ಹಜ್ ಮಾರ್ಗಸೂಚಿ, ಯಾತ್ರಿಕರ ಅನುಕೂಲಕ್ಕೆ ಮೊಬೈಲ್ ಆ್ಯಪ್​ ಬಿಡುಗಡೆಗೊಳಿಸಿದ ಕೇಂದ್ರ ಸರ್ಕಾರ

ಹಜ್​ ಸುವಿಧಾ ಮೊಬೈಲ್​ ಅಪ್ಲಿಕೇಶನ್​ ಮೂಲಕ ಯಾತ್ರಾರ್ಥಿಗಳು ತಾವಿದ್ದ ಸ್ಥಳದಿಂದಲೇ ಸಹಾಯ ಪಡೆಯಬಹುದು.

ನವದೆಹಲಿ: ಕೇಂದ್ರ ಅಲ್ಪಸಂಖ್ಯಾತ ಇಲಾಖೆ ಸಚಿವೆ ಸ್ಮೃತಿ ಇರಾನಿ ಅವರು ಹಜ್​ 2024ರ ಮಾರ್ಗಸೂಚಿ ಮತ್ತು ಹಜ್​ ಸುವಿಧಾ ಮೊಬೈಲ್​ ಅಪ್ಲಿಕೇಷನ್ ಅನ್ನು ಭಾನುವಾರ​ ಬಿಡುಗಡೆ ಮಾಡಿದ್ದಾರೆ. ಈ ವೇಳೆ ಮಾತನಾಡಿದ ಅವರು, ಹಜ್​ ಯಾತ್ರೆ ಮತ್ತು ಪ್ರಯಾಣಿಕರಿಗೆ ಅನುಕೂಲ ಕಲ್ಪಿಸಲು ಕೇಂದ್ರ ಸರ್ಕಾರದ ಅನೇಕ ಸಚಿವಾಲಯಗಳು ಕಾರ್ಯನಿರ್ವಹಿಸುತ್ತಿವೆ ಎಂದರು.

ಹಜ್​ ಯಾತ್ರಿಕರಿಗೆ ಸೌಲಭ್ಯ ಒದಗಿಸುವುದೊಂದೇ ಅಲ್ಪಸಂಖ್ಯಾತ ಸಚಿವರ ಜವಾಬ್ದಾರಿ ಅಲ್ಲ. ಇದೀಗ ಪ್ರಧಾನಿ ಮೋದಿ ನೇತೃತ್ವದ ಸರ್ಕಾರವು ಯಾತ್ರಿಕರಿಗೆ ವಿವಿಧ ರೀತಿಯ ಸೌಲಭ್ಯಗಳನ್ನು ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ ಎಲ್ಲಾ ವಿಭಾಗದೊಂದಿಗೆ ಸಹಕಾರವನ್ನು ಸ್ಥಾಪಿಸುತ್ತಿದೆ. ಯಾತ್ರೆಗಾಗಿ 5 ಸಾವಿರಕ್ಕೂ ಹೆಚ್ಚು ಮಹಿಳೆಯರು, ಮೆಹ್ರಮ್​ ಹೊರತಾದ ಮಹಿಳೆಯರು (ಎಲ್​ಡಬ್ಲ್ಯೂಎಂ) ಅಡಿಯಲ್ಲಿ ಅರ್ಜಿ ಸಲ್ಲಿಸಿದ್ದಾರೆ ಎಂದು ಮಾಹಿತಿ ನೀಡಿದರು.

ಕಳೆದ ವರ್ಷ 4,300 ಮಹಿಳೆಯರು ವೈಯಕ್ತಿಕವಾಗಿ ಹಜ್​ ಯಾತ್ರೆ ಕೈಗೊಂಡಿದ್ದರು. ಈ ವರ್ಷ ಸಂಖ್ಯೆ 5,160 ದಾಟಿದೆ. ಯಾತ್ರಿಕರಿಗೆ ಹಜ್​ ಯಾತ್ರೆಯನ್ನು ಸುಧಾರಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ನಿರಂತರವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಹಜ್​ ಸುವಿಧಾ ಮೊಬೈಲ್​ ಆ್ಯಪ್​ ಮೂಲಕ ಯಾತ್ರಿಕರು ಯಾವುದೇ ಅಗತ್ಯವಿದ್ದಲ್ಲಿ ತಮ್ಮ ಸ್ಥಳದಿಂದಲೇ ಅಧಿಕಾರಿಗಳಿಂದ ಸಹಾಯ ಪಡೆಯಬಹುದು. ಈ ಆ್ಯಪ್​ ಮೂಲಕ ಯಾತ್ರಾರ್ಥಿಗಳು ತಮ್ಮ ಸ್ಥಳದ ಸಮೀಪದ ಆರೋಗ್ಯ ಸೌಲಭ್ಯವನ್ನು ಅಗತ್ಯ ಸಮಯದಲ್ಲಿ ಪಡೆಯಬಹುದು ಎಂದರು.

