উমৰাংছ' কয়লাখনি ট্ৰেজেডী : শনিবাৰে উদ্ধাৰ হ’ল মুঠ তিনিজন শ্ৰমিকৰ মৃতদেহ

উদ্ধাৰ অভিযানৰ ষষ্ঠদিনা উদ্ধাৰ হৈছে তিনিটা মৃতদেহ ৷ এটা উমৰাংছ'ৰ লিজান মগৰ নামৰ শ্ৰমিকজনৰ বুলি জানিব পৰা গৈছে ।চিনাক্ত হোৱা নাই আন দুটা মৃতদেহ ৷

হাফলং :উমৰাংছ'ৰ তিনি কিলোৰ ক'লামাটিস্থিত উমৰাংছ' অসম কয়লাখনিত আবদ্ধ হৈ থকা শ্ৰমিকসকলৰ মাজৰ আৰু দুজনৰ মৃতদেহ উদ্ধাৰ । উদ্ধাৰ অভিযানৰ ষষ্ঠদিনা শনিবাৰে পুৱা প্ৰায় 7.35 বজাত কয়লাখনিটোৰ পৰা আৰু এজন শ্ৰমিকৰ মৃতদেহ এন ডি আৰ এফ আৰু সেনাবাহিনীয়ে উদ্ধাৰ কৰিবলৈ সক্ষম হয় । তাৰ কিছু সময় পিছতেই পোৱা গ’ল আন দুজনৰ মৃতদেহ ৷

শনিবাৰে পুৱা উদ্ধাৰ হোৱা প্ৰথমটো মৃতদেহ উমৰাংছ'ৰ লিজান মগৰ (২৭) নামৰ শ্ৰমিকজনৰ বুলি জানিব পৰা গৈছে । তেওঁৰ ঘৰ ১ নং ক'লামাটি গাঁৱত । পুৱাই এগৰাকী শ্ৰমিকৰ মৃতদেহ উদ্ধাৰ হোৱাৰ পিচতে আৰু দুপৰীয়াৰ ভাগত দুজন শ্ৰমিকৰ মৃতদেহ উদ্ধাৰ কৰে সেনা আৰু এনডিআৰএফ বাহিনীয়ে । মৃত শ্ৰমিক দুজন ক্ৰমে কোকৰাঝাৰ জিলাৰ ফকিৰগ্ৰাম আৰক্ষী থানা অন্তৰ্গত মগৰগাঁৱৰ খুশি মোহন ৰায় (৫৭ বছৰ) আৰু শোণিতপুৰ জিলাৰ পানবাৰী আৰক্ষী থানাৰ অন্তৰ্গত থাইলাপাৰাৰ শৰৎ গয়াৰী (৩৭ বছৰ) বুলি চিনাক্ত কৰা হৈছে ৷ বাকী পাঁচগৰাকী শ্ৰমিকক উদ্ধাৰৰ বাবে উদ্ধাৰকাৰী দলে অভিযান অব্যাহত ৰাখিছে ।

উদ্ধাৰ অভিযানৰ অগ্ৰগতি সম্পৰ্কে এনডিআৰএফৰ প্ৰথম বেটেলিয়নৰ কমাণ্ডেণ্ট এইচপিএছ কান্দাৰীয়ে সংবাদ সংস্থা ANI ক কয়, "যদি সকলো পানী উলিয়াই দিয়া হয়, আমি সহজে গৈ ভিতৰলৈ অনুসন্ধান অভিযান চলাব পাৰোঁ। এতিয়ালৈকে 4 টা মৃতদেহ উদ্ধাৰ কৰা হৈছে..."

