುತ್ತಿದ್ದಾರೆ. ಈ ವೇಳೆ ನವೆಂಬರ್​ 11ರಂದು ಸೈಬರ್​ ಅಪರಾಧಿಗಳು ಟ್ರಾಯ್​ ಅಧಿಕಾರಿಗಳಂತೆ ಬಿಂಬಿಸಿಕೊಂಡು ಕರೆ ಮಾಡಿದ್ದರು. ಅಲ್ಲದೇ ಅಂದಿನಿಂದ ಡಿಸೆಂಬರ್​ 3ರ ವರೆಗೆ ಡಿಜಿಟಲ್​ ಅರೆಸ್ಟ್​ ಮಾಡಿದ್ದರು ಎಂಬ ಅಂಶ ಹೊರಬಿದ್ದಿದೆ.

''ನಿಮ್ಮ ಹೆಸರಿನಲ್ಲಿ ಸಿಮ್​ ಕಾರ್ಡ್​​ ವಿತರಿಸಲಾಗಿದ್ದು, ಇದನ್ನು ಅಕ್ರಮ ಚಟುವಟಿಕೆಗೆ ಬಳಕೆ ಮಾಡಲಾಗುತ್ತಿದೆ ಎಂದು ಬೆದರಿಕೆ ಹಾಕಿದ್ದಾರೆ. ಇದಾದ ಸ್ವಲ್ಪ ಹೊತ್ತಿನಲ್ಲಿ ಮತ್ತೊಂದು ಕರೆ ಬಂದಿದ್ದು, ತಾವು ಪೊಲೀಸರು ಎಂದು ಹೇಳಿಕೊಂಡಿದ್ದು, ನಿಮ್ಮ ಹೆಸರಿನಲ್ಲಿ ಎಫ್​ಐಆರ್​ ದಾಖಲಾಗಿದೆ ಎಂದಿದ್ದಾರೆ. ಅಲ್ಲದೇ, ಈ ವೇಳೆ ಮಾಜಿ ಸಿಜೆಐ ಫೋಟೋವನ್ನು ವಾಟ್ಸಾಪ್​ ಮಾಡುವ ಮೂಲಕ ನರೇಶ್​ ಗೋಯಲ್​ ಮನಿ ಲಾಂಡರಿಂಗ್​ ಕೇಸ್​ನಲ್ಲಿ ನಿಮ್ಮ ಪಾತ್ರವಿದೆ'' ಎಂದು ಬೆದರಿಸಿದ್ದಾರೆ.

ಇಷ್ಟಕ್ಕೆ ಮುಗಿಯದೇ ಅನೇಕ ವಾಟ್ಸಾಪ್​ ನಂಬರ್​ನಿಂದ ಬೆದರಿಕೆ ಕರೆ ಬಂದಿದೆ. ಈ ವೇಳೆ ಕರೆ ಮಾಡಿದ ಅವರಿಗೆ ತನಿಖೆ ನಡೆಯುತ್ತಿದ್ದು, ಈ ಉದ್ದೇಶದಿಂದ ನಿಮ್ಮ ಹಣ ವರ್ಗಾಯಿಸುವ ಸ್ವಾತಂತ್ರ್ಯ ನೀಡಿ. ತನಿಖೆ ಮುಗಿದ ಬಳಿಕ ಎಲ್ಲಾ ಹಣವನ್ನು ನಿಮಗೆ ವರ್ಗಾಯಿಸುತ್ತೇವೆ ಎಂದು ತಿಳಿಸಿದ್ದಾರೆ. ಇದಾದ ಬಳಿಕ ನವೆಂಬರ್​ 14ರಂದು 33 ಲಕ್ಷ ಹಣವನ್ನು ಕೋಟಕ್​ ಮಹೀಂದ್ರಾ ಬ್ಯಾಂಕ್​ಗೆ ವರ್ಗಾವಣೆ ಮಾಡಿಸಲಾಗಿದೆ. ನಂತರ ನವಂಬರ್​ 16ರಂದು ಎರಡು ಕಂತಿನಂತೆ ಪ್ರತಿ ಬಾರಿ ಐಸಿಐಸಿಐಗೆ ಬ್ಯಾಂಕ್​ ಖಾತೆಗೆ 7.5 ಲಕ್ಷ ವರ್ಗಾಯಿಸಲಾಗಿದೆ. ಇದರಲ್ಲಿ ಎಫ್​ಡಿ ಮತ್ತು ಪೆನ್ಷನ್​ ಹಣವನ್ನು ಕೂಡ ವರ್ಗಾಯಿಸಿಕೊಳ್ಳಲಾಗಿದೆ.