ಈ ವರ್ಷ ದೇಶದಿಂದ 1,75,025 ಯಾತ್ರಾರ್ಥಿಗಳು ಹಜ್​ ಯಾತ್ರೆ ನಡೆಸುವ ಕೋಟಾ ಅಂತಿಮವಾಗಿದೆ. ಜನವರಿಯಲ್ಲಿ ಜೆಡ್ಡಾದಲ್ಲಿ ಯಾತ್ರೆಗೆ ಸಂಬಂಧಿಸಿದಂತೆ ಭಾರತ-ಸೌದಿ ಅರೇಬಿಯಾ ನಡುವೆ ಹಜ್​ ಒಪ್ಪಂದವಾಗಿತ್ತು. ಜನವರಿಯಲ್ಲಿ ಸೌದಿ ಅರೇಬಿಯಾದಲ್ಲಿ ದ್ವಿಪಕ್ಷೀಯ ಹಜ್​​ ಒಪ್ಪಂದ 2024ಕ್ಕೆ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಮತ್ತು ಅಲ್ಪಸಂಖ್ಯಾತ ವ್ಯವಹಾರಗಳ ಸಚಿವೆ ಸ್ಮೃತಿ ಇರಾನಿ, ವಿದೇಶಾಂಗ ವ್ಯವಹಾರಗಳ ರಾಜ್ಯ ಸಚಿವ ವಿ.ಮುರಳೀಧರನ್ ಮತ್ತು ಸಂಸದೀಯ ವ್ಯವಹಾರಗಳ ರಾಜ್ಯ ಸಚಿವ ಡಾ.ತೌಫಿಕ್ ಬಿನ್ ಫೌಜಾನ್ ಅಲ್​ ರಬಿಯಾ, ಹಜ್ ಮತ್ತು ಉಮ್ರಾ ಸಚಿವರೊಂದಿಗೆ ಸಹಿ ಹಾಕಿದ್ದರು.

1,40,020 ಸೀಟುಗಳನ್ನು ಭಾರತದ ಹಜ್ ಸಮಿತಿ ಮೂಲಕ ಮೊದಲ ಬಾರಿ ಯಾತ್ರೆ ನಡೆಸುವವರಿಗೆ ಕಾಯ್ದಿರಿಸಲಿದೆ. ಗ್ರೂಪ್ ಆಪರೇಟರ್ ಮೂಲಕ ಪ್ರಯಾಣ ಬೆಳೆಸಲು 35,006 ಯಾತ್ರಾರ್ಥಿಗಳಿಗೆ ಅನುಮತಿ ನೀಡಲಾಗಿದೆ. ಪ್ರತಿ ವರ್ಷ ಜಗತ್ತಿನೆಲ್ಲೆಡೆಯಿಂದ ಲಕ್ಷಾಂತರ ಮುಸ್ಲಿಮರು ಹಜ್​ ಯಾತ್ರೆ ನಡೆಸುತ್ತಾರೆ. ಇಸ್ಲಾಂ ಧರ್ಮದಲ್ಲಿ ಈ ಆಧ್ಯಾತ್ಮಿಕ ಪ್ರಯಾಣ ಹೆಚ್ಚಿನ ನಂಬಿಕೆ ಹೊಂದಿದೆ. ಅಲ್ಲಾನೊಂದಿಗೆ ಸಂಪರ್ಕ, ಕ್ಷಮೆ ಪಡೆಯಲು ಮತ್ತು ನಂಬಿಕೆ ಬಲಗೊಳಿಸುವ ಯಾತ್ರೆ ಇದಾಗಿದೆ ಎಂಬ ನಂಬಿಕೆ ಇದೆ.(ಎಎನ್​ಐ)

ಇದನ್ನೂ ಓದಿ: ಹೈದರಾಬಾದಿನ ರಾಮೇಶ್ವರಂ ಕೆಫೆಗೆ ಒವೈಸಿ ಭೇಟಿ: ಬೆಂಗಳೂರಿನ ಘಟನೆಗೆ ಖಂಡನೆ