નવી દિલ્હી: વડાપ્રધાન નરેન્દ્ર મોદીએ ભાજપના રાષ્ટ્રીય અધિવેશનને સંબોધિત કર્યું હતું. પીએમે કહ્યું કે આપણે પ્રચાર દરમિયાન સમાજના દરેક વર્ગ સુધી પહોંચવાનું છે, આપણે દરેકનો વિશ્વાસ મેળવવાનો છે.
વડાપ્રધાન મોદીએ કહ્યું કે ભાજપના સભ્યોએ લોકસભા પ્રચાર માટે આગામી 100 દિવસ નવી ઉર્જા, ઉત્સાહ અને આત્મવિશ્વાસ સાથે કામ કરવું પડશે. વડાપ્રધાને કહ્યું કે આગામી પાંચ વર્ષમાં દેશે વિકાસની મોટી છલાંગ લગાવવાની છે, તમામ લક્ષ્યો હાંસલ કરવા માટેની પ્રથમ શરત ભાજપની સત્તામાં મજબૂત વાપસી છે.
પીએમ મોદીએ કહ્યું, 'અમે અમારી રાજકીય વ્યવસ્થાને નવા અને આધુનિક વિચારો માટે ખુલ્લી રાખી છે. આઝાદી પછી, આપણા દેશ પર વર્ષો સુધી શાસન કરનારાઓએ એક એવી વ્યવસ્થા બનાવી હતી જેમાં માત્ર થોડા મોટા પરિવારોના લોકો જ સત્તામાં રહ્યા હતા. પરિવારના નજીકના સભ્યોને જ મહત્વના હોદ્દા પર રાખવામાં આવ્યા હતા. અમે આ સિસ્ટમ બદલી, અમે નવા લોકોને પણ તક આપી. અમારી કેબિનેટમાં નોર્થ ઈસ્ટમાંથી મોટી સંખ્યામાં મંત્રીઓ છે.
પીએમએ કહ્યું, 'વિપક્ષી પાર્ટીઓને કદાચ યોજનાઓ કેવી રીતે પૂર્ણ કરવી તે ખબર નથી પરંતુ તેમની પાસે ખોટા વચનો આપવાનો કોઈ જવાબ નથી. અમારું વચન વિકસિત ભારત છે. આ લોકોએ સ્વીકારી લીધું છે કે તેઓ ભારતને વિકસિત નહીં બનાવી શકે, ભાજપ એકમાત્ર એવી પાર્ટી છે જેણે આનું સપનું જોયું છે. અમે ત્રીજી ટર્મમાં ભારતને વિશ્વની ત્રીજી સૌથી મોટી આર્થિક શક્તિ બનાવવાનો સંકલ્પ કર્યો છે અને આ મોદીની ગેરંટી છે.
નોંધનીય છે કે આ પહેલા રવિવારે ભાજપના રાષ્ટ્રીય અધિવેશનના બીજા દિવસે અયોધ્યામાં બનેલા ભવ્ય રામ મંદિર માટે વડાપ્રધાન મોદીનું અભિવાદન કરવામાં આવ્યું હતું. જય શ્રી રામના નારાઓ વચ્ચે બેઠકમાં રામ મંદિર અંગેનો ઠરાવ પસાર કરવામાં આવ્યો હતો અને વડાપ્રધાનની હાજરીમાં રામ મંદિર અંગેનો વીડિયો પણ બતાવવામાં આવ્યો હતો.
આ અવસર પર રામ મંદિર પર પ્રસ્તાવ રજૂ કરતા ભાજપના રાષ્ટ્રીય અધ્યક્ષ જેપી નડ્ડાએ કહ્યું કે વડાપ્રધાન મોદીના નેતૃત્વમાં ભાજપ સરકાર રામ રાજ્યની સ્થાપના તરફ આગળ વધી રહી છે. નડ્ડાએ કહ્યું કે પીએમ મોદી આધ્યાત્મિક અને સાંસ્કૃતિક ચેતનાને મજબૂત કરવા માટે કામ કરી રહ્યા છે.
- PM Modi Varanasi Visit: 22 ફેબ્રુઆરીએ PM લેશે વારાણસીની મુલાકાત, 14 હજાર કરોડ રૂપિયાના વિકાસ કાર્યોનો શિલાન્યાસ અને ઉદ્ઘાટન કરશે
- Acharya shri Vidyasagar Took Samadhi: જૈન સાધુ આચાર્ય વિદ્યાસાગર મહારાજે લીધી સમાધિ, PM મોદીએ આપી શ્રદ્ધાંજલિ