উল্লেখ্য যে, যোৱা 6 জানুৱাৰীত উমৰাংছ' অসম কয়লাখনিত এই বিপৰ্যয় সংঘটিত হৈছিল । কয়লাখনিত কাম কৰিবলৈ গৈ খনিটোৰ ভিতৰতে আবদ্ধ হৈ পৰিছিল 9 গৰাকী শ্ৰমিক । ইয়াৰ পিছতে এন ডি আৰ এফ, এছ ডি আৰ এফ, সেনাবাহিনী, ভাৰতীয় নৌ-সেনাৰ ডুবাৰুৰ দলে অভিযান চলাই নেপালৰ উদয়পুৰৰ বাসিন্দা গংগা বাহাদুৰ শ্রেষ্ঠ নামৰ এজন শ্ৰমিকৰ মৃতদেহ উদ্ধাৰ কৰিছিল ।

যোৱা দুদিনৰ পৰা নাগপুৰৰ পৰা অত্যাধুনিক পাম্প আনি কয়লাখনিৰ পৰা পানী নিষ্কাশন কৰাৰ পিছতে কয়লাখনিটোত পানীৰ স্তৰ কিছু পৰিমাণে হ্ৰাস পাইছে । যাৰ বাবে শনিবাৰে পুৱা এন ডি আৰ এফ আৰু সেনাবাহিনীৰ উদ্ধাৰকাৰী দলে দুজন শ্ৰমিকৰ মৃতদেহ উদ্ধাৰ কৰিবলৈ সক্ষম হয় ।

ইয়াৰ পূৰ্বে NDRF ৰ টিম কমাণ্ডাৰ ইন্সপেক্টৰ ৰোশন কুমাৰ সিঙে সংবাদ সংস্থা ANI ৰ আগত কয়, "আমি প্ৰতিদিনে পুৱা পানীৰ স্তৰ পৰীক্ষা কৰো । আজিও সেই কামটো কৰি থাকোতে আমি এটা মৃতদেহ ওপঙি থকা দেখিছিলো । তাৰ পাচত আমি পুৱা প্ৰায় ৭:৩০ বজাত মৃতদেহটো উলিয়াই আনিলো । পানীৰ স্তৰত আছে 6 মিটাৰ হ্ৰাস হৈছে । 5 টা পাম্পে গোটেই ৰাতিটো কাম কৰি আছিল ৷ ২৪ ঘণ্টাই অপাৰেচন চলি আছে ।’’

ইতিমধ্যে মুখ্যমন্ত্ৰী ড৹ হিমন্ত বিশ্ব শৰ্মায়ো X ৰ যোগেদি ঘটনা সন্দৰ্ভত এটা পোষ্ট শ্বেয়াৰ কৰিছে ৷

উল্লেখ্য যে এই দুৰ্ঘটনা সংঘটিত হোৱাৰ পিছতে অবৈধ কয়লা খনন চলোৱাৰ বাবে পুনুচ নুনিচা নামৰ এগৰাকী ব্যক্তিক গ্ৰেপ্তাৰ কৰাৰ পিছত আৰক্ষীয়ে হানন লস্কৰ নামৰ আন এগৰাকী ব্যক্তিক অবৈধ খনন চলোৱাৰ অভিযোগত গ্ৰেপ্তাৰ কৰে । পুনুচ নুনিচাৰ স্বীকাৰোক্তিৰ ভিত্তিত এই ব্যক্তিগৰাকীক গ্ৰেপ্তাৰ কৰা হয় । বৰ্তমান পুনুচ নুনিচা চাৰি দিনৰ আৰক্ষীৰ জিম্মাত আছে ।

লগতে পঢ়ক :উমৰাংছ' কয়লাখনি ট্ৰেজেডী : পঞ্চমটো দিনত ভৰি দিলে উদ্ধাৰকাৰ্যই, ক্ৰমাৎ আশা কমি আহিছে আত্মীয়ৰ - UMRANGSO COAL MINE TRAGEDY

লগতে পঢ়ক :সুকলমে উভতি আহিবনে ! উৎকণ্ঠাৰ মাজতে পঞ্চম দিনাও অব্যাহত উদ্ধাৰ অভিযান - ASSAM COAL MINE TRAGEDY