ಐಸಿಸ್ ಮುಖ್ಯಸ್ಥ ಅಬು ಅಲ್ ಹಸನ್ ಖುರೇಷಿ ಹತ್ಯೆ: ಹೊಸ ನಾಯಕನಿಂದ ಆಡಿಯೋ ಬಿಡುಗಡೆ

ಜಾಗತಿಕ ಭಯೋತ್ಪಾದಕ ಸಂಘಟನೆ ಐಸಿಸ್ ಮುಖ್ಯಸ್ಥ ಅಬು ಅಲ್ ಹಸನ್ ಅಲ್ ಹಾಶಿಮಿ ಅಲ್ ಖುರೇಷಿ ಹತ್ಯೆಗೀಡಾಗಿದ್ದಾನೆ. ಇರಾಕ್‌ನಲ್ಲಿ ನಡೆದ ಸಂಘರ್ಷದಲ್ಲಿ ಆತನನ್ನು ಹೊಡೆದುರುಳಿಸಿರುವುದಾಗಿ ತಿಳಿದುಬಂದಿದೆ.

ಬೈರುತ್(ಲೆಬನಾನ್):ಇಸ್ಲಾಮಿಕ್ ಸ್ಟೇಟ್(ಐಎಸ್‌) ಗುಂಪಿನ ಮುಖ್ಯಸ್ಥ ಅಬು ಅಲ್-ಹಸನ್ ಅಲ್-ಹಶಿಮಿ ಅಲ್-ಖುರೇಷಿಯನ್ನು ಹೊಡೆದುರುಳಿಸಲಾಗಿದೆ. ತಮ್ಮ ನಾಯಕ ಮೃತಪಟ್ಟಿರುವುದಾಗಿ ಉಗ್ರವಾದಿ ಸಂಘಟನೆ ಘೋಷಿಸಿದೆ. ಈ ಕುರಿತು ಆಡಿಯೋ ಸಂದೇಶ ಬಿಡುಗಡೆ ಮಾಡಿದ್ದು, ಅಬು ಅಲ್-ಹಸನ್ ಬದಲಿಗೆ ಅಬು ಅಲ್-ಹುಸೇನ್ ಅಲ್-ಖುರೇಷಿಯನ್ನು ಹೊಸ ಐಸಿಸ್‌ ಮುಖ್ಯಸ್ಥನನ್ನಾಗಿ ನೇಮಿಸಲಾಗಿದೆ ಎಂದು ತಿಳಿಸಿದೆ.

ಆಡಿಯೋ ಸಂದೇಶದಲ್ಲಿ ಮಾತನಾಡಿರುವವರು ಭಯೋತ್ಪಾದಕ ಗುಂಪಿನ ಹೊಸ ಮುಖ್ಯಸ್ಥ ಅಬು ಅಲ್-ಹುಸೇನ್ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ. ಈ ಸಂದೇಶದಲ್ಲಿ, ಅಬು ಅಲ್-ಹಸನ್ ಇರಾಕ್‌ನಲ್ಲಿ ಶತ್ರುಗಳೊಂದಿಗಿನ ಯುದ್ಧದಲ್ಲಿ ಹತ್ಯೆಯಾಗಿರುವುದಾಗಿ ಹೇಳಿಕೊಂಡಿದ್ದಾನೆ. ಈ ಹಿಂದೆ ಇದ್ದ ಐಸಿಸ್​ ಅಧ್ಯಕ್ಷ ಯಾವಾಗ ಮೃತಪಟ್ಟಿದ್ದಾನೆ ಎಂಬ ವಿವರಗಳನ್ನು ಬಹಿರಂಗಪಡಿಸಿಲ್ಲ.

ಅಬು ಅಲ್-ಹಸನ್‌ಗೂ ಮುನ್ನ ಇದ್ದ ಐಸಿಸ್ ಮುಖ್ಯಸ್ಥ ಅಬು ಇಬ್ರಾಹಿಂ ಅಲ್-ಹಶಿಮಿ ಅಲ್-ಖುರೇಷಿಯನ್ನು ಫೆಬ್ರವರಿಯಲ್ಲಿ ಉತ್ತರ ಸಿರಿಯಾದ ಇದ್ಲಿಬ್ ಪ್ರಾಂತ್ಯದಲ್ಲಿ ಯುಎಸ್ ಪಡೆಗಳು ಸುತ್ತುವರೆದಿದ್ದ ಸಂದರ್ಭದಲ್ಲಿ ಆತ ತನ್ನನ್ನು ತಾನು ಸ್ಫೋಟಿಸಿಕೊಂಡು ಪ್ರಾಣಬಿಟ್ಟಿದ್ದ. ಇಸ್ಲಾಮಿಕ್ ಸ್ಟೇಟ್‌ನ ಪ್ರಮುಖ ನಾಯಕ ಅಬು ಬಕರ್ ಅಲ್-ಬಾಗ್ದಾದಿ ಅಮೆರಿಕದ ಕಮಾಂಡೋಗಳ ದಾಳಿಯಲ್ಲಿ ಹತನಾದ ನಂತರ ಖುರೇಷಿ ಅಕ್ಟೋಬರ್ 31, 2019 ರಂದು ಐಸಿಸ್​ ಮುಖ್ಯಸ್ಥನ ಸ್ಥಾನವನ್ನು ಅಲಂಕರಿಸಿದ್ದನು.

ಇದನ್ನೂ ಓದಿ:ಅಮೆರಿಕ: ಸಲಿಂಗ ವಿವಾಹಕ್ಕೆ ಮಾನ್ಯತೆ ನೀಡುವ ಮಸೂದೆಗೆ ಸೆನೆಟ್‌ ಒಪ್ಪಿಗೆ