নাৰায়ণপুৰৰ ব্যৱসায়ীৰ অৰুণাচলত ৰহস্যজনক মৃত্যু
Published : Jan 31, 2024, 9:45 PM IST
বিহপুৰীয়া, ৩১ জানুৱাৰী : লখিমপুৰ জিলাৰ নাৰায়ণপুৰ ধলপুৰৰ ব্যৱসায়ী প্ৰেমেশ্বৰ দাস ওৰফে চাহিয়াৰ অৰুণাচলৰ চেপাত ৰহস্যজনক মৃত্যু হয় । যোৱা ২০ জানুৱাৰীত নাৰায়ণপুৰৰ ধলপুৰ ৰূপতলীৰ পৰা ৪ জন কাপোৰৰ ব্যৱসায়ী অৰুণাচলৰ চেপালৈ বুলি গৈছিল । ইয়াৰে এজনৰ ২৮ জানুৱাৰীত ৰহস্যজনকভাৱে মৃত্যু হয় । মৃত্যু হোৱাৰ চাৰিদিনলৈকে খবৰ পোৱা নাছিল পৰিয়ালৰ লোকে ৷ ফোন কৰিলেও ৰিচিভ নকৰাত পৰিয়ালৰ লোকে লগত যোৱা তিনি জনে হত্যা কৰাৰ সন্দেহ প্ৰকাশ কৰে ।
একে গাঁৱৰে অৰূপ হাজৰিকা, ডিম্ব হাজৰিকা আৰু অভয় হাজৰিকাৰ ওপৰত হত্যাৰ সন্দেহ প্ৰকাশ কৰিছে পৰিয়ালৰ লোকে ৷ সম্প্ৰতি তিনিওজন পলাতক অৱস্থাত আছে । ইতিমধ্য়ে অৰুণাচল আৰক্ষীয়ে অসম আৰক্ষীক মৃতদেহটো গতাই দিয়াত আজি আৰক্ষীয়ে মৃতদেহটো মৰণোত্তৰ পৰীক্ষাৰ বাবে লখিমপুৰলৈ প্ৰেৰণ কৰে । অৰূপ হাজৰিকা, অভয় হাজৰিকাৰ লগতে অৰুণাচলৰ চেপাৰ পৰা ডিম্ব হাজৰিকাই প্ৰেমেশ্বৰৰ মৃতদেহ ধলপুৰ আৰক্ষী চকীত গতাই দিয়াৰ পিছৰে পৰা ডিম্বও পলাতক অৱস্থাত আছে ।
লগতে পঢ়ক:চৰকাৰে ব্যৱস্থা গ্ৰহণ কৰিলেও 'কা' বিৰোধী প্ৰতিবাদ অব্যাহত থাকিব : বিদ্যুৎ শইকীয়া