મોતિહારીના પત્ની અને 3 દીકરીઓના હત્યારા સાયકો કિલરની કહાની, જેણે અગાઉ પણ દીકરીને ચાલતી ટ્રેનમાંથી ફેંકી હતી - Motihari Psycho Killer

બિહારના મોતિહારીમાં પિતાની નિર્દયતાની ઘટનાએ બધાને ચોંકાવી દીધા છે. અહીં એક સાયકો કિલર પિતાએ તેની પત્ની અને ત્રણ માસૂમ દીકરીઓનું ગળું કાપીને નિર્દયતાથી હત્યા કરી નાખી. માહિતી મળી છે કે આરોપીએ અગાઉ તેની એક પુત્રીને પણ ચાલતી ટ્રેનમાંથી ફેંકીને હત્યા કરી હતી.

બિહાર/મોતિહારી : બિહારના પૂર્વ ચંપારણમાં બનેલી ઘટનાએ દરેકના દિલને આંચકો આપ્યો છે. દરેક વ્યક્તિ વિચારે છે કે પિતા આટલા ક્રૂર કેવી રીતે હોઈ શકે? મોતિહારીના સાયકો કિલરે તેની પત્ની અને ત્રણ માસૂમ દીકરીઓની ગરદન ચારા કાપવાની બ્લેડ વડે કાપી નાખી અને હવે તે પોતાનો જીવ બચાવવા ભાગી રહ્યો છે. માહિતી મળી છે કે અગાઉ પણ તેણે તેની એક પુત્રીની નિર્દયતાથી હત્યા કરી હતી.

પત્ની સહિત ત્રણ માસૂમ દીકરીઓની હત્યા : જિલ્લાના પહાડપુર પોલીસ સ્ટેશન વિસ્તારના બાબરિયા ગામમાં શુક્રવારે સવારે એક મહિલા અને ત્રણ બાળકીઓ સહિત ચાર લોકોની ઘાતકી હત્યાથી સનસનાટી ફેલાઈ ગઈ હતી. ઘટનાની જાણ થતાં ગ્રામજનોના ટોળા ઉમટી પડ્યા હતા. એક સાથે ચાર લોકોની હત્યાથી ગ્રામજનો ચોંકી ઉઠ્યા છે. ચારેયની નિર્દયતાથી હત્યા કરનાર વ્યક્તિ સાયકો કિલર ઈદુ અંસારી છે.

સાયકો કિલરની ભયાનક કહાની : એવું કહેવાય છે કે ઈદુ અન્સારીએ જે પત્નીની હત્યા કરી હતી તે તેની બીજી પત્ની હતી. આ પહેલા તેમની પહેલી પત્નીનું કોઈ બીમારીના કારણે અવસાન થયું હતું. પ્રથમ પત્નીના મૃત્યુ પછી જ, તેણે પશ્ચિમ ચંપારણ જિલ્લાના જગદીશપુર પોલીસ સ્ટેશન વિસ્તારમાં આવેલા ઝાંખરા ગામમાં બીજા લગ્ન કર્યા. તેમને પ્રથમ પત્નીથી બે પુત્રો છે, જેઓ બહાર રહે છે. તેને બીજી પત્નીથી ચાર પુત્રીઓ હતી.

ચાલતી ટ્રેનમાંથી ફેંકીને દીકરીની હત્યા : ઇદુ અંસારી ચાર વર્ષ પહેલાં મોતિહારી જિલ્લાના બાબરિયા ગામમાં પરિવાર સાથે સ્થાયી થયો હતો. પ્રાપ્ત માહિતી અનુસાર, ઇદુએ થોડા વર્ષો પહેલાં તેની એક પુત્રીને ચાલતી ટ્રેનમાંથી ફેંકીને હત્યા કરી હતી. કહેવાય છે કે તે પોતાના પરિવાર સાથે દિલ્હીથી ટ્રેનમાં આવી રહ્યો હતો. તે દરમિયાન તેણે તેની પત્ની અને પુત્રીને ટ્રેનમાંથી ફેંકી દીધી હતી, જેમાં તેની એક પુત્રીનું મોત થયું હતું. આ કેસમાં તે છ મહિના પહેલા યુપીની સીતાપુર જેલમાંથી છૂટીને ઘરે આવ્યો હતો.

