ভিত্তিহীন কথা নক’ব : আফতাব উদ্দিন লস্কৰক সকীয়ালে অগপৰ উপ-সভাপতি সুনীল ডেকাই - asom gana parishad - ASOM GANA PARISHAD

গুৱাহাটী, 13 জুলাই : সদ্য পদত্যাগী অগপ নেতা আফতাব উদ্দিন লস্কৰক সকীয়ালে দলৰ উপ-সভাপতি সুনীল ডেকাই ৷ শুকুৰবাৰে অগপৰ পৰা পদত্যাগ কৰি দল তথা নেতৃত্বৰ বিৰুদ্ধে কেতবোৰ গুৰুতৰ অভিযোগ আনিছিল আফতাব উদ্দিন লস্কৰে ৷ ইয়াৰ পিচতেই আফতাব উদ্দিন লস্কৰক প্ৰত্যুত্তৰ দিছে দলৰ উপ-সভাপতি সুনীল ডেকাই 

অগপ দলে টকাৰ বিনিময়ত 2021 ৰ নিৰ্বাচনত প্ৰাৰ্থিত্ব প্ৰদান কৰা আৰু টকাৰ বিনিময়ত জিলা সভাপতিৰ পদ দিয়া বুলি আফতাব উদ্দিন লস্কৰে কৰা অভিযোগ নস্যাৎ কৰিছে সুনীল ডেকাই ৷ অগপৰ উপ-সভাপতিগৰাকীয়ে শনিবাৰে সংবাদ মাধ্যমৰ আগত কয় যে, আফতাব উদ্দিন লস্কৰ ভণ্ড আৰু ৰাজনৈতিক দালাল ৷ আফতাব উদ্দিন লস্কৰে অনা অভিযোগ ভুৱা আৰু ভিত্তিহীন ৷ আফতাব উদ্দিন লস্কৰেহে কৰিমগঞ্জত বিজেপি মিত্ৰজোঁটৰ বিৰুদ্ধে থিয় দিছিল ৷ কংগ্ৰেছৰ হাফিজ ৰছিদ চৌধুৰীৰ হৈ প্ৰচাৰ চলাইছিল ৷ কংগ্ৰেছৰ হৈ প্ৰচাৰ চলোৱাত দলীয় অনুশাসনমূলক ব্যৱস্থা লোৱাত দলৰ বিৰুদ্ধে মনেসজা ভিত্তিহীন কিছুমান কথা কৈ আছে বুলি কয় সুনীল ডেকাই ৷

লগতে আফতাব উদ্দিন লস্কৰক এনেধৰণৰ মনেসজা কথা নক'বলৈ সকীয়াই দি সুনীল ডেকাই অগপত কাকো ধনৰ বিনিময়ত টিকট দিয়া হোৱা নাই বুলি মন্তব্য কৰে ৷ তেওঁ কয় যে, হাইলাকান্দি জিলা অগপৰ সভাপতি আছিল আফতাবুদ্দিন লস্কৰ ৷ 2021 ত আলগাপুৰৰ পৰা অসম গণ পৰিষদৰ প্ৰাৰ্থিত্ব লাভ কৰিছিল তেওঁ ৷ 2021 ৰ নিৰ্বাচনত তেওঁ AIUDF ৰ লগত বুজাবুজি কৰিছিল বুলিও আফতাবুদ্দিন লস্কৰৰ বিৰুদ্ধে অভিযোগ আনে সুনীল ডেকাই ৷ 
 

লগতে পঢ়ক : অগপ শূন্য হ'ব নেকি বৰাকত: দলত্যাগ কৰি বিস্ফোৰণ আফতাব উদ্দিন লস্কৰৰ - AFTAB UDDIN LASKAR RESIGNS AGP