গুৱাহাটী, ২৬ আগষ্ট:ৰাজ্য়ত হাতী-মানুহৰ সংঘাত অব্য়াহত । বনাঞ্চল সংকুচিত হ'বলৈ ধৰাত হস্তীদণ্ডী নোহোৱা হোৱাত জনাঞ্চললৈ ঢাপলি মেলিছে বন্য়হস্তীয়ে । বন্য়হস্তীৰ উপদ্ৰৱৰ পৰা বাদ পৰি যোৱা নাই চহৰৰ লগতে গুৱাহাটী মহানগৰীও । ইয়াৰ মাজতেই মহানগৰীৰ ৰাজপথতে দুটা বনৰীয়া হাতীৰ মাজত চলে তয়াময়া যুঁজ ৷ ইয়াকে লৈ আতংকিত হৈ পৰিছে মহানগৰবাসী ।
ৰাজপথতে চলে তয়াময়া যুঁজ :
যোৱা দেওবাৰে নিশা আমচাং অভয়াৰণ্যৰ পৰা ওলাই অহা দুটা বনৰীয়া হাতীৰ মাজত সাতগাঁৱৰ ৰাজপথতে চলে তয়াময়া যুঁজ । স্বাভাৱিকতে বনৰীয়া হাতী দুটাৰ এনে অতৰ্কিত যুজঁ-বাগৰৰ ফলতেই স্তব্ধ হৈ পৰে নিশাৰ ৰাজপথ । বহু সময় ধৰি নাৰেংগী-সংযোগী পথত আৱদ্ধ হৈ পৰে যানবাহন।
হাতী দুটাৰ এনে যুজঁ বাগৰ চাবলৈ সমাগম ঘটে বহু লোকৰ । তদুপৰি উক্ত পথৰে অহা-যোৱা কৰা সাধৰণ নাগৰিককো সতৰ্ক কৰি দিবলৈ বাধ্য হয় যান-বাহন আৰক্ষীয়ে । পিছত স্থানীয় লোকৰ খবৰৰ ভিত্তিত ঘটনাস্থলীত উপস্থিত হোৱা বন বিভাগৰ দলে বনৰীয়া হাতী দুটাক কোনোমতে সেই স্থানৰ পৰা আমচাং অভয়াৰণ্যৰ পিনে খেদি পঠিয়াবলৈ সক্ষম হয় । অৱশ্যে বনৰীয়া হাতী দুটাই কোনো লোকক আক্ৰমণ নতুবা অঞ্চটোত কোনো অনিষ্ট সাধন কৰা নাই ।