হায়দৰাবাদ: চলিত বৰ্ষত বজাৰত মুকলি হ’ব এপলৰ নতুন বাজেট ফ্লেইণ্ডলী স্মাৰ্টফোনটো ৷ এপলে নতুন আৰু বাজেট অনুকূল আইফোন মুকলি কৰাৰ প্ৰস্তুতি চলাইছে । এই ফোনটোৰ নাম iPhone SE 4 হ’ব বুলি আশা কৰা হৈছে । 2022 চনত এপলে নিজৰ SE লাইনআপৰ শেষৰটো আইফোন মুকলি কৰিছিল, যাৰ নাম আছিল iPhone SE 3 । এতিয়া আইফোন SE 4 অহা সপ্তাহত এপলে মুকলি কৰিব ।
উল্লেখ্য যে, পূৰ্বৰ বিভিন্ন প্ৰতিবেদন আৰু এই আইফোন লাইনআপ মুকলি কৰাৰ টাইমলাইন চাই এনে লাগিছিল যে কোম্পানীটোৱে 2025 চনৰ মাৰ্চ বা এপ্ৰিল মাহত ইয়াক মুকলি কৰিব পাৰে । কিন্তু এতিয়া ব্লুমবাৰ্গৰ এক নতুন প্ৰতিবেদন অনুসৰি এপলে অহা সপ্তাহত নিজেই এই সস্তীয়া আইফোনটো মুকলি কৰিব ৷ অৱশ্যে ইয়াৰ বিক্ৰী পৰৱৰ্তী সময়ত আৰম্ভ হ’ব । এপলে এই ফোনটো মুকলি কৰিবলৈ লঞ্চ ইভেণ্টৰ আয়োজন নকৰিবও পাৰে বুলি চৰ্চা চলিছে ৷ সাধাৰণতে নিজৰ আইফোন মডেল মুকলি কৰিবলৈ এপলে ইভেণ্টৰ আয়োজন কৰে, কিন্তু এইবাৰ কোম্পানীয়ে ইভেণ্ট অবিহনেই এই ফোনটো লঞ্চ কৰিব বুলি জানিব পৰা গৈছে ।
ডিজাইনৰ পৰিৱৰ্তন হ’ব
আইফোনৰ এই লাইনআপত এতিয়ালৈকে মুকলি কৰা ফোনসমূহৰ ডিজাইন পুৰণি আৰ্হিৰ দৰেই আছিল যদিও এইবাৰ এপলে নতুন ডিজাইনৰ সৈতে আইফোন এছ ই 4 লঞ্চ কৰিব । বহু সংবাদ মাধ্যমৰ বাতৰি অনুসৰি আইফোন SE4 ৰ ডিজাইন আইফোন 14 ৰ দৰে হ’ব আৰু এই ফোনটোত এপলৰ AI চালিত ছফটৱেৰ থাকিব । ভাৰত আৰু চীনৰ দৰে এপলৰ বৃহৎ বজাৰত সস্তীয়া ফোনসমূহৰ নিত্য বৃদ্ধি পোৱা চাহিদা দেখি এপলে কম মূল্যত প্ৰিমিয়াম ফিচাৰ দি এই আইফোনটোৰ জৰিয়তে গ্ৰাহকক আকৰ্ষিত কৰাৰ চেষ্টা চলাব পাৰে ।