મુંબઈ:મહારાષ્ટ્રના પુણેમાં બુધવારે સવારે હેલિકોપ્ટર અકસ્માત સર્જાયો હતો. મળતી માહિતી મુજબ, આ અકસ્માત બાવધન બુદ્રુક ગામ પાસે થયો હતો. આ અકસ્માતમાં ત્રણ લોકોના મોતના સમાચાર સામે આવ્યા છે. ઘટનાસ્થળે પહોંચેલા સ્થાનિક લોકોએ પોલીસને જાણ કરી હતી. માહિતી મળતાની સાથે જ એક મેડિકલ ટીમને બચાવ કામગીરી માટે રવાના કરવામાં આવી હતી. મૃત્યુ પામેલાઓમાં 2 પાયલોટ અને 1 એન્જિનિયરનો સમાવેશ થાય છે.
નવીનતમ માહિતી અનુસાર, આ ઘટના ઓક્સફોર્ડ ગોલ્ફ ક્લબના હેલિપેડ પરથી ટેકઓફ કર્યા પછી તરત જ બની હતી. આ અકસ્માત સવારે 7 થી 7.10 વચ્ચે થયો હતો. કહેવામાં આવી રહ્યું છે કે આ વિસ્તારમાં ગાઢ ધુમ્મસના કારણે આ દુર્ઘટના થઈ છે. આ ઘટનાની સંપૂર્ણ માહિતી સત્તાવાર તપાસ બાદ જ બહાર આવશે.