ನವದೆಹಲಿ:ಜಾಗತಿಕ ತಾಪಮಾನ ಏರುತ್ತಿರುವ ಮಧ್ಯೆಯೇ ಮತ್ತೊಂದು ಆತಂಕಕಾರಿ ವರದಿಯೊಂದು ಹೊರಬಿದ್ದಿದೆ. ಮುಂದಿನ ಐದು ವರ್ಷಗಳು ಬಿಸಿಯಾಗಿರಬಹುದು. ಅದರಲ್ಲೂ ಒಂದು ವರ್ಷ ಅತ್ಯಂತ ಬಿಸಿಯಾಗಿರಲಿದೆ ಎಂದು ಅಂದಾಜಿಸಲಾಗಿದೆ. 2028 ರ ಹೊತ್ತಿಗೆ ಜಾಗತಿಕ ತಾಪಮಾನ ಅತ್ಯಧಿಕವಾಗಲಿದೆ. ಅದರಲ್ಲೂ ಒಂದು ವರ್ಷ ಅತಿ ಹೆಚ್ಚು ಅಂದರೆ, 1.5 ಸೆಲ್ಸಿಯಸ್ ತಾಪಮಾನ ದಾಖಲಿಸಲಿದೆ ಎಂದು ವಿಶ್ವ ಹವಾಮಾನ ಸಂಸ್ಥೆ ಆತಂಕಕಾರಿ ಹೊಸ ವರದಿಯನ್ನು ಬಿಡುಗಡೆ ಮಾಡಿದೆ.
ತಾಪಮಾನ ಏರಿಕೆಯಾದಂತೆ ಹಸಿರುಮನೆಯ ಮೇಲೆ ಪರಿಣಾಮ ಬೀರಿ ಈ ದಶಕದಲ್ಲಿ ಅತ್ಯಧಿಕ ಬಿಸಿ ದಾಖಲಾಗಲಿದೆ. ಮುಂದಿನ ಐದು ವರ್ಷಗಳಲ್ಲಿ ಜಾಗತಿಕ ತಾಪಮಾನ ಹೆಚ್ಚಾಗುವ ಸಾಧ್ಯತೆಯಿದೆ. 2023- 28 ಅನ್ನು ಇದುವರೆಗೆ ದಾಖಲಾದ ಅತ್ಯಂತ ಬೆಚ್ಚಗಿನ ಐದು ವರ್ಷಗಳ ಅವಧಿ ಎಂದು ಅಂದಾಜಿಸಲಾಗಿದೆ. 2016 ರಲ್ಲಿ ದಾಖಲಾದ ತಾಪಮಾನ ಈವರೆಗಿನ ದಾಖಲೆ ವರ್ಷಗಳಲ್ಲಿ ಒಂದಾಗಿದೆ. ಮುಂದಿನ ಐದು ವರ್ಷದಲ್ಲಿ ಇದಕ್ಕಿಂತಲೂ ಅಧಿಕ ತಾಪಮಾನ ದಾಖಲಾಗುವ ಸಾಧ್ಯತೆಗಳಿವೆ ಎಂದಿದೆ ವರದಿ.
ಮುರಿದ ಪ್ಯಾರೀಸ್ ಒಪ್ಪಂದ:ಜಾಗತಿಕ ತಾಪಮಾನಕ್ಕಾಗಿ ಮಾಡಿಕೊಂಡ ಪ್ಯಾರೀಸ್ ಒಪ್ಪಂದವನ್ನು ವಿಶ್ವದ ಎಲ್ಲಾ ರಾಷ್ಟ್ರಗಳು ಮುರಿದಿವೆ. ಮುಂದಿನ ಐದು ವರ್ಷಗಳಲ್ಲಿ ಜಾಗತಿಕ ಸರಾಸರಿ ತಾಪಮಾನವು 1.5 C ಮಿತಿಯನ್ನು ಮೀರಿದರೆ ಪ್ಯಾರಿಸ್ ಒಪ್ಪಂದವು ಸಂಪೂರ್ಣವಾಗಿ ಉಲ್ಲಂಘನೆಯಾಗಲಿದೆ. ನೈಸರ್ಗಿಕ ಅನಿಲದ ಹೊರಸೂಸುವಿಕೆಯನ್ನು ತ್ವರಿತವಾಗಿ ಶೂನ್ಯಕ್ಕೆ ತಳ್ಳದಿದ್ದರೆ ತಾಪಮಾನದ ಮಿತಿ ಮೀರಿ ಅನಾಹುತ ಉಂಟಾಗಲಿದೆ ಎಂದು ವರದಿ ಅಂದಾಜಿಸಿದೆ.