ಬಯಲಾಗಿದ್ದೇಗೆ ಈ ರಹಸ್ಯ: ಸುಮಾರು 22 ದಿನಗಳ ಕಾಲ ಡಿಜಿಟಲ್​ ಅರೆಸ್ಟ್​ ಆದ ನಿವೃತ್ತ ಅಧಿಕಾರಿಯು ಈ ಅವಧಿಯಲ್ಲಿ ಯಾರ ಸಂಪರ್ಕಕ್ಕೂ ಬಂದಿಲ್ಲ. ಈ ವೇಳೆ ಅನೇಕ ದಿನಗಳ ಕಾಲ ತಂದೆಯ ಫೋನ್​ ಕರೆಯಿಲ್ಲದೆ ಮಗ ಅನುಮಾನಗೊಂಡು ಡಿಸೆಂಬರ್​ 3ರಂದು ಮನೆಗೆ ಬಂದಿದ್ದಾರೆ. ಇದಾದ ಬಳಿಕ ಘಟನೆ ಬಗ್ಗೆ ತಿಳಿದಾಗ ತಂದೆ ಸೈಬರ್​ ವಂಚನೆಗೆ ಒಳಗಾಗಿದ್ದನ್ನು ತಿಳಿದು, ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಪ್ರಕರಣದ ಕುರಿತು ಮಾಹಿತಿ ನೀಡಿದ ಸೈಬರ್​ ಪೊಲೀಸ್​ ಅಧಿಕಾರಿ ವಿಜಯ್​ ನಾರಾಯಣ್​ ಮಿಶ್ರಾ, ಹಣ ವರ್ಗಾವಣೆ ಮಾಹಿತಿ ಆಧಾರದ ಮೇಲೆ ಮೂರು ನಂಬರ್ ಪತ್ತೆ ಮಾಡಲಾಗಿದ್ದು, ಮೂರು ನಗರಗಳಲ್ಲಿ ಇವು ಕಂಡು ಬಂದಿವೆ. ನವದೆಹಲಿಯ ರೋಹಿಣಿ ಪ್ರದೇಶದ ಬ್ಯಾಂಕ್​ಗೆ 33 ಲಕ್ಷ ರೂ. ಗುರುಗ್ರಾಮದ ಕೋಟಕ್​ ಮಹೀಂದ್ರಾ ಬ್ಯಾಂಕ್​ಗೆ 50 ಲಕ್ಷ ರೂ. ಹರಿಯಾಣದ ಪಾಣಿಪತ್​ ಐಸಿಐಸಿಐ ಬ್ಯಾಂಕ್​ಗೆ ಏಳೂವರೆ ಲಕ್ಷ, ಮತ್ತು ಉತ್ತರ ಪ್ರದೇಶದ ಕುಶಿನಗರ ಬ್ಯಾಂಕ್​ಗೆ ಏಳು ಲಕ್ಷ ವರ್ಗಾವಣೆಯಾಗಿದೆ.

ಇನ್ನು, ಈ ಕುರಿತು ಮಾತನಾಡಿರುವ ನಿವೃತ್ತ ನೌಕಾಧಿಕಾರಿ ಅನುಜ್​, ವಂಚಕರು ತನಗೆ ಇದು ರಾಷ್ಟ್ರೀಯ ಭದ್ರತೆ ವಿಚಾರವಾಗಿದ್ದು, ಸಹಕಾರ ನೀಡಬೇಕು ಎಂದು ಬೆದರಿಕೆ ಹಾಕಿದ್ದರು ಎಂದು ತಿಳಿಸಿದರು.

ಇದನ್ನೂ ಓದಿ: ಹುಷಾರ್​​​​​​​​​​​​​.. ಈ ಸಂಖ್ಯೆಗಳಿಂದ ನಿಮಗೆ ಕರೆಗಳು ಬರುತ್ತಿವೆಯಾ?: ಹಾಗಾದರೆ ಈ ಕರೆಗಳನ್ನು ಎತ್ತಲೇಬೇಡಿ! ಏಕೆ ಅಂತೀರಾ?