চুৰি কৰিবলৈ গৈ ৰাইজৰ ৰোষত ড্ৰাগছ আসক্ত - Drug addict arrested in Mangaldoi

মঙলদৈ, 19 মে’: ৰাজ্যৰ বিভিন্ন প্ৰান্তৰ দৰে মঙলদৈতো নিষিদ্ধ ড্ৰাগছৰ কবলত পৰিছে একাংশ যুৱক । আনকি ড্ৰাগছ সেৱন কৰিবলৈ আসক্তই বিক্ৰী কৰাৰ উদ্দেশ্যৰে চুৰি কাৰ্যতো হাত দিছে ৷ শুকুৰবাৰে পুনৰ সংঘটিত হৈছে এনে এক ঘটনা । 

মঙলদৈৰ কেৰিমেৰি চ’কত শুকুৰবাৰে ৰাইজে হাতে-লোটে ধৰিবলৈ সক্ষম হ’ল এটা ড্ৰাগছ আসক্তক । চৰি থকা ছাগলী চুৰি কৰি বিক্ৰী কৰিবলৈ পাং পাতোতেই ৰাইজে ধৰে চোৰটোক । চোৰটোক ধৰি খুঁটাত বান্ধি ৰাখি পিছত মঙলদৈ আৰক্ষীক খবৰ দিয়াত আৰক্ষী উপস্থিত হৈ থানালৈ লৈ আহে চোৰটোক । 

চাঞ্চল্যকৰভাৱে অভিযুক্ত চোৰটোৰ পকেটৰ পৰা উদ্ধাৰ হৈছে বেজীসহ এটা চিৰিঞ্জ । ধৃত যুৱকজনে মঙলদৈৰ কেৰিমেৰি চ’কত থকা এখন মাংসৰ দোকানত এটা ছাগলী বিক্ৰী কৰিবলৈ লৈ যায় । কিন্তু যুৱকজনৰ কথা-বতৰাত সন্দেহ ওপজাত মাংসৰ দোকানীয়ে ভালকৈ সোধ-পোছ কৰাত ছাগলীটো চুৰি কৰি লৈ অহা বুলি নিজ মুখে যুৱকজনে স্বীকাৰ কৰে বুলি স্থানীয় লোকে জনায় ৷

ইয়াৰ পিছতেই ড্ৰাগছ আসক্ত যুৱকজনৰ পকেটৰ পৰা উদ্ধাৰ হয় এটা চিৰিঞ্জ আৰু বেজী । ড্ৰাগছ খাবলৈকে ধৃত যুৱকজনে ছাগলী চুৰি কৰা বুলি স্বীকাৰ কৰে ।

লগতে পঢ়ক:  নিচাৰ মায়াই বৰপেটাৰোডত উপস্থিত কৰোৱালে গুৱাহাটীৰ যুৱকৰ দলক - mission against drugs