ભાવનગર: શહેરમાં પ્રભુ શ્રી રામની પ્રાણ પ્રતિષ્ઠા મોહત્સવ અંતર્ગત શહેર ભાજપ દ્વારા ખાસ કાર્યક્રમનું આયોજન કરવામાં આવ્યું છે. 21મી જાન્યુઆરીના રોજ કુલ 1551 વિદ્યાર્થીઓ એક જ સ્થળે એક જ વેશભૂષામાં બાળરામ બનશે. નગર પ્રાથમિક શિક્ષણ સમિતિના બાળકો આ કાર્યક્રમમાં બાળરામ બનશે. બાળકોને રામની વેશભૂષા તેમજ ધનુષ બાણ પૂરા પાડવામાં આવી રહ્યા છે. આ કાર્યક્રમમાં જાહેર જનતાને ભાવભીનું આમંત્રણ ભાજપે પાઠવ્યું છે. પ્રભુ શ્રી રામને લગતા આ કાર્યક્રમમાં મોટી સંખ્યામાં વાલીઓ, શિક્ષકો અને નાગરિકો ઉમટી પડવાની સંભવના છે.
સી. આર. પાટીલની પ્રેરક ઉપસ્થિતિઃ 21મી જાન્યુઆરીના રોજ આતાભાઈ ચોકથી રૂપાણી સર્કલ વચ્ચે સાંજે 7.00 કલાકે આ કાર્યક્રમ યોજાશે. જેમાં ભગવાન રામના જીવન પ્રસંગો પણ મોબાઈલ મારફત દર્શાવવામાં આવશે. રાજ્યના ભાજપ પ્રદેશ પ્રમુખ સી. આર. પાટીલ આ કાર્યક્રમમાં ખાસ ઉપસ્થિત રહેવાના છે. આ કાર્યક્રમ અંતર્ગત છેલ્લા 3 દિવસથી અલગ અલગ ટીમો દરેક સંસ્થાઓને આમંત્રણ આપી રહી છે. આ ઉપરાંત ભજન સંધ્યામાં અનેક ખ્યાતનામ કલાકારો દ્વારા પ્રભુ શ્રી રામના ભજનો અને ગીતો રજૂ કરવામાં આવશે.