જમ્મુ-કાશ્મીરને પૂર્ણ રાજ્યનો દરજ્જો આપવા માટે થઈ અરજી, સુપ્રીમ કોર્ટ સુનાવણી કરવા સહમત

અરજીમાં કહેવામાં આવ્યું છે કે જમ્મુ અને કાશ્મીરનો રાજ્યનો દરજ્જો જલ્દીથી પુનઃસ્થાપિત કરવા માટે યોગ્ય નિર્દેશ પસાર કરવામાં આવે.

નવી દિલ્હી:સુપ્રીમ કોર્ટ (SC) ગુરુવારે બે મહિનાની અંદર જમ્મુ અને કાશ્મીરને રાજ્યનો દરજ્જો પુનઃસ્થાપિત કરવાના નિર્દેશોની માંગ કરતી અરજી પર સુનાવણી કરવા સંમત થઈ છે. એડવોકેટ ગોપાલ શંકરનારાયણે કેસની તાકીદે સુનાવણી કરવા માટેની અરજીનો ઉલ્લેખ કર્યો હતો, જેના પર ભારતના મુખ્ય ન્યાયાધીશ ડીવાય ચંદ્રચુડની આગેવાની હેઠળની બેન્ચે કહ્યું હતું કે, તે કેસની સુનાવણી કરશે.

જમ્મુ-કાશ્મીરને રાજ્યનો દરજ્જો આપવા SCમાં અરજી
કોલેજના શિક્ષક ઝહૂર અહમદ ભટ અને સામાજિક કાર્યકર્તા ખુર્શીદ અહેમદ મલિક દ્વારા દાખલ કરવામાં આવેલી અરજીમાં કહેવામાં આવ્યું છે કે, સોલિસિટર જનરલ દ્વારા જમ્મુ અને કાશ્મીરને રાજ્યનો દરજ્જો પુનઃસ્થાપિત કરવામાં આવશે તેવી ખાતરી આપવામાં આવી હોવા છતાં, કલમ 370 મામલામાં ચુકાદો આવ્યા પછી છેલ્લા દસ મહિનામાં, આ અંગે કોઈ પગલા લીધા નથી.

અરજકર્તાઓએ સુપ્રીમ કોર્ટ સમક્ષ શું દલીલ કરી?
આ અરજી એડવોકેટ સોયાબ કુરેશીના માધ્યમથી કરવામાં આવી હતી. અરજદારો, જમ્મુ અને કાશ્મીરના જાગૃત નાગરિકો હોવાને કારણે આ વાતથી ચિંતિત છે કે, 11મી ઓગસ્ટ, 2023 ના આદેશને 10 મહિના વીતી ગયા પછી પણ, આજદિન સુધી જમ્મુ અને કાશ્મીરના રાજ્યનો દરજ્જો પુનઃસ્થાપિત કરવા માટે કોઈ પગલાં લેવામાં આવ્યા નથી જે સંઘવાદના મૂળભૂત માળખાનું ઉલ્લંઘન કરી રહ્યું છે; અને આ જ કારણે અરજદારોએ બે મહિનાના સમયગાળામાં જમ્મુ અને કાશ્મીરને રાજ્યનો દરજ્જો પુનઃસ્થાપિત કરવા માટે ભારત સંઘને યોગ્ય દિશાનિર્દેશો આપવા માટે વર્તમાન અરજીને પ્રાધાન્ય આપ્યું છે.

અરજીમાં કહેવામાં આવ્યું છે કે, જો આ કોર્ટ દ્વારા જમ્મુ અને કાશ્મીરને રાજ્યનો દરજ્જો વહેલામાં વહેલી તકે પુનઃસ્થાપિત કરવાના નિર્દેશો પસાર કરવામાં નહીં આવે તો તેનાથી દેશના સંઘીય માળખાને ગંભીર નુકસાન થશે. જમ્મુ અને કાશ્મીરમાં તાજેતરમાં પૂર્ણ થયેલી ચૂંટણીઓને ટાંકીને અરજીમાં કહેવામાં આવ્યું છે કે, રાજ્યનો દરજ્જો પુનઃસ્થાપિત કરતા પહેલા વિધાનસભાની રચના સંઘવાદના વિચારનું ઉલ્લંઘન કરશે, જે ભારતના બંધારણના મૂળભૂત માળખાનો એક ભાગ છે. તાજેતરમાં પૂર્ણ થયેલી વિધાનસભાની ચૂંટણી શાંતિપૂર્ણ રીતે યોજાઈ હોવાથી, જો સુપ્રીમ કોર્ટ કેન્દ્રશાસિત પ્રદેશને સમય મર્યાદામાં રાજ્યનો દરજ્જો પુનઃસ્થાપિત કરવાનો નિર્દેશ આપે તો સુરક્ષાની કોઈ ચિંતા રહેશે નહીં.

'જમ્મુ-કાશ્મીરનું લોકતાંત્રિક માળખુંને થશે ગંભીર અસર'

અરજીમાં વધુમાં કહેવામાં આવ્યું છે કે, રાજ્યનો દરજ્જો પુનઃસ્થાપિત કરવામાં વિલંબથી જમ્મુ અને કાશ્મીરમાં લોકતાંત્રિક રીતે ચૂંટાયેલી સરકારની તાકાતમાં ગંભીર ઘટાડો થશે, જેનાથી સંઘવાદના વિચારનું ગંભીર ઉલ્લંઘન થશે, જે ભારતના બંધારણના મૂળભૂત માળખાનો એક ભાગ છે.

તેમાં કહેવાયું છે કે, જો જમ્મુ અને કાશ્મીરને સમયસર રાજ્યનો દરજ્જો પુનઃસ્થાપિત કરવામાં નહીં આવે, તો તે જમ્મુ અને કાશ્મીરના નાગરિકો સામે ગંભીર પૂર્વગ્રહનું કારણ બનશે, જે તેમના મૂળભૂત અધિકારોના ઉલ્લંઘન તરફ દોરી જશે. જમ્મુ-કાશ્મીરનું લોકતાંત્રિક માળખું અને તેની પ્રાદેશિક અખંડિતતાને પણ ગંભીર અસર થશે.

આ પણ વાંચો: