জোনাই, ১৩ অক্টোবৰ: দুৰ্গা পূজাৰ আনন্দৰ মাজতে ধেমাজি জিলাৰ ডিমৌ আৰক্ষী থানাৰ অন্তৰ্গত ডিমৌ চাৰিআলিৰ দুজন লোক বিগত ৫ দিন ধৰি সন্ধানহীন হৈ আছে ৷ ডিমৌ চাৰিআলিৰ ৩ জন লোকে যোৱা ৮ অক্টোবৰত অসম-অৰুণাচল সীমান্তৰ অৰুণাচল প্ৰদেশৰ ডিমৌ নদীত মাছ ধৰিবলৈ গৈছিল । ইয়াৰে এজন উভতি আহে যদিও আন দুজন সন্ধানহীন হৈছে ।
ৰাইজৰ ভাষ্য় অনুসৰি মহেন্দ্ৰ পাংগীং (৫৭), প্ৰফুল্ল য়েইন (৫৫) আৰু জিনুত মিলিয়ে (৫১) সিদিনা মাছ ধৰিবলৈ গৈছিল ৷ ইয়াৰে জিনুত মিলি নামৰ লোকজন কোনোমতে ঘৰলৈ উভতি আহে ৷ ইফালে, জিনুত মিলিয়ে ৰাইজক জানিবলৈ দিয়া মতে মাছ মাৰি উভতি অহাৰ পথত পাহাৰৰ ঘন জংঘলৰ বাটত দুজন বন্ধু ক্ৰমে মহেন্দ্ৰ পাংগীং আৰু প্ৰফুল্ল য়েইনক এৰি থৈ আহে । ইয়াৰ পিচৰে পৰা ৰহস্যজনকভাৱে এই দুজন লোক পাহাৰৰ মাজত সন্ধানহীন হয় ৷
আনহাতে,পৰিয়াল তথা ৰাইজে কিবা কাৰণত পাহাৰৰ জংঘলত বাট হেৰাইছে বুলি পিছদিনালৈ অপেক্ষা কৰি উভতি নহাত বিভিন্ন ঠাইত বিচাৰ খোচাৰ কৰাৰ অন্তত অসম আৰু অৰুণাচল আৰক্ষীক অৱগত কৰে যদিও দুয়োখন ৰাজ্যৰ আৰক্ষীয়ে কোনো গুৰুত্ব নিদিয়াৰ অভিযোগ উত্থাপন কৰিছে ৰাইজে ৷