એક પછી એક ચારેયની હત્યા કરવામાં આવી : કહેવાય છે કે રમઝાન મહિનો ચાલી રહ્યો છે અને ગત રાત્રે ઈદુ અંસારી પરિવાર સાથે જમ્યા બાદ સૂઈ ગયો હતો. ઇદુની પત્ની અને પુત્રીઓ ગાઢ નિંદ્રામાં હતાં ત્યારે તે જાગી ગયો હતો અને ચારો કાપનાર ગંડાસાથી, તેની પત્ની અને તેની ત્રણ પુત્રીઓનું એક પછી એક ગળું કાપીને ભાગી ગયો હતો. ઊંઘમાં હોવાને કારણે કોઈ ચીસો પણ પાડી શક્યું નહીં.

ઘરમાં કોઈ હિલચાલ ન થતાં ગ્રામજનોને શંકા ગઈ : સવારે જ્યારે આજુબાજુના લોકોએ ઘરમાં કોઈ હિલચાલ ન જોઈ ત્યારે તેમને શંકા ગઈ. જે બાદ તેણે ઘરની અંદર જઈને જોયું તો ગામલોકોની નજર સામેનું દ્રશ્ય એટલું ભયાનક હતું કે બધા ચોંકી ગયા હતા. ગામલોકોએ જોયું કે ઘરના આંગણામાં ઈદુની બીજી પત્ની 35 વર્ષની આફ્રિના ખાતૂન અને તેની ત્રણ પુત્રીઓ 14 વર્ષની અબરૂન, 12 વર્ષની શબરુન અને 9 વર્ષની શહઝાદીની લોહીથી લથપથ અને ક્ષતવિક્ષત વિકૃત હાલતમાં જમીન પર પડેલા હતા. તસવીરો એટલી ભયાનક છે કે તે બતાવી શકાતી નથી.

હત્યાના સમાચાર જંગલની આગની જેમ ફેલાયાં : આ બનાવની જાણ ગામમાં આગની જેમ ફેલાઈ ગઈ હતી. ગ્રામજનોએ તરત જ આ અંગે પોલીસને જાણ કરી, ત્યારબાદ થોડી જ વારમાં સેંકડો લોકોની ભીડ સ્થળ પર એકઠી થઈ ગઈ. માહિતી મળ્યા બાદ પોલીસ પણ પોતાની ટીમ સાથે પહોંચી હતી અને બધું જોઈને દંગ રહી ગઈ હતી. ગ્રામજનોના જણાવ્યા મુજબ, ઇદુ સાયકો છે અને તેનું વર્તન કંઈક અસામાન્ય હતું.

પ્રથમ દ્રષ્ટિએ આ ઘટનાનું કારણ પતિપત્ની વચ્ચેનો ઝઘડો છે. આરોપીએ અગાઉ પણ તેની પત્ની અને પુત્રીને ચાલતી ટ્રેનમાંથી ફેંકી દીધી હતી, જેમાં બાળકીનું મોત થયું હતું. તે આ કેસમાં જેલની સજા પણ ભોગવી ચૂક્યો છે. મુક્ત થયા બાદ તેણે ફરીથી આવી ઘટનાને અંજામ આપ્યો છે. હાલમાં એફએસએલ અને ડોગ સ્કવોડની ટીમને બોલાવવામાં આવી છે અને વધુ તપાસ કરવામાં આવી રહી છે...રંજન કુમાર, ( ડીએસપી, અરેજ )

મામલાને લઇ ડીએસપીનું નિવેદન : આ મામલાને લઈને અરેજના ડીએસપી રંજન કુમારે કહ્યું કે, ઘટનાની જાણકારી મળતા તેઓ પોલીસ ફોર્સ સાથે ઘટનાસ્થળે પહોંચ્યા હતાં. ઘટનાસ્થળે ત્રણ પુત્રીઓ અને એક મહિલાના મૃતદેહ પડ્યા હતાં. ઘટનાને અંજામ આપ્યા બાદ આરોપી પતિ ઇદુ અંસારી ફરાર છે. ડીએસપીએ જણાવ્યું કે એફએસએલ અને ડોગ સ્કવોડની ટીમને બોલાવવામાં આવી છે. ઘટનાની તપાસ કરવામાં આવી રહી છે, જ્યારે તેની ધરપકડ માટે દરોડા પણ ચાલી રહ્યા છે.