ನವದೆಹಲಿ :ರಾಷ್ಟ್ರ ರಾಜಧಾನಿಯಲ್ಲಿ ಮತ್ತೊಂದು ಲೈಂಗಿಕ ಕಿರುಕುಳ ಪ್ರಕರಣ ಬೆಳಕಿಗೆ ಬಂದಿದೆ. ಉಬರ್ ಆಟೋ ಚಾಲಕನ ವಿರುದ್ಧ ಮಹಿಳಾ ಪತ್ರಕರ್ತೆ ಪೊಲೀಸರಿಗೆ ದೂರು ನೀಡಿದ್ದಾರೆ. ತನ್ನ ನಿವಾಸದಿಂದ ಸ್ನೇಹಿತನನ್ನು ಭೇಟಿ ಮಾಡಲು ಹೋಗುವ ಮಾರ್ಗಮಧ್ಯೆ ಚಾಲಕ ದುಷ್ಕೃತ್ಯ ಎಸಗಿದ್ದಾನೆ ಎಂದು ಆರೋಪಿಸಿದ್ದಾರೆ.
ಈ ಕುರಿತು ಮಹಿಳೆ ದೆಹಲಿ ಮಹಿಳಾ ಆಯೋಗಕ್ಕೂ ದೂರು ಸಲ್ಲಿಸಿದ್ದಾರೆ. ಆಯೋಗವು ದೂರು ಸ್ವೀಕರಿಸಿ ನಗರ ಪೊಲೀಸ್ ಮತ್ತು ಕ್ಯಾಬ್ ಸಂಸ್ಥೆಗೆ ನೋಟಿಸ್ ನೀಡಿದೆ. ಉಬರ್ ಆಟೋದಲ್ಲಿ ಪ್ರಯಾಣಿಸುವ ಸಂದರ್ಭದಲ್ಲಿ ತನಗಾದ ಕಿರುಕುಳವನ್ನು ಸಂತ್ರಸ್ತೆ ಟ್ವೀಟ್‌ನಲ್ಲಿ ವಿವರಿಸಿದ್ದಾರೆ.
"ಮಾರ್ಚ್ 1ರಂದು ಸ್ನೇಹಿತನನ್ನು ಭೇಟಿ ಮಾಡಲು ನ್ಯೂ ಫ್ರೆಂಡ್ಸ್ ಕಾಲೋನಿಯಲ್ಲಿರುವ ತನ್ನ ನಿವಾಸದಿಂದ ಮಾಳವೀಯ ನಗರಕ್ಕೆ ಹೋಗಲು ಉಬರ್‌ನಲ್ಲಿ ಆಟೋ ಬುಕ್ ಮಾಡಿದೆ. ಸ್ವಲ್ಪ ಸಮಯದ ನಂತರ ಚಾಲಕ ಆಟೋದ ಸೈಡ್ ಮಿರರ್‌ಗಳ ಮೂಲಕ ನಿಖರವಾಗಿ ನನ್ನ ಸ್ತನಗಳನ್ನು ನೋಡುತ್ತಿರುವುದನ್ನು ಗಮನಿಸಿದೆ. ಬಳಿಕ ನಾನು ಸೀಟಿನ ಬಲಕ್ಕೆ ತಿರುಗಿದೆ. ಅದರೂ ಚಾಲಕ ಕನ್ನಡಿಯ ಬಲಭಾಗದಲ್ಲಿ ನನ್ನನ್ನು ನೋಡಲು ಪ್ರಾರಂಭಿಸಿದ. ಇದರಿಂದ ನನಗೆ ತೀವ್ರ ಕಿರಿಕಿರಿ ಉಂಟಾಗಿ ಸೀಟಿನ ತೀರಾ ಎಡಕ್ಕೆ ತಿರುಗಿಕೊಂಡೆ. ಈ ವೇಳೆ ಯಾವುದೇ ಕನ್ನಡಿಯಲ್ಲೂ ನಾನು ಚಾಲಕನಿಗೆ ಕಾಣಿಸಲಿಲ್ಲ. ಇಷ್ಟಾದರೂ ಆತ ನನ್ನನ್ನು ಮತ್ತೆ ಮತ್ತೆ ನೋಡಲು ಶುರು ಮಾಡಿದ. ಇದಕ್ಕೂ ಮೊದಲು ನಾನು ಉಬರ್‌ನ ಸುರಕ್ಷತಾ ಕ್ರಮವನ್ನು ಬಳಸಲು ಪ್ರಯತ್ನಿಸಿದೆ. ಆದರೆ ಯಾವುದೇ ಪ್ರಯೋಜನವಾಗಲಿಲ್ಲ."